ໃນໄລຍະໂຄວິດ-19 ລະບາດ ປະຊາຊົນລາວ ຈະຫວ່າງງານຫລາຍຂຶ້ນ ແລະ 1 ແສນກວ່າຄົນ ຈະກາຍເປັນຜູ້ທຸກຍາກຕື່ມອີກ

ໃນວັນທີ 30 ມິຖຸນາ 2020, ທີ່ນະຄອນຫລວງວຽງຈັນ ກົມພັດທະນາຊົນນະບົດ ແລະ ສະຫະກອນ ໄດ້ຈັດກອງປະຊຸມປຶກສາຫາລື ກ່ຽວກັບການຮັບມືຜົນກະທົບ ຂອງພະຍາດໂຄວິດ-19 ຕໍ່ຄວາມທຸກຍາກຢູ່ຊົນນະບົດ ໂດຍການເຂົ້າຮ່ວມຂອງ ທ່ານ ລຽນ ທິແກ້ວ ລັດຖະມົນຕີ ກະຊວງກະສິກຳ ແລະ ປ່າໄມ້, ມີ ທ່ານ ຈິດ ທະວີໄສ ຜູ້ອຳນວຍການກອງທຶນ ຫລຸດຜ່ອນຄວາມທຸກຍາກ, ກະຊວງກະສິກຳ ແລະ ປ່າໄມ້ ແລະ ບັນດາຫົວໜ້າກົມ-ຮອງກົມ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມຄັ້ງນີ້, ຈັດຂຶ້ນເພື່ອເຮັດໃຫ້ບັນດາ ຂະແໜງການຕ່າງໆ ມີຄວາມເຂົ້າໃຈອດີຂຶ້ນກວ່າເກົ່າ ກ່ຽວກັບສະພາບການກະທົບ ໃສ່ຄວາມທຸກຍາກຢູ່ຊົນນະບົດ, ລະດົມຄວາມຄິດກ່ຽວກັບທິດທາງ ວິທີການ ໃນການຮັບມືສະກັດກັ້ນແກ້ໄຂ ແລະ ໄດ້ຮັບຜົນດີ.

ໃນໂອກາດດັ່ງກ່າວ, ທ່ານ ລຽນ ທິແກ້ວ ໄດ້ກ່າວວ່າ: ເຖິງວ່າ ສປປ ລາວ ໄດ້ມີຜົນສໍາເລັດໃນການຮັບມື ກັບການລະບາດ ຂອງພະຍາດນັ້ນກໍ່ຕາມ, ແຕ່ຜົນກະທົບທາງເສດຖະກິດຍັງໜັກໜ່ວງ ໂດຍສະເພາະແມ່ນ ການລະບາດ ຂອງພະຍາດ ໄດ້ເຮັດໃຫ້ຄວາມທຸກຍາກເພີ່ມຂຶ້ນ ຄືກັນກັບບັນດາປະເທດໃນໂລກ. ຕາມການປະເມີນ ຂອງອົງການສາກົນ ເຫັນວ່າ ໂດຍລວມແລ້ວ ປະຊາຊົນລາວ 120.000 ກວ່າຄົນ ຈະກາຍເປັນຜູ້ທຸກຍາກຕື່ມອີກ ລວມທັງຢູ່ ຕົວເມືອງ ແລະ ຊົນນະບົດ; ອັນພົ້ນເດັ່ນແມ່ນ ບັນຫາວຽກເຮັດງານທໍາ ທີ່ເກີດຈາກການປິດວິສະຫະກິດ, ຫ້າງຮ້ານ, ຫົວໜ່ວຍທຸລະກິດ ຢູ່ຕົວເມືອງ ເຮັດໃຫ້ແຮງງານຕ້ອງກັບຄືນບ້ານ ເຊັ່ນດຽວກັນກັບການກັບຄືນ ບ້ານຂອງແຮງງານລາວ ຈາກປະເທດໄທ, ເຊິ່ງທັງສອງພາກສ່ວນນີ້ລວມເຂົ້າ ຄາດວ່າມີຫລາຍກວ່າແສນຄົນ ທີ່ເຂົາເຈົ້າເຄີຍສົ່ງ ເງິນລ້ຽງຄອບຄົວຂອງຕົນ ແຕ່ດຽວນີ້ກາຍມາເປັນຄົນຫວ່າງງານ ກັບຄືນບ້ານ ສ່ວນໃຫ່ຍຢູ່ເຂດຊົນນະບົດ ທີ່ຍັງທຸກຍາກ. ດ້ວຍເຫດນັ້ນ,ຈຶ່ງຄາດຄະເນວ່າ ຢູ່ຊົນນະບົດຈະມີຄວາມທຸກຍາກ ເພີ່ມຂຶ້ນຫລາຍກວ່າຢູ່ຕົວເມືອງ ເຖິງຢ່າງໃດກໍ່ດີແຮງງານດັ່ງກ່າວ, ກໍ່ສາມາດກາຍເປັນກໍາລັງແຮງທີ່ສໍາຄັນ ໃນການຜະລິດກະສິກໍາ ແລະ ພັດທະນາຊົນນະບົດ ໃນສະເພາະໜ້າ ແລະ ຍາວນານ ກົງກັນຂ້າມຖ້າພວກເຮົາບໍ່ມີ ແຜນການການໂຄງການຊຸກຍູ້ຢ່າງເໝາະສົມ ກໍ່ຈະເຮັດໃຫ້ກາຍເປັນບັນຫາ ເສດຖະກິດສັງຄົມລວມ ທັງເກີດປະກົດການຫຍໍ້ທໍ້ທາງສັງຄົມຕ່າງໆ ຢູ່ຊົນນະບົດ ທີ່ເປັນເປົ້າໝາຍບູລິມະສິດ ຂອງການພັດທະນາ ຂອງພວກເຮົາໃນປັດຈຸບັນ. ດັ່ງນັ້ນ, ລັດຖະ ບານຈຶ່ງໄດ້ມີ 10 ນະໂຍບາຍ ແລະ 9 ມາດຕະການ ແກ້ໄຂຜົນກະທົບຂອງ ການລະບາດພະຍາດ ຕໍ່ເສດຖະກິດສັງຄົມ; ສໍາລັບ ກະຊວງກະສີກໍາ ແລະ ປ່າໄມ້ ກໍ່ໄດ້ມີທິດທາງລວມ ປຸກລະດົມກໍາລັງແຮງ ສັງລວມພາຍໃນຊາດ, ຂຸດຄົ້ນທຸກຄວາມສາມາດບົ່ມຊ້ອນທີ່ມີ, ຫັນວິກິດໃຫ້ເປັນໂອກາດ ເພື່ອຮັບປະກັນຄວາມໝັ້ນຄົງ ດ້ານສະບຽງອາຫານ ໃຫ້ມີຄວາມໜັກແໜ້ນ, ຜະລິດສິນຄ້າເພື່ອບໍລິໂພກພາຍໃນ ໃຫ້ໄດ້ໂດຍພື້ນຖານ, ຍູ້ແຮງການຜະລິດສິນຄ້າ ທີ່ເປັນທ່າແຮງຕາມທິດກະສິກໍາ ສະອາດ ເພື່ອສົ່ງອອກຢ່າງແຂງແຮງ, ປະກອບສ່ວນສ້າງວຽກເຮັດງານທໍາ ໃຫ້ແກ່ຊາວກະສິກອນແຮງງານລາວ ທີ່ກັບມາຈາກຕ່າງປະເທດ ທີ່ຍັງຫວ່າງງານ, ປະກອບສ່ວນເຂົ້າໃນການຂະຫຍາຍຕົວຂອງເສດຖະກິດແຫ່ງຊາດ ສົມທົບກັບມາດຕະການຂອງແຮງງານ ແລະ ສະຫວັດດີການສັງຄົມ ກໍ່ຄືຂະແໜງອື່ນໆ ເພື່ອຊ່ວຍເຫລືອຜູ້ປະກອບການ, ຜູ້ອອກແຮງງານລາວ ແລະ ຜູ້ດ້ອຍໂອກາດທີ່ທຸກຍາກ ທີ່ໄດ້ຮັບຜົນກະທົບ ຈາກການລະບາດຂອງພະຍາດ.

ທ່ານ ລຽນ ທິແກ້ວ ກ່າວຕື່ມວ່າ: ເພື່ອເປັນການປະສານສົມທົບ ບັນດານະໂຍບາຍ ແລະ ມາດຕະການຕ່າງໆ ໃຫ້ມີຄວາມເອກະພາບ ເປັນລວງດຽວກັນ ກອງປະຊຸມໃນຄັ້ງນີ້, ກະຊວງກະສິກໍາ ແລະ ປ່າໄມ້ ທີ່ຮັບຜິດຊອບວຽກງານພັດທະນາ ຊົນນະບົດລຶບລ້າງຄວາມທຸກຍາກ ຈຶ່ງໄດ້ຈັດກອງປະຊຸມ ເພື່ອປຶກສາຫາລື ແລກປ່ຽນຂໍ້ມູນຂ່າວສານ ທາງດ້ານນະໂຍບາຍມາດຕະການ, ເພີ່ມທະວີການປະສານງານກັນໃນການແກ້ໄຂບັນຫາດັ່ງກ່າວ ໂດຍສະເພາະແມ່ນ ສະກັດກັ້ນບໍ່ໃຫ້ຄວາມທຸກຍາກໃນຕົວເມືອງ ກໍ່ຄືຊົນນະບົດເພີ່ມຂຶ້ນ ສ້າງເງື່ອນໄຂພື້ນຖານອັນດີ ໃຫ້ແກ່ລະດົມແຫລ່ງທຶນ ເຂົ້າໃສ່ບັນດາໂຄງການຈັດຕັ້ງປະຕິບັດເປົ້າໝາຍ ການພັດທະນາແບບຍືນຍົງ ໂດຍສະເພາະແມ່ນລຶບລ້າງ ຄວາມທຸກຍາກແຕ່ນີ້ ຫາ ປີ 2030 ໃຫ້ບັນລຸຕາມຄາດໝາຍທີ່ວາງອອກ.

ຂ່າວ ສົມຫວັງ ຂປລ

error: ເນື້ອຫາໄດ້ຮັບການປົກປ້ອງ !!