ເບິ່ງບ້ານເຂົາເອົາບົດຮຽນບໍ່ແມ່ນເອົາແບບຢ່າງທາງບໍ່ດີ

ເຫັນຢູ່ບໍຂ່າວບ້ານ​ ເມືອງອື່ນທາງອິນເດຍ
ເຊື່ອເລື່ອງລົງຄົງຄາ ແມ່ນະທີທານນໍ້າ
ວ່າຊິສະສົງລ້າງ ໄຫລລອຍໂພຍພະຍາດ
ສຸດທ້າຍມີການລະບາດຂຶ້ນ ບືນໜ້າຍິ່ງທະວີ

ມື້ໜຶ່ງມີເກືອບສີ່ຮ້ອຍ​ ພັນຕື່ມຄົນຕິດ
ໂຄວິດ​ມັນ​ຮຸນແຮງ​ ​ ເກີດແຊກແຊງພັນເຄົ້າ
ເອົາຊີວີມໍລະນາມ້ວຍ ຄວາມຊວຍເປັນຂອງຊາດ
ຄວາມປະໝາດພຽງກຸ່ມກ້ອນ ປະຊາຮ້ອນທົ່ວເມືອງ

ຄວາມຈິງ​ ທາງການປະກາດຫ້າມ​ ປາມປາບເພື່ອຫວັງດີ
ບໍ່ແມ່ນ​ເປັນການ​ແຂງ​ ຂົ່ມຮີດຄອງເຄີຍຫຼິ້ນ
ບໍ່ແມ່ນເພທຳລາຍມ້າງ ມູນມັງຕັ້ງແຕ່ເກົ່າ
ແຕ່ນີ້ແມ່ນການປັບປ່ຽນເຂົ້າ ວິຖີແທ້ຖືກຍາມ

ບ້ານເພິ່ນຜິດພາດພັ້ງ​ ພັງເສື່ອມສູນເສຍ
ອິນເດຍໂດນໂຄວິດ​ ຄອບຄຸມຄຸງດ້າວ
ກໍເພາະເຂົາຂືນຂໍ້​ ທາງການຂໍກໍຍັງລ່ວງ
ຜົນກຳທວງຟັ່ງຟ້າວ ອົງເຈົ້າບໍ່ຊ່ວຍຊູ

ຂໍໃຫ້ເຮົາພີ່ນ້ອງ ຜອງເຜົ່າລາວທັງໝົດ
ອົດທຸກທົນນຳກັນ ກໍເພື່ອຈະດີວັນໜ້າ
ຢ່າໄດ້ເອົາຄອງອ້າງ​ ເອົາຜີສາງມາຂູ່
ຄັນຫາກຜີເພິ່ນຮູ້​ ຊິສົມໜ້າບໍ່ຢ່າແລ

ຂໍຝາກເຕືອນແຕ່ສໍ່ານີ້ ກໍເພາະຮັກແລະຫວັງດີ
ບໍ່ແມ່ນຊູຊີສອນ​ ສັ່ງສູງສະເໝີເຈົ້າ
ເຮົາທຸກຄົນຄືດ້າມ​ ໂດຍພົນລະເມືອງມິ່ງ
ຟັງຄວາມກັນເມືອງຈິ່ງກ້າວ ຈະເລີນລໍ້າປະເທດລາວ

ໂດຍ: ຄຳພຸດ​ ເທບພະນົມ

ທີ່ມາ: ລາວພັດທະນາ

error: ເນື້ອຫາໄດ້ຮັບການປົກປ້ອງ !!