ສະພາແຫ່ງຊາດ ຮັບຮອງເອົາການປັບປຸງບາງມາດຕາ ຂອງ 2 ກົດໝາຍ

ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ VIII ໃນວັນທີ 1 ກໍລະກົດ 2020 ພາຍໃຕ້ການເປັນປະທານ ຂອງທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ, ເຊິ່ງບັນດາ ສະມາຊິກສະພາແຫ່ງຊາດ (ສສຊ) ໄດ້ພ້ອມກັນສຸມໃສ່ພິຈາລະນາ, ປະກອບຄຳຄິດຄຳເຫັນດ້ວຍຄວາມຮັບຜິດຊອບສູງຢ່າງກົງໄປກົງມາ ແລະ ໄດ້ຮັບຮອງເອົາກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍນ້ຳ ແລະ ຊັບພະຍາກອນນ້ຳ ແລະ ກົດໝາຍວ່າດ້ວຍການປົກປັກຮັກສາສິ່ງແວດລ້ອມ ດ້ວຍຄະແນນສຽງເຫັນດີເປັນສ່ວນຫລາຍ.

ໂອກາດນີ້, ທ່ານ ບຸນປອນ ບຸດຕະນະວົງ ໄດ້ສະຫລຸບສັງລວມ ການປະກອບຄຳຄິດຄຳເຫັນຂອງບັນດາ ສສຊ ຕໍ່ຮ່າງກົດໝາຍດັ່ງກ່າວ, ເຊິ່ງໂດຍລວມແລ້ວ ສະມາຊິກສະພາສະພາແຫ່ງຊາດ ແຕ່ລະເຂດເລືອກຕັ້ງ ແມ່ນເຫັນດີເປັນເອກະພາບ ໂດຍພື້ນຖານທາງດ້ານເນື້ອໃນ ແລະ ຫລັກການໃນການປັບປຸງກົດໝາຍດັ່ງກ່າວ, ແຕ່ເພື່ອເຮັດໃຫ້ຮ່າງກົດໝາຍດັ່ງກ່າວມີເນື້ອໃນລະອຽດ, ຈະແຈ້ງ, ຄົບຖ້ວນ ແລະ ຮັດກຸມຂຶ້ນກວ່າ ເຊິ່ງ ສສຊ ກໍໄດ້ສຸມໃສ່ປະກອບຄຳເຫັນບາງບັນຫາສຳຄັນໃນແຕ່ລະມາດຕາ ຕາມການເຈາະຈີ້ມຂອງປະທານກອງປະຊຸມ ເປັນຕົ້ນແມ່ນເນື້ອໃນຂອງການປັບປຸງໃນມາດຕາ 34 ແລະ 35 ຂອງກົດໝາຍວ່າດ້ວຍນ້ຳ ແລະ ຊັບພະຍາກອນນ້ຳ ເຊິ່ງການປັບປຸງດັ່ງກ່າວ ໃຫ້ມີຄວາມເໝາະສົມ ແລະ ສອດຄ່ອງ, ຖືກຕ້ອງ ໃນການຄຸ້ມຄອງ ແລະ ນຳໃຊ້ຕົວຈິງ, ການປັບປຸງເນື້ອໃນມາດຕາ 18 ແລະ 19 ຂອງກົດໝາຍວ່າດ້ວຍການປົກປັກຮັກສາສິ່ງແວດລ້ອມ ໃຫ້ມີຄວາມເໝາະສົມ ແລະ ສອດຄ່ອງກັບກົດໝາຍທີ່ກ່ຽວຂ້ອງ ເປັນຕົ້ນແມ່ນກົດໝາຍທີ່ດິນ ສະບັບປັບປຸງປີ 2019.

ເມື່ອກົດໝາຍສະບັບດັ່ງກ່າວ ໄດ້ຖືກຮັບຮອງ ແລະ ປະກາດໃຊ້ແລ້ວ ຈະເປັນບ່ອນອີງ, ໃນການຄົ້ນຄວ້າ, ໃນການວາງແຜນ, ການຈັດຕັ້ງປະຕິບັດວຽກງານນ້ຳ ແລະ ຊັບພະຍາກອນນ້ຳ ແລະ ວຽກງານການປົກປັກຮັກສາສິ່ງແວດລ້ອມ ໃຫ້ມີຄວາມສອດຄ່ອງ ແລະ ແທດເໝາະກັບການຈັດຕັ້ງປະຕິບັດວຽກງານຕົວຈິງ.
ຂ່າວ: ສົມຫວັງ ຂປລ
ພາບ: ເກດສະໜາ

error: ເນື້ອຫາໄດ້ຮັບການປົກປ້ອງ !!