ເກຣັກ ຈະເປີດຮັບນັກທ່ອງທ່ຽວຫລາຍປະເທດໂດຍບໍ່ຕ້ອງກັກໂຕ

ອ້າງຕາມຂ່າວ ອາແຕນ ຂອງເກຣັກ, ເຈົ້າໜ້າທີ່ ລັດຖະບານ ເກຣັກ ຊີ້ແຈງວ່າ: ​ເກຣັກ ຈະເປີດຮັບ ນັກທ່ອງທ່ຽວ ຈາກຫລາຍປະເທດ ຕັ້ງແຕ່ກາງເດືອນ ມິຖຸນາ ໂດຍບໍ່ຕ້ອງ ກັກໂຕ ​ຕິດຕາມ ອາການ 14 ວັນ. ​ໃນ​ພາກການທ່ອງທ່ຽວ ກວມເອົາ ອັດຕາສ່ວນ ເສດຖະກິດ ເກຣັກ ເຖິງ 1 ໃນ 5 ​ແລະ​ ເປັນກົນໄກ ທີ່ຈະຊ່ວຍໃຫ້ ເສດຖະກິດຟື້ນຟູ ຈາກມາດຕະການ ປິດເມືອງ ເພື່ອຄວບຄຸມ ການແຜ່ລະບາດ ຂອງພະຍາດ ໂຄວິດ-19 ທີ່​ສົ່ງ​ຜົນ​ກະທົບ ເຮັດໃຫ້ ທຸລະກິດ ທັງໝົດ ຢຸດຈຶ້ງ.

ຂະນະ​ທີ່ ​ເກຣັກ ຈະໃຫ້ນັກທ່ອງທ່ຽວ ມາຈາກ 20-25 ປະເທດ ເດີນທາງເຂົ້າມາ ໄດ້ຕັ້ງແຕ່ ກາງເດືອນ ມິຖຸນານີ້ ເຊັ່ນ: ປະເທດ ໄຊປຣັດ, ອິດສະຣາແອນ, ປະເທດໃນ ເອີຣົບ ກາງປະເທດ ເທິງມະຫາສະໝຸດ ບໍຂ່ານ, ຊຶ່ງທາງການ ຈະປະກາດ ປະເທດລາຍຊື່ ທັງໝົດ ໃນອາທິດນີ້. ກ່ອນໜ້ານີ້ ນາຍົກລັດ ຖະມົນຕີ ເກຣັກ ເປີດເຜີຍວ່າ: ຈະໃຫ້ຊາວ ເຢຍລະມັນ ເຂົ້າມາທ່ອງທ່ຽວໄດ້ ຕັ້ງແຕ່ວັນທີ 15 ມິຖຸນາ ແລະ ຈະເປີດເມືອງ ເທສຊາ ໂລນີກີ ເມືອງໃຫຍ່ ອັນດັບສອງ ທາງພາກເໜືອ ຂອງປະເທດ, ເພື່ອຮັບຖ້ຽວບິນ ສາກົນ ຕັ້ງແຕ່ວັນທີ 15 ມິຖຸນານີ້ ໄວຂື້ນຈາກເດີມ ທີ່ຈະເປີດ ໃນວັນທີ 1 ກໍລະກົດ. ປັດຈຸບັນ ເກຣັກ ໃຫ້ພົນລະເມືອງ ປະເທດ ສະມາຊິກ ສະຫະພາບ ເອີຣົບ(ອີຢູ) ທັງໝົດ ຍົກເວັ້ນ ອິຕາລີ, ແອັດສະປາຍ ແລະ ໂຮນລັງ ເດີນທາງ ເຂົ້ານະຄອນ ຫລວງ ອາແຕນ ໄດ້ແລ້ວ ແຕ່ຕ້ອງກັກໂຕ 14 ວັນ, ສ່ວນຜູ້ມາຈາກ ອັງກິດ ແລະ ປະເທດ ນອກກຸ່ມອີຢູ ຍັງບໍ່ສາມາດ ເຂົ້າໄດ້. ສຳລັບ ປີກາຍ ເກຣັກ ມີນັກທ່ອງທ່ຽວ ມາຢ້ຽມຢາມ ເຖິງ 33 ລ້ານເທື່ອຄົນ ສ້າງລາຍໄດ້ 19.000 ລ້ານ ເອີໂຣ.

ຂ່າວ: ຂປລ

error: ເນື້ອຫາໄດ້ຮັບການປົກປ້ອງ !!