ຊາຍໜຸ່ມຈີນເມົາ ກືນກິນບ່ວງ ຕິດຄາຫຼອດອາຫານບໍ່ເອົາອອກມາດົນເຖິງ 1 ປີ

ເມື່ອວັນທີ່ 25 ຕຸລາ ສື່ອອນລາຍປະເທດຈີນລາຍງານເລື່ອງລາວຊວນອຶ້ງຂອງຊາຍຫນຸ່ມຊາວຈີນ ອາຍຸ 26 ປີ ຄົນຫນຶ່ງ ໃນເມືອງອຸລຸມະຊີ ເຂດປົກຄອງຕົນເອງຊິນຈຽງອຸຍກູຣ ທາງຕາວັນຕົກສຽງເຫນືອຂອງຈີນ ທີ່ເມື່ອປີ 1 ກ່ອນ ໄດ້ໄປດື່ມເຫລົ້າກັບໝູ່ເພື່ອນ ແລ້ວພະນັນກັນກືນບ່ວງ ເຊິ່ງລາວໃຊ້ເຊືອກມັດຕິດທີ່ປາຍບ່ວງໄວ້ ແລ້ວຄ່ອຍໆກືນບ່ວງນັ້ນລົງຄໍໄປ ແຕ່ປາກົດວ່າເກີດເຫດບໍ່ຄາດຝັນລາວດຶງກັບມາໄດ້ພຽງແຄ່ເຊືອກ ສ່ວນຕົວບ່ວງຫລຸດເຂົ້າໄປໃນທ້ອງຂອງລາວແລ້ວ

ເຖິງວ່າຈະກັງວົນຢູ່ແດ່ແຕ່ຮ່າງກາຍຂອງລາວກໍ່ເປັນປົກກະຕິດີທຸກຢ່າງ ບໍ່ວ່າຈະກິນ ຫລື ດື່ມ ຫຍັງກໍ່ລ້ວນແລ້ວແຕ່ບໍ່ມີສິ່ງຜິດປົກກະຕິ ລາວຈຶ່ງບໍ່ໄປໂຮງໝໍ ແລະ ໃຊ້ຊີວິດໂດຍທີ່ມີບ່ວງຄັນນັ້ນຢູ່ໃນທ້ອງ ບ່ວງຂະຫນາດ 8 ນິ້ວ ຕິດຄ້າງຢູ່ໃນຮ່າງກາຍ ເມື່ອໄວໆນີ້ລາວບັງເອີນ ຖືກຄົນຕໍາເຂົ້າທີ່ບໍລິເວນຫນ້າເອິກ ແລ້ວເກີດອາການເຈັບ ແລະ ຫາຍໃຈລໍາບາກ ຈົນໃນທີ່ສຸດກໍ່ຕ້ອງໄປໂຮງໝໍ

ອະວີ໋ ຊີອູ່ ທ່ານໝໍຮອງຫົວຫນ້າແຜນຫູ, ຄໍ, ດັງ ກ່າວວ່າ ຕອນທີ່ຄົນໄຂ້ມາຮອດໂຮງໝໍ ກໍ່ພົບວ່າຫລອດອາຫານເກີດການຕິດເຊື້ອແລ້ວ ຈຶ່ງເຮັດໃຫ້ເຂົາຮູ້ສຶກເຈັບກືນອາຫານ ແລະ ຫາຍໃຈລໍາບາກ ໂດຍແພດໄດ້ເອົາບ່ວງຄັນນັ້ນອອກມາແລ້ວ ຕອນນີ້ຄົນໄຂ້ກໍາລັງພັກຟື້ນເຊິ່ງເປັນໄປໄດ້ດີ ບໍ່ມີອາການເຈັບຫາຍໃຈໄດ້ດີຂຶ້ນ ແລະ ກິນອາຫານໄດ້ງ່າຍແລ້ວ.

error: ເນື້ອຫາໄດ້ຮັບການປົກປ້ອງ !!