ແມ່ຕູ້ສະຫະລັດໄວ 107 ປີ ເຜີຍເຄັດລັບການມີອາຍຸຍືນຍາວ ບອກ “ຍ້ອນບໍ່ມີຜົວ”

ເມື່ອບໍ່ດົນມານີ້ ສຳນັກຂ່າວ WCBS ໄດ້ລາຍງານກ່ຽວກັບແມ່ຕູ້ຊື່ ຫຼຸຍ ຊອນ ຊິນຢໍ (Louise Jean Signore) ເຊິ່ງອາໄສໃນເມືອງ Bronx ລັດນິວຢອກ ສະຫະລັດອາເມລິກາ. ແມ່ຕູ້ຄົນນີ້ກິນອາຫານທີ່ດີຕໍ່ສຸຂະພາບ ແລະ ອອກກຳລັງກາຍເປັນປະຈຳ ແຕ່ສິ່ງທີ່ເພິ່ນເຊື່ອວ່າເຮັດໃຫ້ຕົນເອງມີອາຍຸທີ່ຍືນຍາວມາຮອດທຸກມື້ນີ້ໄດ້ແມ່ນຍ້ອນ “ບໍ່ມີຜົວ”.

ແມ່ຕູ້ ຊິນຢໍ ໄດ້ໃຫ້ສຳພາດຕໍ່ກັບສື່ດັ່ງກ່າວວ່າ ຄວາມລັບທີ່ເຮັດໃຫ້ຕົນເອງມີອາຍຸຍືນຮອດ 107 ປີນັ້ນ ຍ້ອນວ່າ “ບໍ່ເຄີຍແຕ່ງດອງມາກ່ອນ”. “ນ້ອງສາວຂ້ອຍຍັງເວົ້າເລີຍວ່າ ຂ້ອຍບໍ່ໜ໊າແຕ່ງດອງເລີຍ”, ແມ່ຕູ້ກ່າວເສີມ.
ທັງນີ້ ນ້ອງສາວຂອງແມ່ຕູ້ຊິນຢໍມີອາຍຸ 102 ປີ ສະນັ້ນ ມີຄວາມເປັນໄປໄດ້ວ່າອາດເປັນເລື່ອງຂອງເຊື້ອສາຍທີ່ເຮັດໃຫ້ພວກເຂົາມີອາຍຸຍືນ.
ພ້ອມນີ້ ແມ່ຕູ້ ຊິນຢໍ ຍັງເປີດເຜີຍກ່ຽວກັບເຄັດລັບຂອງການມີອາຍຸຍືນຂອງຕົນເອງວ່າ “ກິນອາຫານອິຕາລີເດີ. ອາຫານອິຕາລີດີຕໍ່ສຸຂະພາບຂອງເຈົ້າ. ຂ້ອຍເຕີບໃຫຍ່ມາກັບອາຫານທີ່ດີຕໍ່ສຸຂະພາບ. ບໍ່ດື່ມນໍ້າອັດລົມ, ບໍ່ກິນເຄັກ”.

“ຖ້າຫາກຄົນອື່ນເຂົາອອກກຳລັງກາຍ, ຂ້ອຍກໍອອກກຳລັງກາຍ. ຖ້າຄົນອື່ນເຂົາເຕັ້ນ ຂ້ອຍກໍເຕັ້ນຄືກັນ. ຫຼັງຈາກກິນເຂົ້າທ່ຽງແລ້ວ, ຂ້ອຍຈະຫຼິ້ນບິງໂກ ສະນັ້ນໃນມື້ໜຶ່ງຂ້ອຍເລີຍບໍ່ມີເວລາວ່າງ”, ແມ່ຕູ້ຊິນຢໍກ່າວ.
ແມ່ຕູ້ຊິນຢໍ ຫາກໍສະຫຼອງວັນເກີດຄົບຮອບ 107 ປີໃນເມືອງທີ່ຕົນເອງອາໄສຢູ່ ເຊິ່ງມີຜູ້ເຂົ້າຮ່ວມສະຫຼອງຫຼາຍເຖິງ 100 ຄົນ.
ແນວໃດກໍຕາມ ການທີ່ມີອາຍຸຫຼາຍຂຶ້ນ ບໍ່ແມ່ນເລື່ອງທີ່ງ່າຍ, ປັດຈຸບັນ ແມ່ຕູ້ ຊິນຢໍ ມີອາການຕາບອດ ແລະ ຫາກໍເຊົາຈາກພະຍາດປອດບວມ ແລະ ເມື່ອອາຍຸໄດ້ 103 ກໍລອດຈາກການທຳຮ້າຍຮ່າງກາຍ ແລະ ການລັກຊັບໃນຫ້ອງພັກຂອງຕົນເອງ.

error: ເນື້ອຫາໄດ້ຮັບການປົກປ້ອງ !!