ນະຄອນປັກກິ່ງ ສັ່ງປິດໂຮງຮຽນອີກຄັ້ງ ຫຼັງໂຄວິດ-19 ລະບາດອີກຮອບ

ສຳນັກຂ່າວຕ່າງປະເທດລາຍງານເມື່ອວັນທີ່ 17 ມິຖຸນາ 2020 ວ່າ ຄະນະກຳມະທິການສາທາລະນະສຸກແຫ່ງຊາດຂອງຈີນລາຍງານສະຖານະການລາຍວັນຂອງພະຍາດໂຄວິດ-19 ໃນປະເທດວ່າຜູ້ເສຍຊີວິດຍັງຄົງຢູ່ທີ່ຢ່າງນ້ອຍ 4,634 ຄົນ ແລະຍັງມີຜູ້ປ່ວຍຢູ່ໃນລະບົບອີກຢ່າງນ້ອຍ 252 ຄົນ ໂດຍ 5 ຄົນຍັງມີອາການຢູ່ໃນຂັ້ນວິກິດ

ຢ່າງໃດກໍ່ຕາມ ຈຳນວນຜູ້ປ່ວຍສະສົມເພີ່ມເປັນຢ່າງນ້ອຍ 83,265 ຄົນ ຫລັງໃນຮອບ 24 ຊົ່ວໂມງທີ່ຜ່ານມາມີການຢືນຢັນຜູ້ຕິດເຊື້ອລາຍໃຫ່ມ 44 ຄົນ ແບ່ງເປັນຜູ້ທີ່ເດີນທາງມາຈາກຕ່າງປະເທດ 11 ຄົນ ແລະອີກ 33 ຄົນເປັນການຕິດເຊື້ອພາຍໃນປະເທດ ສຳລັບກຸ່ມຜູ້ຕິດເຊື້ອພາຍໃນປະເທດຢູ່ທີ່ມົນທົນເຫີເປີ່ຍ 1 ຄົນ ມົນທົນເຈີ້ຈຽງ 1 ຄົນ ແລະອີກ 31 ຄົນທີ່ເຫລືອຢູ່ໃນເຂດເທດສະບານນະຄອນປັກກິ່ງ ຊື່ງຜູ້ຕິດເຊື້ອທຸກຄົນມີຄວາມເຊື່ອມໂຍງກັບຕະຫລາດຊິນຟາຕີ້ ສູນກາງການຄ້າສົ່ງອາຫານສົດຂະຫນາດໃຫ່ຍທີ່ສຸດໃນເມືອງຫຼວງ ເພີ່ມຈຳນວນຜູ້ຕິດເຊື້ອສະສົມໃນກຸ່ມນີ້ເປັນຢ່າງຫນ້ອຍ 137 ຄົນ ນັບຕັ້ງແຕ່ວັນທີ່ 11 ມິຖຸນາ ທີ່ຜ່ານມາ

ຂະນະທີ່ເທດສະບານນະຄອນປັກກິ່ງຍົກລະດັບການເຕືອນໄພດ້ານສາທາລະນະສຸກເປັນລະດັບ 2 ຖືເປັນຂັ້ນຮອງສູງສຸດຈາກທັງຫມົດ 4 ຂັ້ນ ແລະເຕືອນປະຊາຊົນວ່າສະຖານະການການແຜ່ລະບາດຂອງພະຍາດໂຄວິດ-19 ໃນພື້ນທີ່ຄັ້ງນີ້ ຮຸນແຮງທີ່ສຸດ ນັບຕັ້ງແຕ່ເດືອນກຸມພາທີ່ຜ່ານມາ ໂດຍທາງການກັກບໍລິເວນຊຸມຊົນທີ່ຢູ່ອາໃສແລ້ວ 27 ແຫ່ງ ສ່ວນໃຫ່ຍຢູ່ທີ່ເຂດເຟິງໄທ່ຊື່ງເປັນທີ່ຕັ້ງຂອງຕະຫລາດຊິນຟາຕີ້ ຊື່ງຊຸມຊົນທີ່ຢູ່ໃກ້ກັບຕະຫລາດຫລາຍທີ່ສຸດໄດ້ຮັບການຈັດໃຫ້ເປັນ ພື້ນທີ່ຄວາມສ່ຽງສູງ ຫ້າມປະຊາຊົນເຂົ້າ ແລະອອກ ຫາກບໍ່ມີທຸລະຈຳເປັນຍິ່ງ ດ້ານໂຮງຮຽນທຸກລະດັບທົ່ວນະຄອນປັກກິ່ງຕ້ອງປິດຮຽນອີກຄັ້ງ ທັງທີ່ຫາກໍ່ເປີດເມື່ອທ້າຍເດືອນເມສາທີ່ຜ່ານມາ

ທັງນີ້ ນອກຈາກຕະຫລາດຊິນຟາຕີ້ຕ້ອງປິດຢ່າງບໍ່ມີກຳນົດແລ້ວ ເພາະກາຍເປັນຈຸດແພ່ເຊື້ອແຫ່ງໃຫ່ມ ຕະຫລາດສົດ ແລະຕະຫລາດສົ່ງສິນຄ້າໃນນະຄອນປັກກິ່ງອີກປະມານ 10 ແຫ່ງຖືກສັ່ງປິດດ້ວຍ ຂະນະດຽວກັນ ເຈົ້າຫນ້າທີ່ສາທາລະນະສຸກລົງພື້ນທີ່ກວດສອບຕະຫລາດສົດໃນນະຄອນປັກກິ່ງແລ້ວ 276 ແຫ່ງ ແລະຮ້ານອາຫານທຸກປະເພດອີກປະມານ 33,000 ແຫ່ງ ພ້ອມທັງມີການສີດຢາຂ້າເຊື້ອ ແລະເກັບຂໍ້ມູນຢ່າງລະອຽດ

error: ເນື້ອຫາໄດ້ຮັບການປົກປ້ອງ !!