ຄໍາຊີ້ແຈງ ການປັບຕົວເລກ ຜູ້ເສຍຊິວິດເພີ່ມ 50% ທີ່ເມືອງ ອູ່ຮັ້ນ

ນະ​ຄອນ​ອູ​ຮັ້ນ​ໄດ້​ຕອບ​ຄຳ​ຖາມ​ຂອງ​ນັກ​ຂ່າວ​ກ່ຽວ​ກັບ​ການ​ປັບ​ຕົວ​ເລກ​ຜູ້​ຖືກ​ບົ່​ງ​ມະ​ຕິ​ ແລະ ຜູ້​ເສຍ​ຊີ​ວິດ​ຍ້ອນ​ເປັນ​ພະ​ຍາດ​ໂຄວິດ-19

ວັນ​ທີ 17 ເມ​ສາ​ນີ້, ເຈົ້າ​ໜ້າ​ທີ່​ນະ​ຄອນ​ອູ​ຮັ້ນ​ໄດ້​ຕອບ​ຄຳ​ຖາມ​ຂອງ​ນັກ​ຂ່າວ ​ກ່ຽວ​ກັບ​ການ​ປັບ​ຕົວ​ເລກ​ຜູ້​ຖືກ​ບົ່​ງ​ມະ​ຕິເປັນ​ພະ​ຍາດ​ໂຄວິດ-19​ ແລະ ຜູ້​ເສຍ​ຊີ​ວິດ​ຍ້ອນ​ພະ​ຍາດ​ດັ່ງ​ກ່າວ.
ວັນ​ທີ 17 ເມ​ສາ​ນີ້, ກອ​ງ​ບັນ​ຊາ​ການ​ປ້ອງ​ກັນ​ແລະ​ຄວບ​ຄຸມ​ພະ​ຍາດ​ໂຄວິດ-19 ນະ​ຄອນ​ອູ​ຮັ້ນ​ໄດ້​ແຈ້ງ​ສະ​ພາບ​ການ​ກ່ຽວ​ກັບ​ການ​ປັບ​ຕົວ​ເລກ​ຜູ້​ຖືກ​ບົ່​ງ​ມະ​ຕິເປັນ​ພະ​ຍາດ​ໂຄວິດ-19​ ແລະ ຜູ້​ເສຍ​ຊີ​ວິດ​ຍ້ອນ​ພະ​ຍາດ​ດັ່ງ​ກ່າວ. ມື້​ດຽວ​ກັນ, ຜູ້​ຮັບ​ຜິດ​ຊອບ​ທີ່​ກ່ຽວ​ຂ້ອງ​ຂອງກອງ​ບັນ​ຊາ​ການ​ດັ່ງ​ກ່າວ​ໄດ້​ຕອບ​ຄຳ​ຖາມ​ຂອງ​ນັກ​ຂ່າວ ໂດຍ​ມີ​ເນື້ອ​ໃນ​ດັ່ງ​ຕໍ່​ໄປ​ນີ້:

ໜຶ່ງ: ເປັນ​ຫຍັງ​ຈິ່ງ​ປັບ​​ຕົວ​ເລກ​ຜູ້​ຖືກ​ບົ່​ງ​ມະ​ຕິເປັນ​ພະ​ຍາດ​ໂຄວິດ-19​ ແລະ ຜູ້​ເສຍ​ຊີ​ວິດ​ຍ້ອນ​ພະ​ຍາດ​ດັ່ງ​ກ່າວຂອງ​ນະ​ຄອນ​ອູ​ຮັ້ນ?
ຕອບ: ການ​ແຜ່​ລະ​ບາດ​ຂອງ​ພະ​ຍາດ​ໂຄວິດ-19 ແມ່ນ​ເຫດ​ການສຸກ​ເສີນດ້ານ​ສາ​ທາ​ລະ​ນະ​ສຸກ​​ທີ່​ສຳ​ຄັນ​ຄັ້ງ​ໜຶ່ງ​ທີ່​​ແຜ່​ລະ​ບາດ​ໄວ​ກວ່າ​ໝູ່, ​ຂອບ​ເຂດແຜ່​ລະ​ບາດກວ້າງກວ່າ​ໝູ່ ແລະ ມີ​ຄວາມ​ຫຍຸ້ງ​ຍາກຫຼາຍ​ທີ່​ສຸດ​ໃນ​ການ​ປ້ອງ​ກັນ-​ຄວບ​ຄຸມ ທີ່ເກີດ​ຂຶ້ນ​ຢູ່​ຈີນນັບ​ແຕ່​ສະ​ຖາ​ປະ​ນາ ສ​ປ ຈີນ​ເປັນ​ຕົ້ນ​ມາ. ໃນ​ຖາ​ນະ​ເປັນ​ສະ​ໜາມ​ຮົບ​ຕົ້ນ​ຕໍ​ໃນ​ການ​ປ້ອງ​ກັນ​ແລະ​ຄວບ​ຄຸມ​ພະ​ຍາດ, ​ພາຍ​ໃຕ້​ການ​ຊີ້​ນຳ​ນຳ​ພາ​ອັນ​ເຂັ້ມ​ແຂງ​ຂອງ​ສູນ​ກາງ​ພັກ ແລະ ລັດ​ຖະ​ບານ​ຈີນ, ພາຍ​ໃຕ້​ການ​ບັນ​ຊາ​ກາ​ນ​ລະ​ອຽດ​ຂອງ​ຄະ​ນະ​ພັກ ແລະ ອຳ​ນາດ​ການ​ປົກ​ຄອງ​ແຂວງ​ຫູ​ເປີຍ, ນະ​ຄອນ​ອູ​ຮັ້ນໄດ້​ໃຊ້​ມາດ​ຕະ​ການ​ປ້ອງ​ກັນ​ຄວບ​ຄຸມ​ທີ່​ຮອບ​ດ້ານທີ່​ສຸດ, ເຂັ້ມ​ງວດ​ທີ່​ສຸດ ແລະ ເຖິງ​ຖອງ​ທີ່​ສຸດ ປັດ​ຈຸ​ບັນ, ໄດ້​ສະ​ກັດ​ກັ້​ນ​ຊ່ອງ​ທາງ​ແຜ່​ລະ​ບາດ​ຂອງ​ພະ​ຍາດ​ໃນ​ຂັ້ນ​ພື້ນ​ຖານ​ແລ້ວ ແລະ ໄດ້​ຍົກ​ລີກ​ການ​ປິດ​ຊ່ອງ​ທາງ​ເຂົ້າ​ອອກ​ເມືອງ​ນະ​ຄອນ​ອູ​ຮັ້ນ​ແລ້ວ ເຊິ່ງ​ໄດ້​ສ້າງ​ເງື່ອນ​ໄຂ​ທີ່​ດີ​ໃຫ້​ແກ່​ວຽກ​ງານ​ປັບ​ຕົວ​ເລກ​ຕ່າງໆ​ກ່ຽວ​ກັບ​ສະ​ພ​າບ​ການ​ແຜ່​ລະ​ບາດ​ຂອງ​ພະ​ຍາດ​ຢ່າງ​ຮອບ​ດ້ານ. ກ່ຽວ​ກັບ​ຂໍ້​ມູນ​​ຕ່າງໆກ່ຽວ​ກັບ​ການ​ແຜ່​ລະ​ບາດ​ຂອງ​ພະ​ຍາດ​ ເຊັ່ນ: ຜູ້​ຖືກ​ບົ່ງ​ມະ​ຕິ​ເປັນ​ພະ​ຍາດ ແລະ ຜູ້​ເສຍ​ຊີ​ວິດ​ຍ້ອນ​ພະ​ຍາດ ລ້ວນ​ແຕ່​ຄວນ​​ລາຍ​ງານ​ແລະ​ເປີດ​ເຜີຍຢ່າງທັນ​ການ, ໂປ່ງ​ໃສ ແລະ ຖືກ​ຕ້ອງ​ຕາມ​ຄວາມ​ຈິງ. ໃນໄລ​ຍະ​ຕົ້ນ​ຂອງ​ການ​ແຜ່​ລະ​ບາດ​ຂອງ​ພະ​ຍາດ, ຍ້ອນ​ວ່າ​ຄວາ​ມສາ​ມາດ​ໃນ​ການ​ຮັບ​ປິ່ນ​ປົວ​ຜູ້​ເປັນ​ພະ​ຍາດ​ບໍ່​ພຽງ​ພໍ, ບາງ​ອົງ​ການ​ປິ່ນ​ປົວ​ບໍ່​ສາ​ມາດ​ເຊື່ອມ​ຕໍ່​ກັບ​ລະ​ບົບ​ຂໍ້​ມູນ​​ການປ້ອງ​ກັນ​ແລະ​ຄວບ​ຄຸມ​ພະ​ຍາດ​ຢ່າງ​ທັນ​ການ, ໂຮງ​ໝໍ​ດຳ​ເນີນ​ງານ​​ຢ່າງ​ເກີນ​ຄວາມ​ສາ​ມາດ, ພະ​ນັກ​ງານ​ການ​ແພດ​​ຂ້ຽວ​ເລັ່ງ​ນຳ​ການ​ປິ່ນ​ປົວແລະ​ຊ່ວຍ​ເຫຼືອ​ຊີ​ວິດ, ບາງ​ທີເຮັດ​ໃຫ້​ເກີດ​ມີ​ສະ​ພາບ​ການ​ທີ່​ລາຍ​ງານ​ຊ້າ, ລາຍ​ງານ​ບໍ່​ຄົບ ແລະ ລາຍ​ງານ​ຜິດ. ໂດຍ​ອີງ​ຕາຂໍ້​ທີ 4 ມາດ​ຕາ​ທີ 38 ຂອງ “ກົດ​ໝາຍ​ວ່າ​ດ້ວຍ​ການປ້ອງ​ກັນ​ແລະປິ່ນ​ປົວ​ພະ​ຍາດ​ຕິດ​ແປດ​ຂອງ ສ​ປ ຈີນ”, ​ຂໍ້​ທີ 3 ມາດ​ຕາ​ທີ 25 ຂອງກົດ​ລະ​ບຽ​ບ​ວ່າ​ດ້ວຍການຮັບ​ມື​ສຸກ​ເສີນ​ຕໍ່​ເຫດ​ການ​ສາ​ທາ​ລະ​ນ​ະ​ສຸກ​ທີ່​ເກີດ​ຂຶ້ນ​ກະທັນ​ຫັນ”, ມາດ​ຕາ​ທີ 19 ຂອງ “ກົດ​ລະ​ບຽບ​ວ່າ​ດ້ວຍ​ການ​ປະ​ຕິ​ບັດ​ກົດ​ໝາຍ​ສະ​ຖິ​ຕິ ສ​ປ ຈີນ” ແລະ ມາດ​ຕາ​ທີ 14 ແລະທີ 1​5 ໃນ “ລະ​ບຽບ​ການ​ຄຸ້ມ​ຄອງ​ການຈົດ​ທະ​ບຽນ​ຂໍ້​ມູນ​ກ່ຽວ​ກັບ​ການ​ເສ​ຍ​ຊີ​ວິດ​ຂອງ​ປະ​ຊາ​ກອນ”(ສະ​ບັບ​ທົດ​ລອງ), ຄວນ​ປັບ​ຕົວ​ເລກ​ຜູ້​ຖືກ​ບົ່​ງ​ມະ​ຕິເປັນ​ພະ​ຍາດ​ໂຄວິດ-19​ ແລະ ຜູ້​ເສຍ​ຊີ​ວິດ​ຍ້ອນ​ພະ​ຍາດ​ດັ່ງ​ກ່າວ​ໃຫ້​ຖືກ​ຕ້ອງ​ຕາມ​ຄວາມ​ເປັນ​ຈິງ.

ສອງ: ໄດ້​ດຳ​ເນີນ​ວຽກ​ງານ​ປັບ​ຕົວ​ເລກ​ຜູ້​ຖືກ​ບົ່​ງ​ມະ​ຕິເປັນ​ພະ​ຍາດ​ໂຄວິດ-19​ ແລະ ຜູ້​ເສຍ​ຊີ​ວິດ​ຍ້ອນ​ພະ​ຍາດ​ດັ່ງ​ກ່າວ​ຢູ່​ນະ​ຄອນ​ອູ​ຮັ້ນແນວ​ໃດ?
ຕອບ: ​ກອງ​ບັນ​ຊາ​ການ​ປ້ອງ​ກັນ​ແລະ​ຄວບ​ຄຸມ​ການ​ແຜ່​ລະ​ບາດ​ຂອງ​ພະ​ຍາດ​ນະ​ຄອນ​ອູ​ຮັ້ນ​ເອົາ​ໃຈ​ໃສ່​ຢ່າງ​ສູງ​ຕໍ່​ການ​ປັບ​ຕົວ​ເລກ​ຜູ້​ຖືກ​ບົ່​ງ​ມະ​ຕິເປັນ​ພະ​ຍາດ​ໂຄວິດ-19​ ແລະ ຜູ້​ເສຍ​ຊີ​ວິດ​ຍ້ອນ​ພະ​ຍາດ​ດັ່ງ​ກ່າວ​, ໂດຍ​ປະ​ຕິ​ບັດ​ຕາມຫຼັກ​ການ​ທີ່​ຮັບ​ຜິດ​ຊອບ​ຕໍ່​ປະ​ຫວັດ​ສາດ, ຕໍ່​ປະ​ຊາ​ຊົນ ແລະ ຕໍ່​ຜູ້​ເສຍ​ຊີ​ວິດ, ຍຶດ​ໝັ້ນ​ສະ​ແຫວງ​ຫາ​​ຄວາມສັດ​ຈະ​ຈາກ​ຄວາມ​ເປັນ​ຈິງ ແລະ ໄດ້​ດຳ​ເນີນ​ການ​ປັບ​ຕົວ​ເລກ​ຢ່າງ​ເປັນ​ເຈົ້າ​ການ. ເລີ່ມ​ແຕ່​ທ້າຍ​ເດືອນ​ມີ​ນາ​ປີ​ນີ້, ໄດ້​ສ້າງ​ຕັ້ງໜ່ວຍກວດ​ກາ​ຖານ​ຂໍ້​ມູນ​ໃຫຍ່​ດ້ານ​ການ​ແຜ່​ລະ​ບາດ​ຂອງ​ພະ​ຍາດແລະລະ​ບາດ​ວິທະ​ຍາ, ຈັດ​ຕັ້ງ​ພາກ​ສ່ວນ​ຕ່າງໆ ເຊັ່ນ: ສາ​ທາ​ລະ​ນະ​ສຸກ​ແລະ​ສຸ​ຂະ​ພາບ, ການ​ປ້ອງ​ກັນ​ແລະ​ຄວບ​ຄຸມ​ພະ​ຍາດ, ປ້ອງ​ກັນ​ຄວາມ​ສະ​ຫງົບ, ປະ​ຊາ​ສົງ​ເຄາະ, ຕຸ​ລາ​ການ ແລະ ພາກ​ສ່ວນສະ​ຖິ​ຕິ ເປັນ​ຕົ້ນ, ໄດ້​ດຳ​ເນີນ​ການ​ປຽບ​ທຽບ, ຕັດ​ຈຳ​ນວນ​ຊ້ຳ​ກັນ, ເພີ່ມ​ຈຳ​ນວນ​ທີ່​ບໍ່​ໄດ້ຈົດ​ທະ​ບຽນ​ມາ​ກ່ອນ​ຕາມ​ທາງອອນ​ລາຍ ຕໍ່​​ຈຳ​ນວນຜູ້​ເປັນ​ພະ​ຍາດ​ທີ່​ຢູ່​ໃນ​ລະ​ບົບ​ຕົວ​ເລກ​ຂໍ້​ມູນ​ປ້ອງ​ກັນ​ແລະ​ຄວບ​ຄຸມ​ການ​ແຜ່​ລະ​ບາດ​ຂອງ​ພະ​​ຍາດ, ລະ​ບົບຂໍ້​ມູນຈັດ​ງານ​ສົບ, ລະ​ບົບ​ຂໍ້​ມູນ​ພະ​ຍາດ​ໂຄວິດ-19 ທີ່​ຄຸ້ມ​ຄອງ​ໂດຍ​ຂະ​ແໜງ​ການ​ການ​ແພດ ແລະ ລະ​ບົບ​ກວດ​​ນິວຄະ​ເລ​ອິກພະ​ຍາດ​ໂຄວິດ-19 ຂອງ​ນະ​ຄອນ​ອູ​ຮັ້ນ ຢ່າງ​ເປັນ​ເອ​ກະ​ພາບ​ກັນ, ໄດ້​ເກັບ​ກຳ​ຂໍ້​ມູ​ນ​ຜູ້​ເປັນ​ພະ​ຍາດ​ໝົດ​ທຸກ​ກໍ​ລະ​ນີ​ຕາມ​ສະ​ຖານ​ທີ່​ຕ່າງໆ​ທີ່​ມີ​ການ​ແຜ່​ລະ​ບາດ​​ຂອງພະ​ຍາດ ​ລວມ​ທັງພະ​ແນກກວດ​ກາ​ຄີງ​ຮ້ອນ, ໂຮງ​ໝໍ, ໂຮງ​ໝໍ​ຊົ່ວ​ຄາວ, ຈຸດ​ແຍກ​ປ່ຽວ, ຄຸ້ມ​ຊຸມ​ຊົນ​ທີ່​ມີ​ການ​ແຜ່​ລະບາດ ພ້ອມ​ທັງ​​ສະ​ຖານ​ທີ່​ພິ​ເສດ​ຕ່າງໆ ເຊັ່ນ: ຄຸກ, ໂຮງ​ລ້ຽງ​ດູ​ຜູ້​ເຖົ້າ ທີ່​ຄຸ້ມ​ຄອງ​ໂດຍ​ອົງ​ການ​ປ້ອງ​ກັນ​ຄວາມ​ສະຫງົບ, ອົງ​ການ​ຕຸ​ລາ​ການ ແລະ ອົງ​ການ​ປະ​ຊາ​ສົງ​ເຄາະ, ໂດຍ​ຜ່ານ​ຈ​າກ​ອົງ​ການ​ປິ່ນ​ປົວ, ຄຸ້ມ​ຊຸ​ມ​ຊົນ, ພາກ​ສ່ວນປ້ອງ​ກັນ​ຄວາມ​ສະ​ຫງົບ​ຂັ້ນ​ພື້ນ​ຖານ ແລະ ໜ່ວຍ​ງານ ຫຼື ຄອບ​ຄົວ​ຂອງ​ຜູ້​ເປັນ​ພະ​ຍາດ, ກວດ​ກາ​ຕາມ​ແຕ່​​ລະ​ຄົນ, ຮັບ​ປະ​ກັນ​ໃຫ້​ທຸກ​ກໍ​ລະ​ນີ​ຖືກ​ຕ້ອງ​ຕາມ​ຄວາມ​ຈິງ, ທຸກ​ຕົວ​ເລກ​ຖືກ​ຕ້ອງ​ຕາມ​ຄວາມ​ຈິງ.

ສາມ: ພາຍຫຼັງ​ປັບ​ຕົວ​ເລກ​ຜູ້​ຖືກ​ບົ່ງ​ມະ​ຕິ​ເປັນ​ພະ​ຍາດ​ໂຄວິດ-19 ແລ້ວ, ຕົວ​ເລກ​ຂອງ​ນະ​ຄອນ​ອູ​ຮັ້ນ​ມີ​ການ​ປ່ຽນ​ແປງ​ແນວ​ໃດ?
ຕອບ: ມາ​ຮອດ​ເວ​ລາ 24 ໂມງ​ຂອງວັນ​ທີ 16 ເມ​ສາ​ນີ້, ຜູ້​ຖືກ​ບົ່ງ​ມະ​ຕິ​ເປັນ​ພະ​ຍາດ​ໂຄວິດ-19 ຂອງ​ນະ​ຄອນ​ອູ​ຮັ້ນ ທີ່​ໄດ້​ເປີດ​ເຜີຍ​ຕໍ່​ພາຍນອກ​ແມ່ນ 50.008 ກໍ​ລະ​ນີ, ຍ້ອນ​ມີ​ຜູ້​ເປັນ​ພະ​ຍາດ​ບາງ​ຄົນ​ເຄີຍ​ໄປ​ຮັບ​ປິ່ນ​ປົວ​ແບບ​ຂ້າມ​ເມືອງ ແລະ ໄປ​ຮັບ​ການ​ປິ່ນ​ປົວ​ຢູ່​ໂຮງ​ໝໍຫຼາຍ​ແຫ່ງ, ເຮັດ​ໃຫ້​ເກີດ​ມີ​ການ​ລາຍ​ງານ​ຊ້ຳ​ກັນ ​ຈຶ່ງໄດ້​ຫຼຸດ​ຈຳ​ນວນ 217 ກໍ​ລະ​ນີ; ຄວນ​ເພີ່ມ​ການ​ລາຍ​ງານ 542 ກໍ​ລະ​ນີ ຍ້ອນ​ລາຍ​ງານ​ຊ້າ, ບໍ່​ໄດ້​ລາຍ​ງານ ແລະ ບໍ່​ໄດ້​ລາຍ​ງານ​ອາ​ການ​ພະ​ຍາດ​ເກົ່າ, ນັບ​ລວມ​ແລ້ວ, ຜູ້​ຖືກ​ບົ່ງ​ມະ​ຕິ​ເປັນ​ພະ​ຍາດ​ໂຄວິດ-19 ຄວນ​ປັບຂຶ້ນ​ເປັນ 50.333 ກໍ​ລະ​ນີ.

ສີ່: ພາຍຫຼັງ​ປັບ​ຕົວ​ເລກ​ຜູ້​ເສຍ​ຊີ​ວິດ​ຍ້ອນເປັນ​ພະ​ຍາດ​ໂຄວິດ-19 ແລ້ວ, ຕົວ​ເລກ​ຂອງ​ນະ​ຄອນ​ອູ​ຮັ້ນ​ມີ​ການ​ປ່ຽນ​ແປງ​ແນວ​ໃດ?
ຕອບ: ມາ​ຮອດ​ເວ​ລາ 24 ໂມງ​ຂອງວັນ​ທີ 16 ເມ​ສາ​ນີ້, ຜູ້ເສຍ​ຊີ​ວິດ​ຍ້ອນເປັນ​ພະ​ຍາດ​ໂຄວິດ-19 ​ທີ່​ເຄີຍ​ເປີດ​ເຜີຍ​ຕໍ່​ພາຍນອກຂອງ​ນະ​ຄອນ​ອູ​ຮັ້ນ​ແມ່ນ 2.579 ກໍ​ລະ​ນີ, ໃນ​ນັ້ນ, ໄດ້​ຕັດ​ອອກ​ 164 ກໍ​ລະ​ນີ ເນື່ອງ​ຈາກ​ການ​​ລາຍ​ງານ​ຊ້ຳ ແລະ ​ເປັນກໍ​ລະ​ນີ​ທີ່​ບໍ່​ແມ່ນ​ພະ​ຍາດ​ໂຄວິດ-19​; ບໍ່​ໄດ້​ລາຍ​ງານ​ຕໍ່​ລະ​ບົບ​ຂໍ້​ມູນ​ປ້ອງ​ກັນ​ແລະ​ຄວບ​ຄຸມ​ພະ​ຍາດ ຍ້ອນ​ເສຍ​ຊີ​ວິດ​ແບບ​ບໍ່​ໄດ້​ນອນ​ໂຮງ​ໝໍ ແລະ ບາງ​ໂຮງ​ໝໍ​ບໍ່​ໄດ້​ລາຍ​ງານ​ນັ້ນ, ຄວນ​ເພີ່ມ​ຈຳ​ນວນ 1.454 ກໍ​ລະ​ນີ. ດັ່ງ​ນັ້ນ, ນັບ​ລວມ​ແລ້ວ, ຜູ້​ເສຍ​ຊີ​ວິດ​ຍ້ອນ​ເປັນ​ພະ​ຍາດ​ໂຄວິດ-19 ໃນ​ຕົວ​ຈິງ​ຄວນ​ປັບຂຶ້ນ​ເປັນ 3.869 ກໍ​ລະ​ນີ.

ຫ້າ: ການປັບ​​ຕົວ​ເລກ​ຜູ້​ຖືກ​ບົ່​ງ​ມະ​ຕິເປັນ​ພະ​ຍາດ​ໂຄວິດ-19​ ແລະ ຜູ້​ເສຍ​ຊີ​ວິດ​ຍ້ອນ​ພະ​ຍາດ​ດັ່ງ​ກ່າວຂອງ​ນະ​ຄອນ​ອູ​ຮັ້ນ ມີ​ຄວາມ​ໝາຍ​ສຳ​ຄັນ​ແນວ​ໃດ?
ຕອບ: ຄວາມ​ປອດ​ໄພ​ດ້ານ​ຊີ​ວິດ ແລະ ສຸ​ຂະ​ພາບ​​ຮ່າງ​ກາຍ ເປັນ​ຄວາມ​ຕ້ອງ​ການ​ພື້ນ​ຖ​ານ​ທີ່​ສຸດ ແລະ ຄວາມ​ປາ​ຖະ​ໜາ​ທົ່ວ​ໄປ​ທີ່​ສຸດ​ຂອງ​ປະ​ຊາ​ຊົນ. ຢູ່​ເບື້ອງຫຼັງ​ຂໍ້​ມູນ​ດັ່ງ​ກ່າວ, ແມ່ນ​ຊີ​ວິດ ແລະ ສຸ​ຂະ​ພາບ​ຂອງ​ປະ​ຊາ​ຊົນ, ແລະ ກໍ​ແມ່ນ​ຊື່​ສຽງ​ຂອງ​ລັດ​ຖະ​ບານ. ການປັບ​​ຕົວ​ເລກ​ຜູ້​ຖືກ​ບົ່​ງ​ມະ​ຕິເປັນ​ພະ​ຍາດ​ໂຄວິດ-19​ ແລະ ຜູ້​ເສຍ​ຊີ​ວິດ​ຍ້ອນ​ພະ​ຍາດ​ດັ່ງ​ກ່າວຂອງ​ນະ​ຄອນ​ອູ​ຮັ້ນ​ຢ່າງ​ທັນ​ການ, ບໍ່​ພຽງ​ແຕ່​ມີ​ຜົນ​ດີ​ຕໍ່​ການ​ປົກ​ປ້ອງ​ສິດ​​ແລະ​ຜົນ​ປະ​ໂຫຍດ​ຂອງ​ປະ​ຊາ​ຊົນ​ໃຫ້​ດີ​ ແລະ ມີ​ຜົນ​ດີ​ຊ່ວຍ​ການ​ຕັດ​ສິນ​ນະ​ໂຍ​ບາຍ​ຕາມຫຼັກ​ວິ​ທະ​ຍາ​ສາດ​ໃນ​ການ​ປ້ອງ​ກັນ​ແລະ​ຄວບ​ຄຸມ​ການ​ແຜ່​ລະ​ບາດ​ຂອງ​ພະ​ຍາດ​ເທົ່າ​ນັ້ນ, ຂະ​ນະ​ດຽວ​ກັນ, ກໍ​ເປັນ​ການ​ຕອບ​ຮັບ​ຕໍ່​ຄວາມ​ເອົາ​ໃຈ​ໃສ່​ຂອງ​ສັງ​ຄົມ ແລະ ຍິ່ງ​ແມ່ນ​ການ​ເຄົາ​ລົບ​ຕໍ່​ທຸກໆ​ຊີ​ວິດ.

error: ເນື້ອຫາໄດ້ຮັບການປົກປ້ອງ !!