ເຈົ້າໜ້າທີ່ຈັບພໍ່ຄ້າຂາຍເຄື່ອງອອນລາຍ ຕົ້ມຕຸນເງິນຫຼາຍກວ່າ 90 ລ້ານກີບ

ໃນວັນທີ 17 ພຶດສະພາ 2020 ເຈົ້າໜ້າທີ່ ປກສ ເມືອງຫາດຊາຍຟອງ ໄດ້ຮັບແຈ້ງຄວາມຈາກຜູ້ເສຍຫາຍຄື ທ້າວ ນະລັນ (ໂຈ ) ອາຍຸ 24 ປີ ບ້ານ ອານຸ ເມືອງຈັນທະບູລີ ແລະ ນາງ ກະຕ່າຍ ອາຍຸ 19 ປີ ຢູ່ບ້ານ ພັດທະນາ ເມືອງນາຊາຍທອງ ນວ ວ່າທັງສອງຄົນຖືກສໍ້ໂກງຊັບຈາກ ທ້າວບຸນໄທ ອາຍຸ25 ປີ ບ້ານໜອງແວງ ເມືອງຫາດຊາຍຟອງ ນະຄອນຫຼວງວຽງຈັນ

ດ້ວຍຮູບການໂຄສະນາສິນຄ້າທາງເຟດບຸກເມື່ອສັ່ງຊື້ ແລະ ໂອນເງິນໃຫ້ແລ້ວພັດບໍ່ສົ່ງສິນຄ້າຕາມທີ່ສັ່ງຊື້ ພາຍຫຼັງໄດ້ຮັບການແຈ້ງຄວາມໃນວັນດຽວກັນ ເຈົ້າໜ້າທີ່ກຳລັງວິຊາສະເພາະ ກໍ່ໄດ້ຕິດຕາມກັກຕົວເອົາ ທ້າວ ບຸນໄທ ຢູ່ເຮືອນຜູ້ກຽ່ວມາດໍາເນີນສືບສວນ-ສອບສວນ.

ຜ່ານການສອບສວນ ທ້າວບຸນໄທ ໄດ້ຮັບສາລະພາບວ່າ: ຕົນເອງໄດ້ສໍ້ໂກງຊັບ ທ້າວນະລັນ ແລະ ນາງກະຕ່າຍແທ້ ດ້ວຍຮູບການໂຄສະນາຂາຍສິນຄ້າລົງທາງເຟສບຸກສ່ວນຕົວ ແລະ ກຸ່ມຄ້າຂາຍເຄື່ອງທາງອອນລາຍ ເພື່ອຕົວະຍົວະຂາຍສິນຄ້າໃຫ້ຄົນທົ່ວໄປ;ສຳລັບສິນຄ້າທີ່ຜູ່ກຽວໂຄສະນາຂາຍທາງອອນລາຍ ແມ່ນເປັນປະເພດຄອມພິວເຕີ ຕັ້ງໂຕະ;

ເຊິ່ງມີລາຄາເລີ່ມຕົ້ນແຕ່ 2 ລ້ານກີບເຖິງ 4 ລ້ານກີບ ໂດຍໃຫ້ລູກຄ້າໂອນເງິນເຂົ້າບັນຊີຜ່ານທະນາຄານກ່ອນທຸກຄັ້ງ.ແຕ່ພໍຮອດມື້ສົ່ງສິນຄ້າຕົນເອງກໍ່ໃຊ້ຮູບການຂໍເລື່ອນໄປເລື້ອຍໆ ເພາະບໍ່ມີສິນຄ້າ ທີ່ຈະນຳສົ່ງໃຫ້ລູກຄ້າ, ລວມທັງໝົດມີ 30 ຄົນ ແລະ ໄດ້ເງິນຈຳນວນ 90 ລ້ານກວ່າກີບ. ສໍາລັບເງິນຈຳນວນດັ່ງກ່າວຜູ້ກ່ຽວແມ່ນໄດ້ເອົາໄປໃຊ້ຈ່າຍຫຼິ້ນການພະນັນທາງອອນລາຍຈົນໝົດ.

ທີ່ມາ:ປ້ອງກັນຄວາມສະຫງົບນະຄອນຫຼວງວຽງຈັນ

error: ເນື້ອຫາໄດ້ຮັບການປົກປ້ອງ !!