ໂຮມຊຸມນຸມໃຫຍ່ ສະເຫລີມສະຫລອງວັນສະຖາປານາ ສປປ ລາວ ຄົບຮອບ 45 ປີ ແລະ ວັນເກີດປະທານໄກສອນ ພົມວິຫານ ຄົບຮອບ 100 ປີ

ບັນດາການນຳ, ອະດິດການນຳພັກ-ລັດ, ພະເຖລະນຸເຖລະ, ພ້ອມດ້ວຍອົງການຈັດຕັ້ງມະຫາຊົນຕ່າງໆ ຈຳນວນ 700 ກວ່າຄົນ ໄດ້ມາເຕົ້າໂຮມກັນ ຢູ່ທີ່ຫໍປະຊຸມ ແຫ່ງຊາດ, ນະຄອນຫລວງວຽງຈັນ ໃນຕອນເຊົ້າ ວັນທີ 2 ທັນວາ 2020 ເພື່ອສະເຫລີມສະຫລອງ ວັນສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 45 ປີ (2/12/1975-2/12/2020) ແລະ ວັນເກີດຂອງ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກ ຂອງປຊົນລາວທັງຊາດ ຄົບຮອບ 100 ປີ, ທັງນີ້ ກໍເພື່ອເປັນການສະແດງ ເຖິງຄວາມເຄົາລົບຮັກ, ຄວາມກະຕັນຍູ-ຮູ້ບຸນຄຸນ, ຄຸນງາມຄວາມດີ ແລະ ຜົນງານອັນໃຫຍ່ຫລວງ ຂອງບັນພະບູລຸດລາວ ທີ່ໄດ້ອຸທິດຕົນ ເພື່ອປະເທດຊາດ ແລະ ການປະຕິວັດ ໃນໄລ ຍະຜ່ານມາ ຈົນສາມາດປົດປ່ອຍປະເທດຊາດ ໄດ້ຢ່າງສົມບູນ  ແລະ ສະຖາປະນາ ເປັນສາທາລະນະລັດ ປະຊາທິປະໄຕ ປະຊາຊົນລາວ ຈົນເທົ່າທຸກວັນນີ້.

ໃນໂອກາດດຽວກັນນີ້, ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານສູນກາງພັກ ປະທານປະເທດ ແຫ່ງ ສປປ ລາວ ໄດ້ກ່າວສຸນທອນພົດ ໂດຍມີເນື້ອໃນ ບາງຕອນສຳຄັນວ່າ: ໃນມື້ນີ້ ເປັນມື້ທີ່ມີ ຄວາມໝາຍຄວາມສຳຄັນຢ່າງຍິ່ງ ພວກເຮົາຮູ້ສຶກອາໄລອາວອນ ແລະ ຄິດຄະນຶງຫາ ປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກ, ລູກຫລານຜູ້ປະເສີດ ຂອງປະຊາຊົນລາວ, ຜູ້ນຳພາກໍ່ຕັ້ງ, ຖະນຸບຳລຸງ, ກໍ່ສ້າງພັກ ແລະ ນຳພາພາລະກິດຕໍ່ສູ້ກູ້ຊາດ ຜູ້ນຳພາສ້າງຕັ້ງລະບອບໃໝ່ ລະບອບປະ ຊາທິປະໄຕ ປະຊາຊົນ ເຊິ່ງໄດ້ຂຽນໄວ້ໃນ ໜ້າປະຫວັດສາດຍຸກໃໝ່ ຂອງຊາດລາວວິລະຊົນ. ພ້ອມກັນນີ້ ກໍມີຄວາມອາໄລອາວອນ ແລະ ຈົດຈຳລ້ຳລຶກ ເຖິງວິລະກຳອັນລ້ຳເລີດ, ຄຸນງາມຄວາມດີ ແລະ ການເສຍ ສະຫລະອັນໃຫຍ່ຫລວງ ຂອງບັນດາຜູ້ນຳແຕ່ລະຮຸ່ນ. ພະນັກງານນັກຮົບປະຕິວັດ, ຜູ້ຮັກຊາດ ແລະ ປະ ຊາຊົນລາວບັນດາເຜົ່າ ທີ່ໄດ້ອຸທິດຊີວິດ, ເລືອດເນື້ອ, ເຫື່ອແຮງ, ສະຕິປັນຍາ ແລະ ວັດຖຸຊັບສິນ ເພື່ອພາລະກິດປະຕິວັດ ຕະຫລອດໄລຍະແຫ່ງ ການປະຕິວັດຊາດ ປະຊາທິປະໄຕ ກໍ່ຄືພາລະກິດແຫ່ງ ການປົກປັກຮັກສາ ແລະ ສ້າງສາພັດທະນາ ປະເທດຊາດ ເພື່ອຄວາມເປັນເອກະລາດແຫ່ງຊາດ ແລະ ຄວາມສົມ ບູນພູນສຸກ ຂອງ ລູກຫລານລາວ.

ກ່ອນໜ້ານີ້ 45 ປີ ພາຍໃຕ້ກະແສຟອງ ການລຸກຮື້ຂຶ້ນ ຂອງປະຊາຊົນລາວ ພາຍໃຕ້ການນໍາພາ ຂອງພັກ ປະຊາຊົນປະຕິວັດລາວ, ອຳນາດການປົກຄອງເກົ່າ ທີ່ເປັນລູກ ສະໝຸນ ຂອງພວກລ່າເມືອງຂຶ້ນ ແລະ ກົງຈັກ ຂອງລະບອບສັກດີນາຂາຍຊາດ ໃນລະດັບທ້ອງຖິ່ນ ຮາກຖານທົ່ວປະເທດ ໄດ້ຖືກທັບມ້າງ, ອຳນາດການປົກຄອງໃໝ່ ຂອງປະຊາຊົນ ໄດ້ຮັບການຈັດຕັ້ງຂຶ້ນ, ສ້າງສະພາບແວດລ້ອມ ແລະ ເງື່ອນໄຂອັນສຸກງອມ “ພັນປີມີເທື່ອໜຶ່ງ” ໃຫ້ແກ່ການຍຶດອຳນາດ ການປົກຄອງຢ່າງສົມບູນ ມາສູ່ກຳມື ຂອງປະຊາຊົນ ຜູ້ອອກແຮງງານ. ຈາກນັ້ນ, ພາຍໃຕ້ການນຳພາໂດຍກົງ ຂອງສູນກາງພັກ ເຊິ່ງມີປະທານໄກສອນ ພົມວິ ຫານ ເປັນຫົວໜ້າ, ກອງປະຊຸມໃຫຍ່ຜູ້ແທນ ປະຊາຊົນ ທົ່ວປະເທດ ໄດ້ໄຂຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975 ເພື່ອປະກາດລົບລ້າງ ອຳນາດການປົກຄອງເກົ່າ, ສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ, ເປີດສັງກາດໃໝ່ແຫ່ງເອກະລາດ, ອິດສະຫລະພາບ ແລະ ຄວາມເປັນເຈົ້າອັນແທ້ຈິງ ຂອງປະຊາຊົນລາວບັນດາເຜົ່າ ຕິດພັນກັບເສັ້ນທາງກ້າວຂຶ້ນ ສູ່ຈຸດໝາຍ ສັງຄົມນິຍົມ.

ປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກ ຂອງປະຊາຊົນລາວ ໄດ້ຢືນຢັນຕະຫລອດວ່າ: “ ວັນທີ 2 ທັນວາ ເປັນວັນໄຊຊະນະປະຫວັດການ ທີ່ມີຄວາມໝາຍ ຍຸກສະໄໝ ອັນເລິກເຊິ່ງ, ເປັນໝາກຜົນລວມຍອດ ແຫ່ງການຕໍ່ສູ້ປະຕິວັດ ທີ່ເຕັມໄປດ້ວຍ ຄວາມເສຍສະຫລະ, ຄວາມທຸກຍາກລຳບາກ ຕະຫລອດຫລາຍສິບປີ ຂອງປະຊາຊົນເຮົາ ພາຍໃຕ້ການນຳພາຂອງ ພັກກອມມູນິດອິນດູຈີນ ໃນເມື່ອກ່ອນ ແລະ ພັກປະຊາຊົນ ປະຕິວັດລາວ ໃນປະຈຸບັນ”. ພວກເຮົາເອກອ້າງ ແລະ ພາກພູມໃຈ ທີ່ເຫັນວ່າການພັດທະນາ ພື້ນຖານວັດຖຸ-ເຕັກນິກ ໄດ້ບັນລຸໝາກຜົນ ທີ່ສຳຄັນອັນໃຫຍ່ຫລວງ ເປັນຕົ້ນ ດ້ານພື້ນຖານໂຄງລ່າງ ເສດຖະກິດ-ສັງຄົມ ທີ່ສ້າງຄວາມອາດສາມາດ ຕົວຈິງ ໃຫ້ປະເທດເຮົາ ເຊື່ອມຈອດກັບ ບັນດາປະເທດໃກ້ຄຽງ ແລະ ເຊື່ອມໂຍງເສດຖະກິດ ເຂົ້າກັບພາກພື້ນ ແລະ ສາກົນ, ເຊິ່ງສາມາດປົດປ່ອຍປະເທດເຮົາ ທີ່ເປັນປະເທດບໍ່ມີ ຊາຍແດນຕິດຈອດ ກັບທະເລ ກາຍເປັນປະເທດ ເຊື່ອມຈອດ-ເຊື່ອມໂຍງ ກັບປະເທດເພື່ອນບ້ານ ແລະ ສາກົນ, ອັນພົ້ນເດັ່ນແມ່ນ ການເຊື່ອມຈອດ ເສັ້ນທາງລົດ ແລະ ທາງລົດໄຟ ລະຫວ່າງ ສປປ ລາວ ກັບປະເທດໃກ້ຄຽງ ຕາມເລວທາງເສດຖະກິດ ເໜືອ-ໃຕ້, ຕາເວັນອອກ-ຕາເວັນຕົກ ເຊິ່ງຖືເປັນທ່າແຮງ ໃນການບໍລິການທາງຜ່ານ ຢູ່ປະເທດເຮົາ. ພ້ອມນີ້, ພື້ນຖານ ອຸດສາຫະກຳ ຂະແໜງພະລັງງານ, ບໍ່ແຮ່, ກະສິກຳ-ປ່າໄມ້, ວິທະຍາສາດ-ເຕັກນິກ-ເຕັກໂນໂລຊີ ຮັບໃຊ້ການຜະລິດ-ການບໍລິການ ແລະ ບໍລິຫານຄຸ້ມຄອງລັດ ຕາມທິດຫັນ ເປັນທັນສະໄໝ ກໍມີໜໍ່ແໜງ ແລະ ໄດ້ຮັບການພັດທະນາ ພົ້ນເດັ່ນຂຶ້ນ.

ສະຫາຍ ບຸນຍັງ ວໍລະຈິດ  ໄດ້ກ່າວຕື່ມວ່າ: ເພື່ອສືບຕໍ່ເສີມຂະຫຍາຍ ເຂົ້າໃນການປົກປັກຮັກສາ ແລະ ສ້າງສາພັດທະນາ ປະເທດຊາດ ພວກເຮົາຈົ່ງພ້ອມກັນຍຶດໝັ້ນ ແນວທາງການ ປ່ຽນແປງໃໝ່ຮອບ ດ້ານ ແລະ ມີຫລັກການຂອງພັກ ຢ່າງເດັດດ່ຽວໜຽວແໜ້ນ; ຍຶດໝັ້ນຖືເອົາການພັດທະນາ ເສດຖະກິດເປັນ ໃຈກາງ ໂດຍ ຕິດພັນກັບການ ພັດທະນາສັງຄົມ, ການອະນຸລັກຮັກສາ ວັດທະນະທຳອັນດີງາມ ຂອງຊາດ ແລະ ການປົກປັກ ຮັກສາສິ່ງແວດລ້ອມ ຕາມທິດຍືນຍົງ; ການຫັນລົງກໍ່ສ້າງຮາກຖານການເມືອງ ແລະ ພັດທະນາຊົນນະບົດ ຮອບດ້ານຢ່າງແຂງແຮງ ຕໍ່ເນື່ອງຕາມ 4 ເນື້ອໃນ 4 ຄາດໝາຍເປັນມາດຕະຖານ ຍຸດທະສາດຍາວນານ ແນໃສ່ປັບປຸງລະບົບການເມືອງ ຢູ່ຂັ້ນຮາກຖານ ໜັກແໜ້ນເຂັ້ມແຂງ, ສຸມໃສ່ແກ້ໄຂຄວາມທຸກຍາກ ຂອງປະຊາ ຊົນ; ພ້ອມກັນນີ້, ພ້ອມກັນເພີ່ມທະວີ ຄວາມສາມັກຄີ ເປັນປຶກແຜນແໜ້ນໜາ ຂອງທົ່ວປວງຊົນລາວບັນດາເຜົ່າ ພາຍໃຕ້ການ ນຳພາຂອງພັກ; ເພີ່ມທະວີຄວາມສາມາດນຳພາ ແລະ ກຳລັງແຮງຂອງພັກແຕ່ລະຂັ້ນ; ເຊີດຊູບົດບາດ ແລະ ຄວາມສາມາດນຳພາຂອງພັກ ໄປຄຽງຄູ່ກັບການຍົກສູງ ຄວາມເປັນ ແບບຢ່າງນຳໜ້າ ຂອງຖັນແຖວສະມາຊິກພັກ ເດັດດ່ຽວແກ້ໄຂ ປະກົດການຫຍໍ້ທໍ້ ທີ່ເກີດຂຶ້ນຢູ່ໃນການ ຈັດຕັ້ງຂອງພັກ-ລັດ ກໍຄືຖັນແຖວສະມາຊິກ ພັກ-ພະນັກງານ ຢ່າງທັນການ; ແລະ ຢຶດໝັ້ນແນວ ທາງການຕ່າງປະເທດ ສັນຕິພາບ, ເອກະລາດ,  ມິດຕະພາບ ແລະ ການຮ່ວມມືຢ່າງສະເໝີ ຕົ້ນສະເໝີປາຍ, ເປັນເຈົ້າການ ແລະ ຕັ້ງໜ້າ ເຊື່ອມໂຍງກັບພາກພື້ນ ແລະ ສາກົນ, ເປີດກວ້າງການພົວພັນຮ່ວມມື ກັບບັນດາປະເທດໃກ້ຄຽງ ກໍຄືບັນດາ ປະເທດປະຊາຄົມອາຊຽນ, ປະເທດເພື່ອນມິດໃນໂລກ ແລະ ອົງການ ຈັດຕັ້ງສາກົນ ພິເສດແມ່ນເສີມ ຂະຫຍາຍສາຍພົວພັນ ອັນເປັນມູນເຊື້ອ, ຄວາມສາມັກຄີຖານ ສະຫາຍຮ່ວມອຸດົມ ການສັງຄົມນິຍົມ ກັບບັນດາ ປະເທດເພື່ອນມິດຍຸດທະສາດ.

ຂ່າວ: ມະນີທອນ, ພາບ: ເກດສະໜາ ຂປລ

error: ເນື້ອຫາໄດ້ຮັບການປົກປ້ອງ !!