ພຣະເຈົ້າແສນແຊ່ ພຣະອົງນີ້ໄດ້ອັນເຊີນມາຈາກແມ່ນ້ຳຂອງ

ປະຫວັດຂອງພຣະເຈົ້າແສນແຊ່ ອົງນີ້ໄດ້ອັນເຊີນມາຈາກແມ່ນ້ຳຂອງ ຕາມຄຳບອກເລົ່າຈາກເຖົ້າແກ່ອາວຸໂສຂອງບ້ານໄດ້ບອກເລົ່າໄວ້ ວ່າມີຊາວບ້ານຄວ້ານ ໄດ້ໄປພົບເຫັນ ພຣະເຈົ້າແສນແຊ່ ຢູ່ກາງປ່າໄມ້ໃຫຍ່ ເປັນວັດຮ້າງ ຊຶ່ງເອີ້ນວ່າວັັດຮ້າງປ່າໄມ້ຫວານ ຢູ່ແຄມແມ່ນ້ຳຂອງປະຈຸບັນນີ້ ເປັນວັດບ້ານມອມ ປະຊາຊົນໄດ້ອັນເຊີນພຣະເຈົ້າແສນແຊ່ໃສເຮືອກາບລ່ອງແມ່ນ້ຳຂອງລົງມາ ແລະໄດ້ໂອ້ລົມກັນວ່າ ຈະເອົາໄປປະດິດສະຖານຢູ່ວັດບ້ານຄວ້ານ ແຕ່ພໍລ່ອງເຮືອມາຮອດກ້ອງບ້ານມ່ວງຄຳທ່າຫີນ ຫຼືເອີ້ນວ່າຫາດຄວາຍ ຂອງບ້ານສຼີບຸນເຮືອງ ພຣະເຈົ້າແສນແຊ່ ກໍເຮັດໃຫ້ເກີດປະຕິຫານອັດສະຈັນ ເໝືອນມີຈິດວິນຍານຢູ່ໆເຮືອກາບກໍ່ໄດ້ ເບ່ງຊາຍ ເບ່ງຂວາ ຢ່າງແຮງເຮັດໃຫ້ພຣະເຈົ້າແສນແຊ່ ຕົກອອກຈາກເຮືອກາບຈົມຫາຍລົງໄປໃນແມ່ນ້ຳຂອງ ໂດຍທີ່ວ່າເຮືອບໍໄດ້ຄວ້ຳຫຼືຈົມລົງແຕ່ຢ່າງໃດ ເພາະວ່າບໍລິເວນນັ້ນແຕ່ກ່ອນເປັນວັງເລິກເອົາໄມ້ສຸດກົກສຸດປາຍມາຢັ່ງລົງກໍ່ບໍ່ເຖິງ ປະຊາຊົນຈຶ່ງພາກັນກັບບ້ານໂດຍໝົດຄວາມສາມາດທີ່ຈະເອົາຄືນມາໄດ້.

ຕໍ່ມາຫຼາຍປີ ບໍລິເວນທີ່ພຣະເຈົ້າແສນແຊ່ຕົກລົງນ້ຳທີ່ເປັນວັງເລິກນັ້ນ ກໍໄດ້ຕື້ນຂື້ນມາຢູ່ມາມື້ໜຶ່ງກໍ່ໄດ້ມີຊາວບ້ານສຼີບຸນເຮືອງ ເອົາເຮືອກາບຂຶ້ນໄປເຮັດໄຮ່ເຮັດສວນຢູ່ທາງເໜືອ ມີມື້ໜຶ່ງມີປະຊາຊົນຈຳນວນໜຶ່ງກໍໄດ້ເອົາເຮືອຂຶ້ນໄປພໍໄປເຖິງບ່ອນທີ່ພຣະເຈົ້າແສນແຊ່ ຕົກລົງກໍໄດ້ເຫັນນ້ຳເປັນຟອງຂຶ້ນມາ ຈຶ່ງລົມກັນວ່າແຕ່ກ່ອນມີພຣະພຸດທະຮູບເຈົ້າຕົກລົງບໍລິເວນນີ້ ຈຶ່ງພາກັນໄປເບິ່ງພໍໄປຮອດກໍໄດ້ພາກັນລົງໄປງົມເບິ່ງກໍໄດ້ພົບເຫັນພຣະເຈົ້າແສນແຊ່ອົງນີ້ແທ້ໆ ຢູ່ໃນແມ່ນ້ຳຂອງ ໂດຍທີ່ວ່າພຣະເຈົ້າແສນແຊ່ອົງນີ້ຕັ້ງຢູ່ ປິ່ນໜ້າລ່ອງທາງໃຕ້ຢູ່ ຈຶ່ງໄດ້ພາກັນອະຣັນທະນານິມົນ ແລະອັນເຊີນຂຶ້ນມາປະດິດສະຖານຢູ່ທີ່ວັດສຼີບຸນເຮືອງ ແຫ່ງນີ້ໃນປີພຸຸດທະສັກະລາດ 2386 ຄສ 1843 ຈຸລະສັກະລາດໄດ້ 1205

ພຣະເຈົ້າແສນແຊ່ອົງນີ້ ມາປະດິດສະຖານທີ່ວັດສີບຸນເຮືອງ ເມືອງຕົ້ນເຜິ້ງ ແຂວງບໍ່ແກ້ວ ມາເປັນເວລາ 173 ປີ ຜ່ານມາແລ້ວ ( ປີ ຄສ 2016-1843 = 173 ປີ )

ຫຼັງຈາກນັ້ນພຣະເຈົ້າແສນແຊ່ໄດ້ຂຶ້ນມາປະດິດສະຖານຢູ່ວັດບ້ານສຼີບຸນເຮືອງແລ້ວກໍໄດ້ມີປະຊາຊົນຜູ້ມີຈິດໃຈເຫຼື້ອມໃສໃນພຸດທະສາສະໜາພາກັນມາຂາບໄຫວ້ບູຊາ ເຮັດໃຫ້ບ້ານສຼີບຸນເຮືອງ ມີຄວາມຮຸ່ງເຮືອງສີວິໄລມາຈົນເຖິງປັດຈຸບັນນີ້ ກໍ່ດ້ວຍພຣະບາຣະມີຂອງພຣະເຈົ້າແສນແຊ່ອົງນີ້ມາປະດິດສະຖານ ເຮັດໃຫ້ເປັນສູນລວມຈິດໃຈຂອງປະຊາຊົນມີຄວາມສາມັກຄີກັນຕະຫຼອດມາ.

ພຣະອົງນີ້ເປັນພຣະພຸທທະຮູບທີ່ມີລັກສະນະທີ່ງົດງາມ ແລະເປັນພຣະພຸທທະຮູບທີ່ມີຜູ້ຄົນເຄົາຣົບນັບຖືເປັນຢ່າງສູງ ເຊັ່ນດຽວກັນ ຖ້າໃຜໄປເມືອງຫລວງພຣະບາງ ບໍ່ໄດ້ໄປໄຫວພຣະບາງ ແລະພຣະຫມ່ານ ກໍ່ຄົງບໍ່ຮອດຫລວງພຣະບາງ , ຖ້າໃຜໄປອຸດົມໄຊ ບໍ່ໄດ້ໄຫວພຣະເຈົ້າສິງຄຳ ເມືອງຫລ້າ ກໍ່ຄົງບໍ່ຮອດ ແຂວງອຸດົມໄຊ ແລະຖ້າໃຜໄປເມືອງຕົ້ນເຜິງ ຫລືແຂວງບໍ່ແກ້ວ ບໍ່ໄດ້ໄປຂາບໄຫວ ພຣະເຈົ້າແສນແຊ່ ກໍ່ຄົງບໍ່ຮອດເມືອງຕົ້ນເຜິງ ແຂວງບໍ່ແກ້ວ

.

.

ຂໍ້ມູນເນື້ອໃນ ໄດ້ມາຈາກ ສາທຸ ຂັດຕິຍະບາຣະມີ ວັດສີບຸນເຮືອງ ເມືອງຕົ້ນເຜີງ ແຂວງບໍ່ແກ້ວ

ຂອບໃຈຮູບພາບ: Houmphet manisouk

error: ເນື້ອຫາໄດ້ຮັບການປົກປ້ອງ !!