ໂຄວິດ-19 ປິ່ນປົວດີທັງໝົດແລ້ວ ໃນຂະນະທີ່ພະຍາດໄຂ້ຍຸງລາຍ ມີຜູ້ເສຍຊີວິດເພີ່ມ 1 ກໍລະນີ

ໃນວັນທີ 9 ມິຖຸນາ 2020 ທີ່ຜ່ານມາ ສູນຂ່າວສານການແພດສຸຂະສຶກສາ ໄດ້ລາຍງານເຖິງຜົນສຳເລັດຄັ້ງຍິ່ງໃຫ່ຍຂອງ ສປປ ລາວ ທີ່ສາມາດປິ່ນປົວຜູ້ຕິດເຊື້ອພະຍາດໂຄວິດ-19 ໄດ້ສໍາເລັດທັງໝົດ 19 ຄົນ ເຊິ່ງກໍລະນີທີ່ອອກໂຮງໝໍສຸດທ້າຍ ແມ່ນກໍລະນີຕິດເຊື້ອທີ່ 8 ເພດຊາຍ ອາຍຸ 18 ປີ ບ້ານດອນນົກຂຸ້ມ ເມືອງສີສັດຕະນາກ ນະຄອນຫຼວງວຽງຈັນ ເຊິ່ງຜູ້ກ່ຽວໄດ້ເລີ່ມເຂົ້າປິ່ນປົວຢູ່ໂຮງໝໍ ໃນວັນທີ 8 ມີນາ2020 ແລະ ໄດ້ປິ່ນປົວຫາຍດີ ແລະ ອອກໂຮງໝໍໃນວັນທີ 9 ມິຖຸນາ 2020

ດຣ ພອນປະເສີດ ໄຊຍະມຸງຄົນ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໄດ້ລາຍງານໃນວັນທີ ວັນທີ 9 ມິຖຸນາ 2020 ວ່າ: ວັນທີ 8 ມິຖຸນາ 2020 ໄດ້ເກັບຕົວຢ່າງມາກວດທັງໝົດ  319 ຄົນ  ໃນນີ້ມີແຮງງານກັບມາແຕ່ປະເທດໄທ 227 ຄົນ ແຮງງານຈີນ 77 ຄົນ ກໍລະນີສົງໄສ 1 ຄົນ ບຸກຄົນທົ່ວໄປທີ່ບໍ່ມີອາການ 13 ຄົນ ຜົນກວດທັງໝົດແມ່ນໃຫ້ຜົນລົບ ໝາຍຄວາມວ່າບໍ່ມີຜູ້ຕິດເຊື້ອເພີ່ມ

ນອກຈາກນີ້ແລ້ວ ທ່ານຍັງໄດ້ລາຍງານເຖິງຕົວເລກຜູ້ຕິດເຊື້ອພະຍາດໄຂ້ຍຸງລາຍ ທີ່ກຳລັງເປັນອີກໜຶ່ງບັນຫາທີ່ພົ່ນເດັ່ນໃນປະເທດລາວເຮົາ ໂດຍວັນທີ 9 ມິຖຸນາ 2020 ມີຜູ້ຕິດເຊື້ອພະຍາດໄຂ້ຍຸງສະສົມທັງໝົດ 1695 ຄົນ ໃນນີ້ຕິດເຊື້ອຫຼາຍສຸດ ແມ່ນ ນະຄອນຫຼວງວຽງຈັນ ແຂວງວຽງຈັນ ແລະ ແຂວງອັດຕະປື ແລະ ປະຈຸບັນແມ່ນມີຜູ້ເສຍຊີວິດແລ້ວທັງໝົດ 5 ຄົນ ໃນນີ້ແມ່ນເສຍຊີວິດເພີ່ມໃໝ່ 1 ກໍລະນີ ຈາກແຂວງບໍລິຄໍາໄຊ

ແນວໃດກໍ່ຕາມ, ນອກຈາກຈະປ້ອງກັນຕົນເອງຈາກພະຍາດໂຄວິດ-19 ແລ້ວ ພວກເຮົາຍັງຕ້ອງໄດ້ຮ່ວມກັນປ້ອງກັນພະຍາດໄຂ້ຍຸງລາຍໄປພ້ອມໆກັນ

error: ເນື້ອຫາໄດ້ຮັບການປົກປ້ອງ !!