ງາມໜ້າຮັກ ມະຍຸລີ ຊູຕັນນຸວົງ ຖືກແຕ່ງຕັ້ງຂຶ້ນຮັບຕຳແໜ່ງ Miss Teen Laos 2020

ກອງປະກວດ Miss Teen Laos ໄດ້ແຕ່ງຕັ້ງ ຮອງອັນດັບ 1 Miss Teen Laos 2019 ນາງ ມະຍຸລີ ຊູຕັນນຸວົງ ຂຶ້ນຮັບຕຳແໜ່ງ ແລະ ປະຕິບັດໜ້າທີ່ເປັນ Miss Teen Laos 2020 ຢ່າງເປັນທາງການ ຕາມກົດລະບຽບຂອງກອງປະກວດ ໂດຍມີຜົນນັບຕັ້ງແຕ່ວັນທີ່ລົງລາຍເຊັນເປັນຕົ້ນໄປ ຈົນກວ່າຈະໄດ້ຈັດການປະກວດ ເພື່ອຄັດເລືອກ Miss Teen Laos 2021 ໃນອະນາຄົດ.

ในภาพอาจจะมี 1 คน, ข้อความ

ອີງຕາມແຈ້ງການກອງປະກວດ Miss Teen Laos, ເລື່ອງ: ການແຕ່ງຕັ້ງຕຳແໜ່ງ “Miss Teen Laos 2020” ຢ່າງເປັນທາງການວ່າ: ໃນນາມ ບໍລິສັດ ກ້າວໜ້າລາວ ເອັນເຕີເທັນເມັນ ຈໍາກັດ ເຈົ້າຂອງລິຂະສິດ ແລະ ເປັນຜູ້ຈັດການປະກວດ Miss Teen Laos ແຕ່ພຽງຜູ້ດຽວ ໄດ້ເລີ່ມຈັດການປະກວດ Miss Teen Laos 2019 ຂຶ້ນເປັນຄັ້ງທຳອິດ ແລະ ຍັງຄົງຈະສືບຕໍ່ຈັດການປະກວດໃນທຸກໆປີ ເພື່ອເປັນການສົ່ງເສີມໄວໜຸ່ມຍິງລາວໃຫ້ມີຄວາມກ້າສະແດງອອກ ແລະ ເປັນແບບຢ່າງທີ່ດີ ພາຍໃຕ້ຄຳຂວັນຂອງກອງປະກວດ “ເປັ່ງປະກາຍດວງດາວ ແຫ່ງຍຸກສະໄໝ”

ໃນປີ 2019 ໄດ້ຈັດການປະກວດຮອບຕັດສິນຂຶ້ນທີ່ ສູນວາງສະແດງສິນຄ້າລາວ-ໄອເຕັກ ຄະນະກຳມະການຕັດສິນໄດ້ລົງຄະແນນເຫັນດີໃຫ້ ນາງ ໂສລະຍາ ລິນ ຄອນດີ ອາຍຸ 16 ປີ ດຳລົງຕຳແໜ່ງ Miss Teen Laos 2019, ຮອງອັນດັບ 1 ນາງ ມະຍຸລີ ຊູຕັນນຸວົງ ແລະ ຮອງອັນດັບ 2 ນາງ ແຮ່ນນ້າ ໂລເຊັ່ນບູ້ມ.

ພາຍຫຼັງ Miss Teen Laos 2019 ໄດ້ປະຕິບັດໜ້າທີ່ຄົບ 1 ປີເຕັມຕາມພາລະບົດບາດ ແລະ ໜ້າທີ່ຕາມສັນຍາຂອງກອງປະກວດໄດ້ເປັນຢ່າງດີ ແລະ ຕາມການວາງແຜນຂອງກອງປະກວດໃນເບື້ອງຕົ້ນ ແມ່ນຈະໄດ້ຈັດການປະກວດເພື່ອຄັດເລືອກເອົາ Miss Teen Laos 2020 ໃນວັນທີ 19 ເດືອນ ພຶດສະພາ 2020 ເພື່ອຄັດເລືອກເອົາຜູ້ທີ່ເໜາະສົມຈະມາປະຕິບັດໜ້າທີ່ເປັນ Miss Teen Laos 2020 ສືບຕໍ່ໄປ.

ເນື່ອງຈາກໃນທ້າຍປີ 2019-2020 ໄດ້ມີວິກິດການລະບາດຂອງເຊື້ອໄວຣັສ ໂຄວິດ-19 ໃນທົ່ວໂລກ ລວມໄປເຖິງປະເທດລາວຂອງພວກເຮົາ, ທາງກອງປະກວດຈຶ່ງໄດ້ເລື່ອນການປະກວດອອກໄປ ຈົນກວ່າຈະມີແຈ້ງການຈາກ ລັດຖະບານ ໃຫ້ມີການຈັດການປະກວດໄດ້ອີກຄັ້ງ.

ດັ່ງນັ້ນ, ທາງກອງປະກວດ ຈິ່ງເຫັນສົມຄວນແຕ່ງຕັ້ງ ຮອງອັນດັບ 1 ນາງ ມະຍຸລີ ຊູຕັນນຸວົງ ຂຶ້ນຮັບຕຳແໜ່ງ ແລະ ປະຕິບັດໜ້າທີ່ເປັນ Miss Teen Laos 2020 ຢ່າງເປັນທາງການ ຕາມກົດລະບຽບຂອງກອງປະກວດ ໂດຍມີຜົນນັບຕັ້ງແຕ່ວັນທີ່ລົງລາຍເຊັນເປັນຕົ້ນໄປ ຈົນກວ່າຈະໄດ້ຈັດການປະກວດ ເພື່ອຄັດເລືອກ Miss Teen Laos 2021 ໃນອະນາຄົດ.

ດັ່ງນັ້ນ, ບໍລິສັດ ກ້າວໜ້າລາວ ເອັນເຕີເທັນເມັນ ຈໍາກັດ ໃນນາມ ເຈົ້າຂອງລິຂະສິດ ແລະ ເປັນຜູ້ຈັດການປະກວດ Miss Teen Laos ແຕ່ພຽງຜູ້ດຽວ ຈຶ່ງໄດ້ປະກາດແຈ້ງການສະບັບນີ້ມາເພື່ອຊາບໂດຍທົ່ວກັນ.

ກອງປະກວດ Miss Teen Laos, ນະຄອນຫຼວງວຽງຈັນ, ວັນທີ 08 ມິຖຸນາ 2020, ບໍລິສັດ ກ້າວໜ້າລາວ ເອັນເຕີເທັນເມັນ ຈໍາກັດ, ປະທານ ກອງປະກວດ Miss Teen Laos

error: ເນື້ອຫາໄດ້ຮັບການປົກປ້ອງ !!