ເຊື່ອຫຼືບໍ່? ປະເທດລາວຖືກຖິ້ມລະເບີດຫຼາຍທີ່ສຸດໃນໂລກ

ຄຳຖາມຂອງນັກຂ່າວຕ່າງປະເທດ ທີ່ມາຮ່ວມສຳມະນາຢູ່ວຽງຈັນ ໄດ້ຖາມຜູ້ຮ່ວມສຳມະນາທີ່ກະຕຸ້ນ ຄວາມສົນໃຈຄື “ຮູ້ບໍວ່າປະເທດໃດໃນໂລກນີ້ຖືກຖິ້ມລະເບີດໃສ່ຫຼາຍທີ່ສຸດໃນໂລກ?”

ຕ່າງຄົນຕ່າງທວາຍວ່າ ບາງຄົນວ່າ ຍີ່ປຸ່ນ, ເກົາຫຼີ, ຫວຽດນາມ, ອີຣັກ, ເຢຍລະມັນ, ຝຣັ່ງ ແລະອື່ນໆ ແລະຄຳຕອບທີ່ຖືກຕ້ອງນັ້ນ ຄືປະເທດລາວ (Laos: The Most Bombed Country on Earth)

ຄົງບໍ່ຕ້ອງບອກກໍຮູ້ເນາະວ່າ ໃຜຄືຜູ້ທີ່ເຮັດສົງຄາມໃນລາວ ແຕ່ຕອນນີ້ກຳລັງເປັນອິນຊີປີກຫັກ ເພາະບັນຫາດ້ານທຶນນິຍົມຕີກັບ ແລະທີ່ແປກໃຈທີ່ສຸດຄື ກ່ອນໜ້ານີ້ ຄົນອາເມລິກາ ບໍ່ຮູ້ວ່າ ກອງທັບອາເມລິກາໄດ້ມາ ເຮັດສົງຄາມໃນປະເທດລາວ.

ບໍ່ຕ້ອງແປກໃຈດອກ ເພາະຕອນເຮັດສົງຄາມໃນໄລຍະປີ 1964-1973 ໄດ້ຊື່ວ່າເປັນສົງຄາມລັບ  (Secret Wars) ພາຍໃຕ້ສີມືຂອງ CIA ແລະການປົກປິດຂອງລັດຖະານແລະກອງທັບສະຫະລັດ ຈຶ່ງເຮັດໃຫ້ປະຊາຊົນອາເມລິກາແລະລັດຖະສະພາອາເມລິກາ ຮູ້ພຽງແຕ່ວ່າ ກອງທັບຂອງຕົນກຳລັງເຮັດສົງຄາມ ຢູ່ໃນຫວຽດນາມ ເອີ້ນວ່າກວ່າຈະຮູ້ກໍແມ່ນ ຮອດຕອນອະວະສານແລ້ວ.

ລອງຄິດໄລ່ນຳກນເບິ່ງວ່າ ປະລິມານລະເບີດທີ່ຕົກຄ້າງ ແລະຍັງບໍ່ລະເບີດ  (Unexploded Ordnance : UXO) ມີຫຼາຍປານໃດ?

  • ມີຕົກຄ້າງທັງໝົດ 270 ລ້ານລູກ ຈາກປະລິມານບະເບີດ ທີ່ຖິ້ມລວມປະມານ 3 ລ້ານໂຕນ ຈາກການລະດົມຖິ້ມ-ປະຕິບັດພາລະກິດຂອງນັກບິນ ແຫ່ງກອງທັບສະຫະລັດຫຼາຍກວ່າ 5 ແສນທ່ຽວບິນ.
  • ຄອບຄຸມພື້ນທີ່ 87,200 ຕາກິໂລແມັດ ໃນພື້ນທີ່ 15 ແຂວງ ຈາກທັງໝົດ 17 ແຂວງ ແລະ 1 ນະຄອນຫຼວງ ທີ່ມີເນື້ອທີ່ລວມທັງໝົດ 236,800 ກິໂຕຕາແມັດ.
  • ໃນໄລຍະກວ່າ 44 ປີມານີ້ ມີປະຊາຊົນລາວຫຼາຍກວ່າ 15,000 ຄົນແລ້ວ ທີ່ຕ້ອງຮັບເຄາະຈາກລະເບີດຕົກຄ້າງ ແຕ່ປາງສົງຄາມ.

ພື້ນທີ່ທີ່ມີລະເບີດບໍ່ທັນແຕກຕົກຄ້າງ ຫຼາຍທີ່ສຸດຢູ່ແຂວງຊຽງຂວາງ ເຊິ່ງເປັນທີ່ຕັ້ງຂອງທົ່ງໄຫກິນ (The Plain of Jars) ວ່າທີ່ ມໍລະດົກໂລກ (World Heritage) ແຫ່ງທີ 3 ຂອງລາວ ທີ່ຄາດວ່າຈະຖືກຮັບຮອງຈາກ Unesco ໄວໆນີ້ ແຕ່ນັກທ່ອງທ່ຽວຕ້ອງລະມັດລະວັງ ຄືຕ້ອງປະຕິບັດຕາມຄຳແນະນຳຂອງ ພະນັກງານນຳທ່ຽວຢ່າງເຄັ່ງຄັດ ຫຼືຢ່າອອກຈາກເສັ້ນທາງທີ່ກຳນົດໃຫ້ ຍ່າງເດັດຂາດ ເພື່ອຄວາມປອດໄພ.

ເຊິ່ງຈາກການປະເມີນຂອງ ອົງການເກັບກູ້ລະເບີດແຫ່ງຊາດລາວ ( Lao National Unexploded Ordnance Programme) ວ່າ ຖ້າການເກັບກູ້ລະເບີດບໍ່ທັນແຕກໃນລາວ ຍັງຄົງດຳເນີນໄປຄືກັບໃນໄລຍະ 10 ທີ່ຜ່ານມາ ຄົງຕ້ອງໃຊ້ເວລາອີກນັບ 100 ປີ ຂ້າງໜ້າກໍຍັງຄົງຈະເກັບກູ້ບໍ່ທັນໝົດ ເວັ້ນເສຍແຕ່ວ່າ ອົງການເກັບກູ້ລະເບີດບໍ່ທັນແຕກຂອງລາວ ໄດ້ຮັບການຊ່ວຍເຫຼືອຢ່າງພຽງພໍ ດ້ວຍເງິນຫຼາຍກວ່າ 300 ລ້ານລູກ x 300 ໂດລາສະຫະລັດ = 90,000 ລ້ານ ໂດລາສະຫະລັດ.

ຂໍ້ມູນທີ່ມາຂອງບົດ: ສົງຄາມ ປະຫວັດສາດ

error: ເນື້ອຫາໄດ້ຮັບການປົກປ້ອງ !!