ສຳເລັດແລ້ວ 50% ຂົວຂ້າມນ້ຳຂອງແຂວງບໍ່ແກ້ວ-ໄຊຍະບູລີ

ເມື່ອບໍ່ດົນມານີ້, ທ່ານ ວຽງສະຫວັດ ສີພັນດອນ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ໄດ້ລົງຕິດຕາມຄວາມຄືບໜ້າໂຄງການກໍ່ສ້າງຂົວຂ້າມນໍ້າຂອງ ຢູ່ເຂດບ້ານກ້ອນຕື່ນ-ຫ້ວຍແກ້ວທີ່ນອນໃນເສັ້ນທາງຫຼວງ ຂອງແຂວງບໍ່ແກ້ວ ໝາຍເລກ 2243, ຊຶ່ງມາຮອດປັດຈຸບັນສຳເລັດແລ້ວປະມານ 50% ເພື່ອເຊື່ອມຈອດລະຫວ່າງບ້ານ ກ້ອນຕື່ນ-ຫ້ວຍແກ້ວ ເມືອງປາກທາ ແລະ ເມືອງຄອບ ແຂວງໄຊຍະບູລີ, ໃນມູນຄ່າການ ກໍ່ສ້າງທັງໝົດເກືອບ 300 ຕື້ກີບ,

ໂດຍແມ່ນການລົງທຶນຂອງລັດຖະບານລາວ, ພາຍຫລັງໄດ້ເລີ່ມການກໍ່ສ້າງມາແຕ່ວັນທີ 12 ຕຸລາ 2017 ໂດຍລັດວິສາຫະກິດກໍ່ສ້າງຄົມມະນາຄົມເປັນຜູ້ຮັບເຫມົາກໍ່ສ້າງ. ຊຶ່ງພາຍຫລັງການລະບາດຂອງພະຍາດໂຄວິດ-19 ເຮັດໃຫ້ມີຄວາມຫຍຸ້ງຍາກໃນການກໍ່ສ້າງ ໂດຍສະເພາະເຄື່ອງມື ແລະ ອຸປະກອນການກໍ່ສ້າງ, ແຕ່ແນວໃດກໍດີ ປັດຈຸບັນທາງບໍລິສັດກໍໄດ້ສືບຕໍ່ດຳເນີນການກໍ່ສ້າງຊຶ່ງຄາດວ່າຈະໃຫ້ສຳເລັດຕາມແຜນຄາດຫມາຍໄວ້

ຂົວດັ່ງກ່າວເປັນຂົວປະສົມ,ເບຕົງເສີມເຫຼັກ, ມີ ຄວາມຍາວ 505 ແມັດ, ກ້ວາງ 12 ແມັດ, ທາງຄົນຍ່າງກວ້າງເບື້ອງລະ 1,8 ແມັດ, ປູດ້ວຍ ອັດສະຟານ ໜາ 5 ຊັງຕີແມັດ. ຖ້າຂົວດັ່ງກ່າວສ້າງສໍາເລັດຈະເຮັດໃຫ້ການຄົມມະນາຄົມລະຫ່ວາງແຂວງບໍ່ແກ້ວລົງມານະຄອນຫຼວງວຽງຈັນມາຜ່ານແຂວງໄຊຍະບູລີເປັນໄລຍະສັ້ນທີ່ສຸດ.

error: ເນື້ອຫາໄດ້ຮັບການປົກປ້ອງ !!