ສະຫຼຸບເຫດການຊາຍຫນຸ່ມລົງມື ກໍ່ ເ ຫ ດ ຢູ່ບ້ານດ່ານຊ້າງ

ພັທ ຄໍາມະນີ ແກ້ວສີທາ ຮອງຫົວໜ້າພະແນກຕໍາຫຼວດ ກອງບັນຊາການ ປກສ ເມືອງໄຊທານີ ໃຫ້ສໍາພາດຕໍ່ນັກຂ່າວ ປກສ ນວ ໃນວັນ 16 ກຸມພາ 2021 ວ່າ: ໃນເວລາ 8:30 ໂມງຂອງວັນທີ 08 ກຸມພາ 2021 ເຈົ້າໜ້າທີ່ ປກສ ເມືອງໄຊທານີ ນະຄອນຫຼວງວຽງຈັນ ໄດ້ຮັບແຈ້ງຄວາມທາງໂທລະສັບວ່າມີຄົນເສຍຊີວິດ ຢູ່ເຂດບ້ານດ່ານຊ້າງ ເມືອງໄຊທານີ ນະຄອນຫຼວງວຽງຈັນ ຈື່ງໄດ້ແຕ່ງຕັ້ງໜ່ວຍງານວິຊາສະເພາະ ໂດຍປະສານສົບທົບກັບພະແນກສືບສວນ-ສອບສວນ ແລະ ກອງຕຳຫຼວດນິຕິວິທະຍາ ຫ້ອງຕຳຫຼວດ ປກສ ນວ ໂດຍການຊີ້ນຳຢ່າງໃກ້ສິດຈາກ ກອງບັນຊາການ ປກສ ນະຄອນຫຼວງວຽງຈັນ ລົງກວດກາສະຖານທີ່ເກີດເຫດ ເຫັນວ່າມີຄົນເສຍຊີວິດ 1 ຄົນ, ຈຶ່ງໄດ້ກວດກາຊັນນະສູດຊາກສົບຈຶ່ງຮູ້ວ່າຜູ້ຕາຍຊື່ທ້າວ ດາວປະດິດ ຫຼື ດິດ ອາຍຸ 21 ປີ, ປະຊາຊົນ ບ້ານດ່ານຊ້າງ, ມີຮ່ອງຮອຍບາດແຜ ດ້ວຍຂອງມີຄົມຈຳນວນຫຼາຍຈຸດ ຢູ່ຕາມຫົວ ແລະ ຕົນຕົວ ຜ່ານການສືບສວນ-ສອບສວນເອົາຂໍ້ມູນຫຼັກຖານຂອງເຈົ້າໜ້າທີ່, ມາຮອດເວລາ 11:00 ໂມງ, ຂອງວັນດຽວກັນກໍ່ສາມາດກັກຕົວຜູ້ກໍ່ເຫດໄດ້ຄື: ທ້າວ ວິລະພົນ ອາຍຸ 16 ປີ, ປະຊາຊົນ ບ້ານດ່ານຊ້າງ ເມືອງໄຊທານີ ມາດຳເນີນການສືບສວນ-ສອບສວນ.

ຜ່ານການສອບສວນ ທ້າວ ວິລະພົນ ໄດ້ໃຫ້ການຮັບສາລະພາບຕໍ່ເຈົ້າໜ້າທີ່ວ່າ: ກ່ອນເກີດເຫດໃນເວລາ 22:00ໂມງ ຂອງວັນທີ 07 ກຸມພາ 2021 ຕົນໄດ້ໂທຫາໝູ່ຊື່ທ້າວ ຫຸມແພງ ມາຮັບເພື່ອຈະໄປຫຼິ້ນເກມ ຈາກນັ້ນທ້າວ ຫຸມແພງ ໄດ້ຂີ່ລົດຈັກຍີ່ຫໍ້ເວບ 100 ມາກັບທ້າວ ດາວປະດິດ ແລ້ວພ້ອມກັນຂີ່ລົດຈັກຊ້ອນສາມໄປຫຼິ້ນເກມຢູ່ຮ້ານອິນເຕີເນັດຄາເຟ່ແຫ່ງໜຶ່ງແຖວຕະຫຼາດດົງໝາກຄາຍ ພໍຮອດເວລາ 5:30ໂມງ, ຂອງວັນທີ 08 ກຸມພາ 2021 ຕົນຫຼິ້ນເກມໄດ້ເງິນ 2000 ບາດ, ສະກຸນເງິນໄທ(ສອງພັນບາດ) ຈາກນັ້ນຕົນໄດ້ອອກຈາກຮ້ານ ແລະ ຕົນໄດ້ບອກທ້າວ ດາວປະດິດ ໄປສົ່ງຢູ່ເຮືອນໂດຍໃຫ້ຄ່າຈ້າງ 10.000ກີບ, ສ່ວນທ້າວ ຫຸມແພງ ແມ່ນຖ້າຢູ່ຮ້ານ, ແຕ່ກ່ອນອອກຈາກຮ້ານຕົນໄດ້ເສບຢາບ້າຈໍານວນ 2ເມັດ, ພໍມາຮອດທາງເຂດບ້ານດ່ານຊ້າງທີ່ເປັນທາງປ່ຽວທ້າວ ດາວປະດິດ ໄດ້ຈອດລົດເພື່ອລົງໄປຖ່າຍເບົາຫຼັງຈາກນັ້ນ ທ້າວ ດາວປະດິດ ໄດ້ຖາມເອົາເງິນນຳຕົນຈຳນວນ 500ບາດ, ສະກຸນເງິນໄທ (ຫ້າຮ້ອຍບາດ), ແຕ່ຕົນບໍ່ໃຫ້ຈຶ່ງໄດ້ເກີດມີການຜິດຖຽງກັນ ແລະ ລົງມືທຳຮ້າຍຮ່າງກາຍກັນ, ຈາກນັ້ນຕົນຈຶ່ງໄດ້ຈົກເອົາມີດຢູ່ໃນກະເປົາຄວາມຍາວ 25 ຊັງຕີແມັດ, ອອກມາຟັນ ແລະ ແທງທ້າວ ດາວປະດິດ ຈຳນວນຫຼາຍບາດ ຈົນໝົດສະຕິໄປ, ຫຼັງຈາກນັ້ນຕົນໄດ້ເອົາກະເປົາໄປຖີ້ມຢູ່ປ່າ ແລະ ເອົາມີດໄປຖີ້ມຢູ່ ໜອງຂ້າງທາງ, ແລ້ວຢ່າງກັບເມືອເຮືອນ ພໍຮອດເຮືອນຕົນກໍ່ລ້າງຄາບເລືອດທີ່ຕິດຕາມຕົວອອກ ແລະ ເອົາເຄື່ອງນຸ່ງໄປເຊື່ອງໄວ້ໃນຫ້ອງນອນ ແລ້ວກໍ່ເຂົ້ານອນ ຮອດເວລາ 7:00ໂມງ, ແມ່ຂອງຕົນໄດ້ປຸກຕົນໄປສົ່ງຢູ່ຕະຫຼາດເພື່ອໄປຂາຍເຄື່ອງ, ພໍຂີ່ລົດມາຮອດຈຸດເກີດເຫດໄດ້ເຫັນຄົນອ້ອມ ທ້າວ ດາວປະດິດ ຕົນຈຶ່ງຮູ້ວ່າທ້າວ ດາວປະດິດ ເສຍຊີວິດ, ແຕ່ຕົນກັບແມ່ກໍ່ໄດ້ຂີ່ລົດຈັກໄປຕະຫຼາດຕໍ່; ມາຮອດເວລາ 11:00ໂມງ ຈຶ່ງຖືກເຈົ້າໜ້າທີ່ເຂົ້າກັກຕົວ.

ຕໍ່ກັບເຫດການດັ່ງກ່າວ ພັທ ຄໍາມະນີ ແກ້ວສີທາ ຮອງຫົວໜ້າພະແນກຕໍາຫຼວດ ກອງບັນຊາການ ປກສ ເມືອງໄຊທານີ ໄດ້ຮຽກຮ້ອງພໍ່, ແມ່ ຜູ້ປົກເອົາໃຈໃສ່ສຶກສາອົບຮົມລູກ, ຫຼານຂອງຕົນ ຖ້າຫາກລູກຫຼານຕົນມີການພົວພັນກັບສິ່ງເສບຕິດ, ຕິດເກມ ແລະ ມີການພົວພັນກັບສິ່ງບໍ່ດີຕ່າງໆ ແມ່ນໃຫ້ສຶກສາອົບຮົມກ່າວເຕື່ອນ ຖ້າຫາກສຶກສາອົບຮົມບໍ່ໄດ້ແມ່ນໃຫ້ສະເໜີ ຫຼື ແຈ້ງຕໍ່ເຈົ້າໜ້າທີ່ພາກສ່ວນທີ່ກ່ຽວຂ້ອງ ເພື່ອຫາທາງແກ້ໄຂໃຫ້ທັນສະພາບການ.

error: ເນື້ອຫາໄດ້ຮັບການປົກປ້ອງ !!