ຈີນ​ສາ​ມາດ​ຊ່ວຍ​ປະ​ເທດ​ດ້ອຍ​ພັດ​ທະ​ນາໃຫ້​ມີ​ວັກ​ຊີນ​ແລະ​ນຳ​ໃຊ້​ວັກ​ຊີນ​ປ້ອງກັນໂຄວິດ-19

ໃນ​ກອງ​ປະ​ຊຸມ​ຖະ​ແຫຼງ​ຂ່າວ​ທີ່​ຈັດ​ຂຶ້ນ​ໃນ​ວັນ​ທີ 15 ທັນ​ວາ​ນີ້, ທ່ານ ຫວ່າງ​ເຫວີນ​ປິ່ນ ໂຄ​ສົກ​ກະ​ຊວງ​ການ​ຕ່າງ​ປະ​ເທດ​ຈີນ​ກ່າ​ວ​ວ່າ: ສຳ​ລັບ​ປະ​ເທດ​​ດ້ອຍ​ພັດ​ທະ​ນາ​ຫຼື​ປະ​ເທດພວມ​ພັດ​ທະ​ນາ​ຈຳ​ນວນ​ໜຶ່ງ, ຈີນ​ສາ​ມາດ​ຊ່ວຍ​ປະ​ເທດ​ເຫຼົ່າ​ນີ້​​ໃຫ້ສາ​ມາດ​​ມີ​ວັກ​ຊີນ​ແລະນຳ​ໃຊ້​ຢາ​ວັກ​ຊີນ​ກັນ​ພະ​ຍາດ​ໂຄວິດ-19 ໂດຍ​ຜ່ານ​ວິ​ທີ​ການ​ຊ່ວຍ​ເຫຼືອ​ແລະ​ວິ​ທີ​ອື່ນໆ.

ທ່ານ​ ຫວ່າງ​ເຫວີນ​ປິ່ນ ​ໄດ້ໃຫ້​ຮູ້​ວ່າ: ປັດ​ຈຸ​ບັນ, ວິ​ສາ​ຫະ​ກິດ​ຜະ​ລິດ​ຢາ​ວັກ​ຊີນ​ຂອງ​ຈີນ​ພວມ​ພະ​ຍາ​ຍາມ​ສຸ​ດ​ຂີດ​ເພື່ອ​ຊຸກ​ຍູ້​ການ​ຄົ້ນ​ຄວ້າ​ແລະ​ການ​ຜະ​ລິດ​ວັກ​ຊີນ, ຢາ​ວັກ​ຊີນ​ຫຼາຍ​ຊະ​ນິດ​ໄດ້​ເຂົ້າ​ສູ່​ການ​ທົດ​ລອງ​​ທາງ​ຄິ​ລ​ນິກໄລ​ຍະ​ 3, ລັດ​ຖະ​ບານ​ຈີນ​ໄດ້​ໃຫ້​ການ​ສະ​ໜັບ​ສະ​ໜູນ​ວິ​ສາ​ຫະ​ກິດ​ຈີນ​ດຳ​ເນີນ​ການ​ຮ່ວມ​ມື​ດ້ານ​ການ​ຄົ້ນ​ຄວ້າ​ຜະ​ລິດ​ວັກ​ຊີນ​ກັບ​ບັນ​ດາ​ປະ​ເທດ​ໃນ​ໂລກ​ຢ່າງ​ຕັ້ງ​ໜ້າ​ມາ​ໂດຍ​ຕະ​ຫຼອດ.

ໃນຮູບ​ແບບ​ຫຼາຍ​ຝ່າຍ, ຈີນ​ໄດ້​ຮັກ​ສາ​ການ​ຕິດ​ຕໍ່​ພົວ​ພັນ​ແລະ​ການ​ປະ​ສານ​ງານ​ທີ່​ແໜ້ນ​ແຟ້ນ​ກັບອົງ​ການ​ອະ​ນາ​ໄມ​ໂລກ​ແລະ​ສະ​ຫະ​ພັນ​​ວັກ​ຊີນ​ແລະ​ພູມ​ຕ້ານ​ທານ​ໂລກ​ມາ​ໂດຍ​ຕະ​ຫຼອດ.

ທ່ານ ຫວ່າງ​ເຫວີນ​ປິ່ນ ຊີ້​ໃຫ້​ເຫັນ​ວ່າ: ໃນ​ຕໍ່​ໜ້າ, ລັດ​ຖະ​ບານ​ຈີນ​ຈະ​ສືບ​ຕໍ່​​ພະ​ຍາ​ຍາມຮ່ວມ​ກັບ​ປະ​ຊາ​ຄົມ​ໂລກ,ເພື່ອ​ປະ​ກອບ​ສ່ວນ​ຂອງ​ຕົນ​ເຂົ້າໃນ​ການ​ຮັບ​ປະ​ກັນ​ໃຫ້​ປະ​ເທດ​ທັງ​ໝົດ​ລ້ວນ​ແຕ່ມີ​ໂອ​ກາດ​ທີ່​ເທົ່າ​ທຽມ​ກັນ​ທີ່​ຈະໄດ້​ຮັບ​ວັກ​ຊີນ​ທີ່​ປອດ​ໄພ​ແລະ​ມີ​ປະ​ສິດ​ທິ​ຜົນ.

error: ເນື້ອຫາໄດ້ຮັບການປົກປ້ອງ !!