ຂ່າວດີ ຄົນຕ່າງປະເທດ ແລະ ຄົນລາວ ທີ່ຢາກເດີນທາງກັບປະເທດ ຍັງມີຄວາມຫວັງ

ທ່ານ ດຣ.ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ໄດ້ໃຫ້ສຳ ພາດຕໍ່ສື່ມວນຊົນ ໃນວັນທີ 31 ສິງຫາ 2020 ຜ່ານມານີ້ວ່າ: ພະຍາດໂຄວິດ-19 ແມ່ນຍັງມີການລະ ບາດຢູ່ຫລາຍປະເທດທົ່ວໂລກ, ເຊິ່ງເຮັດໃຫ້ຫລາຍໆປະເທດຍັງປິດປະເທດຂອງຕົນຢູ່ ເພື່ອປ້ອງກັນ ແລະ ຄວບຄຸມເຊື້ອພະຍາດດັ່ງກ່າວ ບໍ່ໃຫ້ມັນລະບາດໃນຮອບໃໝ່ອີກຄັ້ງ. ການປິດປະເທດຂອງລາວເຮົາ ບໍ່ໄດ້ໝາຍຄວາມຈະປິດແບບເຂົ້າ-ອອກ ບໍ່ໄດ້ເລີຍ, ເຊິ່ງຫລາຍປະເທດ ໄດ້ມີການຊອກຫາຊ່ອງທາງໃຫ້ມີການຜ່ອນຜັນໃຫ້ມີການດຳເນີນທຸລະກິດ ແລະ ການໄປມາຫາສູ່ໃຫ້ປົກກະຕິດີຂຶ້ນ.

ສະນັ້ນ,ຈຶ່ງມີຄຳແນະນຳຂອງຄະນະສະເພາະກິດວ່າ: ໃນກໍລະນີທີ່ມີຄວາມຈຳເປັນ ແລະ ຮີບດ່ວນນີ້ ຈຶ່ງຕ້ອງຮັກສາຖ້ຽວບິນມະນຸດສະທຳນີ້ໄວ້ ເນື່ອງຈາກວ່າຍັງມີນັກສຶກສາລາວ, ພະນັກງານຄົນລາວທີ່ໄປຝຶກອົບ ຮົມ, ໄປສຶກສາຢູ່ຕ່າງປະເທດ ເວລາເຂົາຈົບຫລັກສູດແລ້ວ ອັດຕາເບ້ຍລ້ຽງຕ່າງໆກໍຖືກຕັດ, ບ່ອນພັກບ່ອນເຊົາກໍບໍ່ໄດ້ມີແລ້ວ ເຂົາເຈົ້າຈະຢູ່ຈະກິນແນວໃດ. ສະນັ້ນ, ຈຶ່ງມີຄວາມຈຳເປັນທີ່ຈະຕ້ອງກັບຄືນປະເທດ ລວມເຖິງຜູ້ທີ່ໝົດໄລຍະປະຈຳການຢູ່ ສປປ ລາວ ຂອງພວກເຮົາ ໂດຍສະເພາະແມ່ນບັນດານັກການທູດ, ພະນັກງານຜູ້ຊ່ຽວຊານຕ່າງໆ ໝົດໄລຍະປະຈຳການ ເຂົາເຈົ້າກໍ່ຈະກັບຄືນປະເທດ ຫລື ໄປປະຈຳການບ່ອນໃໝ່.

ຖ້ຽວບິນມະນຸດສະທຳນີ້ ແມ່ນຂອງອົງການສະຫະປະຊາຊາດ ທີ່ໄດ້ມີແຈ້ງການ ແລະ ຄຳສະ ເໜີຈາກສະຫະປະຊາຊາດເຖິງລັດຖະບານລາວ, ເຊິ່ງຖ້ຽວບິນດັ່ງກ່າວແມ່ນຍັງສືບຕໍ່ປະຕິບັດ ໂດຍທີ່ມີມາດຕະການຄວບຄຸມຢ່າງເຂັ້ມງວດທີ່ສຸດໃນການປ້ອງກັນ ການຕິດເຊື້ອໂຄວິດ-19. ໂດຍໄດ້ເປີດຊ່ອງທາງໃຫ້ບັນດານັກການທູດ, ຄົນລາວ ຫລື ຄົນຕ່າງປະເທດທີ່ຍັງຕົກຄ້າງຢູ່ຕ່າງປະເທດຢາກເຂົ້າມາ ສ ປປ ລາວ ແລະ ຢາກອອກຈາກ ສປປ ລາວ, ເຊິ່ງປະຈຸບັນ ແມ່ນເປີດໃຫ້ບໍລິການໜຶ່ງອາທິດຕໍ່ຖ້ຽວ.

ທ່ານ ກ່າວຕື່ມວ່າ: ສໍາລັບຖ້ຽວບິນ ສປປ ລາວ ກັບ ສປ ຈີນ ກໍເຊັ່ນດຽວກັນແມ່ນລັດຖະບານເປີດໃຫ້ຊ່ອງທາງ ທາງດ້ານທຸລະກິດ, ໂຄງການໃຫຍ່ໆຂອງລັດຖະບານ ແລະ ກິດຈະກຳທຸລະກິດໃຫຍ່ໆທີ່ຈະຕ້ອງເປີດດຳເນີນງານ ເພາະວ່າການຂົນສົ່ງສິນຄ້າຕ່າງໆບໍ່ໄດ້ປິດ ຍັງໄປມາໄດ້ຢູ່. ຄັນຊັ້ນ ນັກທຸລະກິດ, ຜູ້ຊ່ຽວຊານ ໂຄງການໃຫຍ່ໆເຂົາເຈົ້າຕ້ອງໄດ້ດຳເນີນການໄປຢູ່ຈັ່ງຊັ້ນ ພວກເຮົາກໍໄດ້ອະ ນຸມັດໃຫ້ມີຖ້ຽວບິນ ເພື່ອຂົນສົ່ງເອົາຜູ້ຊ່ຽວຊານ, ນັກວິຊາການໃນໂຄງການໃຫຍ່ໆເຂົ້າມາໃນ ສປປ ລາວ ໂດຍປະຕິບັດມາດຕະການຄວບຄຸມການລະບາດ, ຄວບຄຸມການຕິດເຊື້ອຢ່າງເຂັ້ມງວດ ໃນການກວດຫາເຊື້ອ, ໃນການຈຳກັດບໍລິເວນ ໂດຍໝັ້ນໃຈວ່າບໍ່ຕິດເຊື້ອແລ້ວຈຶ່ງໃຫ້ເຂົາເຈົ້າໄປເຮັດວຽກຢູ່ໃນໂຄງການ ຫລື ກິດຈະກຳຕ່າງໆໄດ້.

ຂ່າວ: ໜັງສືພິມລາຍວັນລາວພັດທະນາ

error: ເນື້ອຫາໄດ້ຮັບການປົກປ້ອງ !!