ຍ້ອນຕັດໄມ້ກາຍດິນສວນ

ໃນເວລາປະມານ 16 ໂມງ 24 ນາທີຂອງວັນທີ 13 ກຸມພາ 2021 ເກີດເຫດຄາດຕະກຳຢູ່ເຂດບ້ານພູສະຫວັນ ເມືອງ ໄຊ ແຂວງອຸດົມໄຊ ສາເຫດຍ້ອນຂັດແຍ່ງເລື່ອງລ່ວງລໍ້າຕັດໄມ້ກາຍເຂດເເດນສວນຂອງກັນ ແລະ ກັນ ຈົນເຖິງຂັ້ນລົງຄາດຕະກໍາເກີດຂຶ້ນ ເຫດເຮັດໃຫ້ມີຜູ້ເສຍຊີວິດ 01 ຄົນ,ຜ່ານການເກັບກຳ ແລະ ຊັນນະສູດພາກເຫດການຕົວຈິງຂອງເຈົ້າໜ້າທີ່ວິຊາສະເພາະເຫັນວ່າ:ຜູ້ເສຍຊີວິດຊື່ ທ້າວ ສົມເພັດ ຫຼື ຈົງຮືຢາ ອາຍຸ 40 ປີ, ອາຊີບເຮັດສວນ, ຢູ່ບ້ານພູສະຫວັນ, ເມືອງໄຊ, ແຂວງອຸດົມໄຊ ມີຮ່ອງຮອຍລູກວ່ານປືນແກັບຖືກຢູ່ບໍລິເວນໜ້າຜາກ,ໃບ້ໜ້າລວມ 12 ຈຸດ ແລະ ຢູ່ບໍລິເວນໜ້າເອິກເບື້ອງຊາຍ 1 ຈຸດ. ສ່ວນຜູ້ລົງມືຄາດຕະກໍາຊື່ ທ້າວ ສີພອນ ລີ ຫຼື ນໍ່ຈາລີ ອາຍຸ 41 ປີ, ອາຊີບເຮັດສວນ ເປັນຄົນບ້ານດຽວກັນ.

ສະຫາຍ ພັທ ສີທັດ ສີຄຳເຕີຍ,ຄະນະພັກກອງບັນຊາການ,ຫົວໜ້າຫ້ອງຕໍາຫຼວດ ປກສ ແຂວງອຸດົມໄຊໄດ້ກະຈ່າງແຈ້ງກ່ຽວກັບເຫດການຕົວຈິງໃຫ້ຮູ້ວ່າ: ພາຍຫຼັງໄດ້ຈັບຕົວ ທ້າວ ສີພອນ ລີ ໄປສອບສວນເບື້ອງຕົ້ນຜູ້ກ່ຽວສາລະພາບວ່າ: ໄລຍະຜ່ານມາຄອບຄົວຂອງຕົນເອງ ແລະ ຜູ້ເສຍຊີວິດ ແມ່ນບໍ່ເຄີຍມີເລື່ອງຜິດຖຽງກັນ, ຈົນມາຮອດເດືອນທັນວາ 2020 ຄອບຄົວຂອງຕົນເອງ ແລະ ທ້າວ ສົມເພັດ ພາກັນໄປເຮັດສວນຢູ່ເຂດພູສະຫວັນ ເປັນດິນທີ່ການຈັດຕັ້ງບ້ານຈັດສັນໃຫ້ (ສວນຕິດກັນ) ຈົນມາຮອດວັນທີ 13/02/2021 ທ້າວ ສົມເພັດ ໄດ້ເອົາຈັກສະຕິນມາລັກຕັດເອົາໄມ້ໃຫຍ່ຢູ່ເຂດດິນສວນຂອງຕົນເອງ, ໃນຄະນະນັ້ນ, ຕົນເອງໄດ້ພົບເຫັນພ້ອມທັງຫ້າມ ບໍ່ໃຫ້ຕັດໄມ້ໃຫຍ່ຢູ່ເຂດສວນຂອງຕົນເອງ ແຕ່ທ້າວ ສົມເພັດ ແມ່ນບໍ່ຢຸດໄດ້ມີການຜິດຖຽງກັນຢ່າງຮ້າຍແຮງ ພ້ອມທັງມີການທ້າຍທາຍກັນຫຼາຍຢ່າງ,

ຈາກນັ້ນ ຕົນເອງຈຶ່ງໄດ້ມີແນວຄິດຄຽດແຄ້ນ ແລະ ໄດ້ເອົາປືນແກັບ 2 ກະບອກ, ທີ່ຕົນເອງໄດ້ຖືມາຍິງໃສ່ຫົວທ້າວ ສົມເພັດ 1 ບາດ,ຖືກບໍລິເວນໃບໜ້າແຕ່ຍັງບໍ່ເສຍຊີວິດ ແລ້ວໄດ້ມີ ນາງ ເປົ່າວາ ເມຍຜູ້ເສຍຊີວິດ ໄດ້ເຂົ້າມາຫ້າມ ພ້ອມໂຈມເອົາ ທ້າວ ສົມເພັດ ລຸກນັ່ງ ຈາກນັ້ນ ຕົນເອງຈິ່ງຢ່າງເຂົ້າໄປຫາແລ້ວເວົ້າວ່າໃຫ້ອອກໜີໄປຈາກເຂດນີ້ ຖ້າບໍ່ອອກໜີຈະຍິງຊໍ້າອີກ ໃນລະຫວ່າງນັ້ນ ທ້າວ ເຢັງລີ ລູກຊາຍຂອງຕົນເອງໄປດຶງເອົາ ນາງ ເປົ່າວາ ອອກຈາກທ້າວ ສົມເພັດ ຕົນເອງໄດ້ໃຊ້ປືນແກັບກະບອກສັ້ນຍິງໃສ່ເອີກເບື້ອງຊ້າຍຂອງທ້າວ ສົມເພັດອີກ 1 ບາດ ຈົນເສຍຊີວິດຄາທີ່.

ປະຈຸບັນກໍລະນີດັ່ງກ່າວ ຢູ່ໃນການດໍາເນີນຄະດີຕາມຂັ້ນຕອນຂອງກົດໝາຍ.

error: ເນື້ອຫາໄດ້ຮັບການປົກປ້ອງ !!