ເປີດນິມິດໝາຍ ຍຸກໃໝ່ແຫ່ງການຜະລິດຄຳ
ໃນວັນທີ 24 ກັນຍາ ຜ່ານມາ ລັດຖະມົນຕີກະຊວງພະລັງ ງານ ແລະ ບໍ່ແຮ່ ທ່ານ ຄຳມະນີ ອິນທິລາດ ພ້ອມຄະນະ, ລວມ ມີລັດຖະມົນຕີປະຈຳສຳນັກ ງານນາຍົກລັດຖະມົນຕີ ທ່ານ ຈະເລີນ ເຢຍປາວເຮີ ແລະ ຮອງເຈົ້າແຂວງສະຫວັນນະເຂດ ທ່ານ ທ່ອນແກ້ວ ພຸດທະໄກຍາລາດ
ໄດ້ລົງກວດກາການ ພັດທະນາບໍ່ຄຳ-ທອງ ເຊໂປນ ຂອງບໍລິສັດ ລ້ານຊ້າງ ມີເນໂຣນ ລິມິເຕັດ (ລຊມລ) ຢູ່ ເມືອງ ວິລະບູລີ ແຂວງສະຫວັນນະເຂດ, ຈາກທີ່ທ່ານເຄີຍໄດ້ລົງໄປຢ້ຽມຢາມຄັ້ງຫຼ້າສຸດ ໃນປີ 2014 ຊຶ່ງເປັນໄລຍະທີ່ ບໍລິສັດ ລຊມລ ໄດ້ເປັນບໍລິສັດບໍ່ແຮ່ທອງ ໃນລະດັບສາກົນ ທີ່ໃຫຍ່ທີ່ສຸດໃນ ສປປ ລາວ.
ການຢ້ຽມຢາມຄັ້ງນີ້ ເປັນ ນິມິດໝາຍສຳຄັນໃຫ້ແກ່ບໍລິ ສັດ ທີ່ໄດ້ຫັນປ່ຽນຈາກການຜະລິດທອງ ກັບມາສູ່ໂຄງການທີ່ສຸມໃສ່ການຜະລິດຄຳ ເພື່ອຍາດເອົາໂອກາດຈາກສະພາບເສດຖະກິດໂລກໃນປັດຈຸບັນ. ປີ 2020 ນີ້ ເປັນປີທີ່ ບໍລິສັດ ລຊມລ ສະເຫຼີມສະຫຼອງ “ຍຸກໃໝ່ແຫ່ງການຜະລິດຄຳ” ຍ້ອນບໍລິສັດໄດ້ບັນລຸຫຼາຍຂີດໝາຍສຳຄັນ
ເຖິງແມ່ນວ່າ ບໍລິສັດຈະພົບພໍ້ກັບຄວາມທ້າທາຍຫຼາຍປະການຈາກການລະບາດຂອງພະຍາດ ໂຄວິດ-19 ກໍຕາມ. ບໍລິສັດ ລຊມລ ມີຄວາມມຸ່ງໝັ້ນໃນການສະ ໜັບສະໜູນລັດຖະບານ ເພື່ອຮັບປະກັນຄວາມປອດໄພຈາກການຕິດ ເຊື້ອພະຍາດດັ່ງກ່າວ ໃຫ້ແກ່ພະນັກງານ, ຄອບຄົວຂອງພະ ນັກງານ ແລະ ຊຸມຊົນ ໃນໄລຍະວິກິດການໂຣກລະບາດນີ້.
ໃນປີນີ້ ບໍລິສັດ ລຊມລ ໄດ້ຫັນກັບຄືນມາຂຸດຄົ້ນແຮ່ຄຳ ເປັນຄັ້ງທຳອິດ ໂດຍໄດ້ເລີ່ມເປີດນຳໃຊ້ໂຮງງານປຸງ ແຕ່ງ – ຜະລິດຄຳ ທີ່ໄດ້ສ້ອມແປງ - ປັບປຸງຄືນໃໝ່ ເພື່ອໃຫ້ສາມາດເລີ່ມຜະລິດຄຳຈາກແຮ່ຄຳອ໊ອກໄຊ ແລະ ໃນບໍ່ດົນມານີ້ ທາງບໍລິສັດກໍໄດ້ເປີດໂຮງງານປຸງແຕ່ງສິນແຮ່ແບບຕີຝອດ-ຟູລອຍ ເພື່ອໃຫ້ສາມາດເລີ່ມຕົ້ນການຜະລິດຄຳຈາກ ແຮ່ຄຳເຄົ້າ.
ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ກ່າວວ່າ: “ຂ້າພະເຈົ້າມີຄວາມຍິນດີທີ່ໄດ້ເຂົ້າຮ່ວມເປັນນິມິດໝາຍ ແລະ ເປັນສັກຂີພິຍານ ໃຫ້ແກ່ຄວາມຄືບໜ້າສູ່ການເພີ່ມການຜະລິດຄຳ ແລະ ຄວາມມຸ່ງໝັ້ນ ໄລຍະຍາວຂອງບໍລິສັດ ລຊມລ ໂດຍສະເພາະແມ່ນຕໍ່ກັບຄວາມປອດໄພ, ການຢຶດຖື ມາດຕະຖານສາກົນໃນການຂຸດຄົ້ນບໍ່ແຮ່ ແລະ ການພັດທະນາເສດຖະກິດໃນ ສປປ ລາວ ຂ້າພະເຈົ້າຫວັງວ່າບໍລິ ສັດ ລຊມລ ຈະສືບຕໍ່ເປັນບໍລິ ສັດແນວໜ້າ ພ້ອມທັງເປັນບໍລິສັດບໍ່ແຮ່ ທີ່ເປັນແບບຢ່າງທີ່ດີເລີດ ແລະ ແບ່ງປັນປະສົບການ ແລະ ມາດຕະຖານສາກົນ ໃຫ້ແກ່ຜູ້ພັດທະນາບໍ່ແຮ່ພາຍໃນອື່ນໆ ຢູ່ໃນ ສປປ ລາວ.”
ການກັບຄືນມາຜະລິດຄຳ ຈະຍືດອາຍຸການຂຸດຄົ້ນບໍ່ແຮ່ຂອງໂຄງການຄຳ-ທອງເຊໂປນ ໄປອີກຢ່າງຕ່ຳ 10 ປີ ແລະ ຈະສືບຕໍ່ ສ້າງວຽກເຮັດງານທຳ, ສ້າງລາຍໄດ້ ກໍຄື ປັບປຸງຊີວິດການເປັນຢູ່ຂອງຊຸມຊົນເຈົ້າພາບ. ບໍລິສັດ ລຊມລ ຈະສືບຕໍ່ປະກອບສ່ວນໃສ່ການພັດທະນາເສດຖະກິດ-ສັງຄົມ ຂອງ ສປປ ລາວ ໂດຍຄາດວ່າ ຈະຜະລິດແທ່ງຄຳ ໄດ້ປະມານ 250.000 ອອນ ຕໍ່ປີ ພ້ອມທັງລົງທຶນຫຼາຍຂຶ້ນໃສ່ວຽກງານສຳຫຼວດ ແລະ ໂຄງການຂະຫຍາຍອື່ນໆ.
ທ່ານ ພໍ ແຮຣິສ ຜູ້ຈັດການໃຫຍ່ ລຊມລ ໄດ້ກ່າວວ່າ: “ພວກເຮົາມີຄວາມຮູ້ບຸນຄຸນສູງຕໍ່ລັດຖະບານລາວ ໂດຍສະເພາະກະຊວງພະລັງງານ ແລະ ບໍ່ແຮ່ ທີ່ໄດ້ໃຫ້ການສະ ໜັບສະໜູນໂຄງການຄຳ-ທອງເຊໂປນ ສະເໝີມາ ຊຶ່ງໄດ້ຊ່ວຍໃຫ້ບໍລິສັດບັນລຸຂີດໝາຍສຳຄັນຫຼາຍປະການ ໃນການກັບຄືນມາຜະລິດຄຳ ໄວກວ່າແຜນທີ່ວາງໄວ້.”
ຕັ້ງແຕ່ເລີ່ມດຳເນີນການຂຸດຄົ້ນ-ຜະລິດຄຳ-ທອງໃນປີ 2002, ໂຄງການຄຳ-ທອງເຊໂປນ ໄດ້ຜະລິດແທ່ງຄຳຫຼາຍກວ່າ 1,2 ລ້ານ ອອນ ແລະ ຜະລິດແຜ່ນທອງຫຼາຍກວ່າ 1 ລ້ານໂຕນ; ໄດ້ສ້າງຜົນປະໂຫຍດໂດຍກົງຫຼາຍກວ່າ 1,5 ຕື້ ໂດລາ ໃຫ້ແກ່ ສປປ ລາວ ໂດຍຜ່ານການຈ່າຍພາສີ-ອາກອນ, ພາສີຊັບພະຍາກອນແຮ່ທາດ ແລະ ເງິນປັນຜົນ.
ນອກຈາກນັ້ນ ໂຄງການຄຳ-ທອງເຊໂປນຍັງໄດ້ສ້າງຜົນປະໂຫຍດທາງອ້ອມ ດ້ວຍການສ້າງວຽກເຮັດງານທຳ, ການພັດທະນາຊັບພະຍາກອນມະນຸດ ຜ່ານການຝຶກອົບຮົມຕ່າງໆ, ການພັດທະນາຊຸມຊົນ ແລະ ລາຍໄດ້ໃຫ້ແກ່ຜູ້ຮັບເໝົາທ້ອງຖິ່ນ ອັນໄດ້ສ້າງຜົນປະໂຫຍດທາງບວກຢ່າງມະຫາສານໃຫ້ແກ່ການພັດທະນາເສດຖະກິດ-ສັງຄົມ.
ໃນປີ 2003 ກໍຄືໄລຍະທີ່ໄດ້ມີການນຳໃຊ້ກຳລັງ ແຮງງານສູງສຸດ, ໂຄງການຄຳ-ທອງເຊໂປນ ໄດ້ສ້າງວຽກເຮັດງານທຳໄດ້ຫຼາຍກວ່າ 5.000 ຄົນ ແລະ ໄດ້ລົງທຶນຫຼາຍຮ້ອຍລ້ານໂດລາເຂົ້າໃສ່ການພັດທະນາ ແລະ ການຝຶກອົບຮົມພະນັກງານ. ໃນຊຸມຊົນເມືອງ ວິລະບູລີ ໄດ້ມີປະຊາຊົນກວ່າ 14.000 ຄົນ ໄດ້ຮັບຜົນປະໂຫຍດຈາກ ໂຄງການພັດທະນາຊຸມຊົນ ຂອງໂຄງ ການຄຳ - ທອງເຊໂປນ ລວມມູນຄ່າ 13 ລ້ານໂດລາ ແລະ ລາຍໄດ້ຂອງກຸ່ມທຸລະກິດທ້ອງຖິ່ນກໍໄດ້ທະວີຄູນ ຂຶ້ນເປັນ 32 ລ້ານໂດລາ.
ບໍລິສັດ ລຊມລ ໄດ້ໂຈະການຜະລິດຄຳໃນເດືອນ ທັນວາ 2013 ຍ້ອນສິນແຮ່ຄຳມີຄຸນນະພາບຫຼຸດລົງ ແລະ ລາຄາຂາຍຄຳຕົກຕ່ຳລົງ. ການກັບຄືນມາຜະລິດຄຳ ຈະຮັບປະກັນໃຫ້ຜົນປະໂຫຍດເຫຼົ່ານີ້ ສືບຕໍ່ເສີມ ຂະຫຍາຍຂຶ້ນໄປ ແລະ ທັງຈະວາງພື້ນຖານດ້ານເສດຖະກິດ-ສັງຄົມ ທີ່ເຂັ້ມແຂງໃນໄລຍະ ດຳເນີນໂຄງການ ແລະ ພາຍຫຼັງສິ້ນສຸດອາຍຸການຂຸດຄົ້ນບໍ່ແຮ່.