ສະຖານີລົດເມ ນະຄອນຫຼວງວຽງຈັນ ສ້າງມາໄດ້ຫຼາຍປີແລ້ວ ຍັງບໍ່ແລ້ວ.

ໂຄງການນີ້, ແມ່ນບໍລິສັດຈິດຈະເລີນ ກໍ່ສ້າງຈຳກັດ ເປັນຜູ້ລົງທຶນສຳປະທານ, ໂດຍອອກແບບຮ່ວມກັນລະຫວ່າງບໍລິສັດ ນິກເກນ ເຊນເກອິ ຂອງຍີ່ປຸ່ນ ທີ່ເປັນຜູ້ອອກແບບຜັງລວມຂອງສະຖານີ ແລະ ບໍລິສັດ ສສ.ຫຽດນາມ ອອກແບບລະອຽດເພື່ອກໍ່ສ້າງທັງໝົດ, ເຊິ່ງແມ່ນບໍລິສັດຈິດຈະເລີນກໍ່ສ້າງຈຳກັດ ເປັນຜູ້ລົງທຶນສຳປະທານໃນໄລຍະ 70 ປີ ແລະ ສາມາດຕໍ່ໄດ້ອີກ 20 ປີ ດ້ວຍມູນຄ່າລົງທຶນ 40 ລ້ານກວ່າໂດລາສະຫະລັດ ແລະ ໄດ້ເລີ່ມລົງມືກໍ່ສ້າງມາແຕ່ປີ 2015 ຕາມແຜນການແມ່ນຈະໃຊ້ເວລາກໍ່ສ້າງ 3 ປີໃຫ້ສຳເລັດ ແລະ ເປີດນຳໃຊ້ຢ່າງເປັນທາງການໃນທ້າຍປີ 2018.

ທ່ານ ຄຳ​ພູນ ເຕ​ເມ​ລາດ ຜູ້ອຳນວຍ​ການ​ ລັດ​ວິ​ສາ​ຫະ​ກິດ​ລົດເມນະຄອນຫຼວງ​ວຽງ​ຈັນ ໄດ້​ໃຫ້ສຳພາດ​ໃນ​ວັນ​ທີ 6 ມັງກອນ 2016 ວ່າ: ໂຄງການ​ກໍ່ສ້າງ​ສະຖາ​ນີ​ລົດເມ ນະຄອນຫຼວງ​ວຽງຈັນ ເປັນ​ອາຄານ 12 ຊັ້ນ ໂດຍການ​ອອກ​ແບບຂອງ​ບໍລິສັດ NIKKEN SEKKEI ຂອງ​ຍີ່ປຸ່ນ ໂດຍ​ແມ່ນ ບໍລິສັດ ຈິດ​ຈະເລີນ​ກໍ່ສ້າງ ຈຳກັດ ເປັນ​ຜູ້​ຮັບ​ເໝົາ​ກໍ່ສ້າງ ແລະ ສຳ​ປະທານ ​ໃນ​ໄລຍະ ເວລາ 70 ປີ

ດ້ວຍ​ມູນ​ຄ່າ​ການລົງທຶນ 47,5 ລ້ານ​ໂດ​ລາ​ສະຫະລັດ ຫຼື ປະມານ 370 ຕື້​ກີບ ຈະໃຊ້​ເວລາ​ການ​ກໍ່ສ້າງ 3 ປີ​ໃຫ້​ສຳເລັດ ກໍ່​ຄືຕາມ​ສັນຍາ ວັນ​ທີ 15 ກັນຍາ 2018 ໄດ້​ເປີດ​ນຳ​ໃຊ້ ເຊິ່ງໃນ​ຈຳນວນ 12 ຊັ້ນ​ຂອງ​ອາຄານ ໄດ້​ແບ່ງ​ອອກ​ເປັນ 2 ໂຊນຄື: ໂຊນ​ໜຶ່ງ ປະກອບ​ມີ 5 ຊັ້ນ ຈະເປັນບ່ອນ​ຈອດ​ລົດ​ທົ່ວ​ໄປ ສ່ວນໂຊນ​ທີ 2 ມີ 12 ຊັ້ນ ຄື​ຊັ້ນ 1 ຈະເປັນ​ສະຖານີ​ຈອດ​ລົດເມຊັ້ນ 2 ຈະ​ເປັນ​ຫ້ອງການ​ບໍລິການ​ຂອງລັດ​ວິ​ສາ​ຫະ​ກິດ​ລົດເມອີກ 5 ຊັ້ນ ທັດ​ຂຶ້ນ​ໄປ​ ເປັນ​ຮ້ານ​ຊັບ​ພະ​ສິນຄ້າ ແລະ ຊັ້ນ​ທີ່​ເຫຼືອ​ນັ້ນ ແມ່ນ​ຫ້ອງການ​ໃຫ້​ເຊົ່າ ສ່ວນ​ຊັ້ນ​ດາດ​ຟ້າ ຈະ​ສ້າງ​ເປັນ​ຮ້ານ​ອາຫານ ແລະ ເປັນ​ບ່ອນ​ຊົມ​ວີວ​ ຕົວ​ເມືອງ​ນະຄອນ​ຫຼວງ​ວຽງ​ຈັນ

ເຖິງຢ່າງໃດກໍ່ດີ, ການກໍ່ສ້າງມາຮອດປະຈຸບັນ ແມ່ນຍັງບໍ່ສໍາເລັດເນື່ອງຈາກຫຼາຍປັດໃຈ.