ຄົນລາວເສຍຊີວິດຍ້ອນພະຍາດເອດ 4,760 ຄົນ ໃນ 30ປີຜ່ານມາ

ຄະນະກໍາມະການແຫ່ງຊາດຕ້ານເອດ ແຈ້ງໃຫ້ຮູ້ວ່າ: ຜູ້ຕິດເຊື້ອ ເຮສໄອວີ ແລະ ພະຍາດເອດຢູ່ລາວ ແມ່ນພົບຢູ່ນະຄອນຫລວງວຽງຈັນ ແລະ ທຸກໆແຂວງໃນຂອບເຂດທົ່ວປະເທດ, ນັບແຕ່ປີ 1990 ຫາເດືອນມິຖຸນາ 2020 ໂດຍມີຈໍານວນຕົວຢ່າງເລືອດທີ່ມາກວດ 987,494 ຄົນ, ພົບຈໍານວນທີ່ຕິດເຊື້ອເຮສໄອວີ 14,460 ຄົນ, ຈໍານວນຜູ້ຕິດເຊື້ອທີ່ຍັງມີຊີວິດ 9,700 ຄົນ ແລະ ຈໍານວນທີ່ເປັນພະຍາດເອດ 5,912 ຄົນ, ມີຜູ້ເສຍຊີວິດແລ້ວ 4,760 ຄົນຍ້ອນພະຍາດເອດ. ຄະນະກໍາມະການແຫ່ງຊາດຕ້ານເອດ ແຈ້ງໃຫ້ຮູ້ຕື່ມອີກວ່າ: ລາວພົບຜູ້ຕິດເຊື້ອ ເຮສໄອວີ ກໍລະນີທໍາອິດໃນປີ 1990 ແລະ ພົບຜູ້ເປັນພະຍາດເອດກໍລະນີທໍາອິດໃນປີ 1992. 

ຄະນະກໍາມະການແຫ່ງຊາດຕ້ານເອດ ແຈ້ງໃຫ້ຮູ້ຕື່ມວ່າ: ສະເພາະນັບແຕ່ເດືອນມັງກອນ ຫາ ເດືອນມິຖຸນາ 2020 ໄດ້ມີຈໍານວນທີ່ໄດ້ຮັບພະຍາດຕິດຕໍ່ທາງເພດສໍາພັນ ໃນຂອບເຂດທົ່ວປະເທດ ລວມມີ 101,232 ຄົນ, ຊຶ່ງຈໍານວນທີ່ອອກອາການສະແດງຂອງພະຍາດຕິດຕໍ່ທາງເພດສໍາພັນ 10,185 ຄົນ. ນັບແຕ່ນີ້ຮອດ 2025, ຄາດໝາຍສູ້ຊົນຈະເຮັດໃຫ້ອັດຕາຕິດເຊື້ອ ເຮສໄອວີ ໃນກຸ່ມປະຊາກອນທົ່ວໄປໃຫ້ຢູ່ໃນລະດັບຕໍ່າກວ່າ 0,15%, ອັດຕາການຕິດເຊື້ອເຮສໄອວີໃນກຸ່ມສາວບໍລິການ ໜ້ອຍກວ່າ 1%, ອັດຕາການຕິດເຊື້ອເຮສໄອວີ ໃນກຸ່ມຮັກຮ່ວມເພດ ຊາຍກັບຊາຍ ໜ້ອຍກວ່າ2%.

ຂ່າວ: ວຽງຈັນທາຍ

error: ເນື້ອຫາໄດ້ຮັບການປົກປ້ອງ !!