ຕັກກະແຕນຝູງໄມ້ປ່ອງ ລະບາດໜັກຢູ່ 3 ກຸ່ມບ້ານ ເນື້ອທີ່ໄດ້ຮັບຜົນກະທົບ 30 ກວ່າເຮັກຕາ ທີ່ແຂວງຫຼວງພະບາງ

ພາຍຫຼັງໄດ້ຮັບການລາຍງານ ຈາກຄອບຄົວ ແລະ ນາຍບ້ານທີ່ໄດ້ຮັບຜົນກະທົບຈາກຕັກແຕນຝູງໄມ້ປ່ອງ ວັນທີ 28 ພຶດສະພາ 2020 ທ່ານ ສົມຫວັງ ພອນຄຳວົງສາ ເຈົ້າເມືອງໆນ້ຳບາກ ໄດ້ເຄື່ອນໄຫວກວດກາເບິ່ງສະພາບການລະບາດຂອງຕັກແຕນ ຢູ່ 3 ກຸ່ມ ພ້ອມດ້ວຍຫ້ອງການກະສິກໍາ ແລະ ປ່າໄມ້ເມືອງ ໂດຍສົມທົບກັບຫ້ອງການທີ່ກ່ຽວຂ້ອງ ແລະ ວິຊາການຫ້ອງການກະສິກຳ ແລະ ປ່າໄມ້ລົງພື້ນທີ່ຕົວຈິງ ເພື່ອຕິດຕາມສະພາບຕັກແຕນເຂົ້າທຳລາຍເຂົ້າໄຮ່ຂອງປະຊາຊົນ. ຜ່ານການລົງຕິດຕາມຕົວຈິງເຫັນວ່າ ປະຊາຊົນໄດ້ຮັບຜົນກະທົບຫລາຍສົມຄວນ ແລະ ມີທ່າອ່ຽງຈະຂະຫຍາຍເປັນວົງກ້ວາງ.

ປັດຈຸບັນທົ່ວເມືອງ ໄດ້ຮັບຜົນກະທົບຈາກຕັກກະແຕນຝູງໄມ້ປ່ອງ 3 ກຸ່ມບ້ານຄື ກຸ່ມເທດສະບານເມືອງ 1 ບ້ານ, ກຸ່ມບ້ານນະຄອນ 1 ບ້ານ ແລະ ກຸ່ມບ້ານນຳດ່ວນ 9 ບ້ານ,​ ເນື້ອທີ່ໄດ້ຮັບຜົນກະທົບທັງໝົດ 30 ກ່ວາເຮັກຕ້າ, ມີ 26 ຄອບຄົວ, ຕໍ່ສະພາບການດັ່ງກ່າວວິຊາການທີ່ກ່ຽວຂ້ອງໄດ້ແນະນຳໃຫ້ຊີດຢາແລ້ວ 8 ຄອບຄົວ.

ທ່ານ ເຈົ້າເມືອງໄດ້ຮຽກຮ້ອງມາຍັງປະຊາຊົນ ຈົ່ງເພີ່ມຄວາມສາມັກຄີໃນການຕ້ານສັດຕູພືດຕັກແຕນ ດ້ວຍສານເຄມີ ຫຼື ໃຊ້ວິທີທຳມະຊາດແບບພື້ນເມືອງ, ແນະນໍາການປ້ອງກັນ, ປາບປາມຕັກກະແຕນ ແລະ ກະກຽມປູກພືດທົດແທນຕາມຄວາມເໝາະສົມ.

ພ້ອມນັ້ນ ທ່ານຍັງໄດ້ເນັ້ນໜັກໃຫ້ນາຍບ້ານ ຕິດຕາມສະພາບການລະບາດຂອງຕັກກະແຕນຢ່າງໃກ້ສິດ ຖ້າມີການແຜ່ລາມໄປເຂດອື່ນ ແມ່ນໃຫ້ລາຍງານດ່ວນ ເພື່ອຂັ້ນເທິງຈະໄດ້ສົ່ງວິຊາການໄປຊ່ວຍໃຫ້ທັນເວລາ.

ທີ່ມາ: ຂ່າວເມືອງນ້ຳບາກ

error: ເນື້ອຫາໄດ້ຮັບການປົກປ້ອງ !!