ສະພາບ ລະດັບແມ່ນໍ້າຂອງ ແຫ້ງກ່ວາທຸກປີ

ສື່ຕ່າງປະເທດລາຍງານເມື່ອວັນທີ 17 ກຸມພາ 2021 ວ່າ ລະດັບແມ່ນໍ້າຂອງ ໃນບໍລິເວນເຂດສາມຫຼຽມຄຳ ຊາຍແດນ ລາວ-ໄທ-ມຽນມາ ໄດ້ຫຼຸດລົງຢ່າງຕໍ່ເນື່ອງ

ສຳນັກເຈົ້າທ່າພູມມິພາກ ສາຂາຊຽງລາຍ (ປະເທດໄທ) ໄດ້ແຈ້ງໃຫ້ຮູ້ເຖິງລະດັບນໍ້າຂອງ ໃນຊ່ວງຕົ້ນເດືອນກຸມພາ ຕັ້ງແຕ່ວັນທີ 9-15 ກຸມພາ 2021 ລະດັບນໍ້າ ເລິກຢູ່ປະມານ 1.88 ແມັດ ຫາ ເລິກສຸດ 2.50 ແມັດ ເຊິ່ງຄາດວ່າໃນລະດູແລ້ງນີ້ ແມ່ນໍ້າຂອງຍັງຈະຫຼຸດລົງຈົນເຫັນຊາຍຫາດ ແລະ ອາດສົ່ງຜົນໃຫ້ເຮືອນ້ອຍເຮືອໃຫຍ່ບໍ່ສາມາດໃຊ້ງານໄດ້ໃນຊ່ວງນີ້

ສູນຄວບຄຸມແມ່ນໍ້າລ້ານຊ້າງ ມົນທົນຍຸນນານ (ປະເທດຈີນ) ປົກກະຕິແລ້ວຈະເປັນໜ່ວຍງານທີ່ແຈ້ງວັນ, ເວລາ, ແລະ ລະດັບການປ່ອຍນໍ້າຈາກເຂື່ອນຈິງຫົງ ໃຫ້ກັບຄົນເດີນເຮືອທົ່ວໄປ ເຊິ່ງໃນຊ່ວງ 7-8 ເດືອນທີ່ຜ່ານມາ ທ່າເຮືອໜ້າດ່ານແມ່ນໍ້າຂອງຂອງຈີນໄດ້ປິດໂຕລົງ ແລະ ບໍ່ໄດ້ມີການແຈ້ງຂໍ້ມູນໃຫ້ກັບສະມາຊິກຢູ່ນອກປະເທດຮັບຮູ້

ໂດຍປົກກະຕິຈະປ່ອຍນໍ້າຈາກເຂື່ອນໃນອັດຕາ 1,200-1,500 ແມັດກ້ອນຕໍ່ວິນາທີ ແລະ ໃນຊ່ວງນໍ້າຖ້ວມ ຈະປ່ອຍ 2,000-3,000 ແມັດກ້ອນຕໍ່ວິນາທີ ລະດູແລ້ງຈະປ່ອຍຕໍ່າກວ່າ 1,000 ແມັດກ້ອນຕໍ່ວິນາທີ ແລະ ຈະຫຼຸດການປ່ອຍນໍ້າລົງໃນຊ່ວງປີໃຫມ່ຂອງຈີນ ເຊິ່ງປີນີ້ນໍ້າແຫ້ງລົງຫຼາຍກວ່າທຸກປີ ປັດຈຸບັນເຮືອສົ່ງສິນຄ້າບໍ່ສາມາດໃຊ້ງານໄດ້ ເພາະລະດັບນໍ້າຕື້ນຈົນເກີນໄປ

ສາເຫດຫຼັກຄາດວ່າຈະເປັນການປິດເມືອງໃນຊ່ວງການແຜ່ລະບາດຂອງພະຍາດໂຄວິດ-19 ແກ່ຍາວຕິດຕໍ່ກັນມາຫຼາຍເດືອນ ເຮັດບໍ່ມີເຮືອສົ່ງສິນຄ້າຈາກຈີນ ນັບຕັ້ງແຕ່ຊາຍແດນ ມຽນມາ ແລະ ສປປ ລາວ ລົງມາ ນອກຈາກນີ້ທ່າເຮືອຂອງ ສປປ ລາວ ກໍ່ໄດ້ປິດໝົດເຊັ່ນກັນ ເຊີ່ງມຽນມາກໍຫັນໄປຂົນສົ່ງທາງບົກ ແລະ ຄາດວ່າຖ້າຈີນກັບມາເປີດທ່າເຮືອສິນຄ້າ ກໍຈະແຈ້ງຂໍ້ມູນລະດັບນໍ້າຄືເກົ່າ

error: ເນື້ອຫາໄດ້ຮັບການປົກປ້ອງ !!