ມີຜູ້ໂດຍສານເດີນທາງມານຳກັນທັງໝົດ111ຄົນ ທີ່ຮ່ວມເດີນທາງໃນຖ້ຽວບິນທີ່ມີຜູ້ຕິດເຊື້ອໂຄວິດໃໝ່14ຄົນ

ຄະນະສະເພາະກິດຄວບຄຸມ, ປ້ອງກັນ ແລະ ແກ້ໄຂການລະບາດຂອງພະຍາດໂຄວິດ-19 ໂດຍຮອງລັດຖະມົນຕີ ກະຊວງສາທາລະນະສຸກ, ທ່ານ ດຣ. ພູທອນ ເມືອງປາກໄດ້ຖະແຫຼງຂ່າວດ່ວນ ໃນຕອນແລງຂອງວັນທີ 23 ພະຈິກ 2020 ວ່າ, ພົບຜູ້ຕິດເຊື້ອໂຄວິດ-19 ໃໝ່ໃນລາວ ເພີ່ມອີກ 14 ກໍລະນີ ໃນມື້ວັນທີ 22 ພະຈິກທີ່ຜ່ານມາ ຊຶ່ງໄດ້ເດີນທາງມາແຕ່ຕ່າງປະເທດ ແລະ ໄດ້ນໍາຕົວໄປຮັກສາຢູ່ໂຮງໝໍມິດຕະພາບແລ້ວ. 14 ກໍລະນີ ດັ່ງກ່າວ, ໃນນັ້ນ ເປັນຄົນສັນຊາດລາວ 1 ຄົນ ແລະ ຕ່າງປະເທດ 13 ຄົນ (ຍິງ 3 ຄົນ), ໃນນັ້ນມີເດັກ 1 ຄົນ ອາຍຸ 12 ປີ (ເດັກຊາຍ) ຊຶ່ງເປັນບຸກຄົນທຳອິດທີ່ມີເກນອາຍຸຕໍ່າສຸດສຳລັບຜູ້ຕິດເຊື້ອໂຄວິດ-19 ທີ່ກວດພົບຢູ່ ສປປ ລາວ ແລະ ສູງສຸດ 51 ປີ. ທ່ານ ດຣ. ພູທອນ ເມືອງປາກໃຫ້ຮູ້ຕື່ມວ່າ:

14 ກໍລະນີທີ່ກວດພົບເຊື້ອພະຍາດດັ່ງກ່າວເຂົາເຈົ້າໄດ້ເດີນທາງມາດ້ວຍຍົນ 2 ຖ້ຽວ ໂດຍຜ່ານສະໜາມບິນສາກົນວັດໄຕ ລວມ 2 ຖ້ຽວບິນ ມີຜູ້ໂດຍສານທັງໝົດ 111 ຄົນ (ຖ້ຽວບິນຖ້ຽວທໍາອິດ 62 ຄົນ ແລະ ຖ້ຽວທີ 2 ມີ 49 ຄົນ). ໃນເວລາຜ່ານສະໜາມບິນສາກົນວັດໄຕ ໄດ້ມີການກວດຫາເຊື້ອພະຍາດດັ່ງກ່າວແຕ່ບໍ່ພົບອາການໃດໆ ແຕ່ເມື່ອນໍາຜົນການເກັບຕົວຢ່າງມາກວດຄືນຈຶ່ງພົບເຊື້ອພະຍາດດັ່ງກ່າວ. ປັດຈຸບັນນີ້ຢູ່ລາວພົບຜູ້ຕິດເຊື້ອພະຍາດສະສົມແລ້ວ 39 ກໍລະນີ ໃນນີ້ 23 ກໍລະນີ ໄດ້ປິ່ນປົວຫາຍດີ ແລະ ອະນຸຍາດໃຫ້ກັບບ້ານແລ້ວ ຍັງສືບຕໍ່ປິ່ນປົວຢູ່ໂຮງໝໍມິດຕະພາບ 16 ຄົນ (ເກົ່າ 2 ຄົນ: ກໍລະນີທີ 24 ແລະ 25 ແລະ ໃໝ່ 14 ຄົນ).

ມາອີກຮອບຈາກຕ່າງປະເທດ “ວັນນີ້ 23 ພະຈິກ 2020, ກະຊວງສາທາລະນະສຸກແຫ່ງ ສປປລາວ ຢືນຢັນກວດ​ພົບ​ຜູ້​ຕິດ​ເຊື້ອ​ COVID-19 ເພີ່ມ​ໃນວັນນີ້ວັນດຽວ (+)14 ກໍລະນິ (ຄົນລາວ 01 ຄົນ ແລະ ຄົນຕ່າງປະເທດ 13 ຄົນ) ແລະ ປັດຈຸບັນທັງໝົດ 14 ຄົນໄດ້ແຍກປ່ຽວ ​ເພື່ອປິ່ນປົວຢູ່ໂຮງໝໍມິດຕະພາບ 150 ຕຽງ.” ທ່ານ ພູທອນ ເມືອງປາກ ຮອງລັດຖະມົນຕີ ກະຊວງສາທາລະນະສຸກ ລາຍງານໃຫ້ຮູ້ວ່າ:

1. ສປປລາວ ກວດ​ພົບ​ຜູ້​ຕິດ​ເຊື້ອ​ໂຄ​ວິດ-19 ​ເພີ່ມ​ (+) 14 ກໍລະນີ (ເພດຍິງ 03 ຄົນ), ເຊີ່ງໃນນັ້ນມີອາຍຸຕໍ່າສຸດ 12 ປີ (ເດັກນ້ອຍເພດຊາຍຄົນຕ່າງປະເທດ) ແລະ ສູງສຸດ 51 ປີ,

2. ວັນທີ 22 ພະຈິກ 2020, ມີຜູ້ເດີນທາງເຂົ້າມາ ສປປລາວ ແລະ ໄດ້ເກັບຕົວຢ່າງມາກວດວິເຄາະ ທັງໝົດ 514 ຕົວຢ່າງ (ກວດພົບເຊື້ອ 14 ຕົວຢ່າງຈາກຜູ້ໂດຍສານເຮືອບິນເຊົ່າເໝົາລຳຈຳນວນ 02 ຖ້ຽວບິນ ທີ່ຕົ້ນທາງຍັງມີການລະບາດເຊື້ອພະຍາດ),

3. ຮຽກຮ້ອງໃຫ້ທຸກພາກສ່ວນໃນສັງຄົມ: ຢ່າແຕກຕື່ນ ແລະ ພ້ອມກັນເປັນເຈົ້າການສືບຕໍ່ປະຕິບັດ ແຈ້ງການຂອງຫ້ອງວ່າການ ສຳນັກງານນາຍົກລັດຖະມົນຕີ ທີ່ໄດ້ວາງອອກ, ນັບທັງຄຳແນະນຳຂອງຂະແໜງການກ່ຽວຂ້ອງ ຢ່າງເຄັ່ງຄັດ ປະຕິບັດມາດຕະການປ້ອງກັນການຕິດເຊື້ອ ຢ່າງຖືກຕ້ອງ ແລະ ເຂັ້ມງວດ,

4. ເປັນຕົ້ນ ແມ່ນການໃສ່ຜ້າອັດປາກດັງ ເມື່ອທ່ານອອກຈາກບ້ານ, ການລ້າງມືດ້ວຍນ້ຳສະອາດໃສ່ສະບູ ຫລື ເຈວລ້າງມືຂ້າເຊື້ອເລື້ອຍໆ, ປະຕິບັດການດຳລົງຊີວິດປົກກະຕິແບບໃໝ່ ໃຫ້ກາຍເປັນຄວາມຊິນເຄີຍ, ທັງໝົດນີ້ ກໍ່ແມ່ນເພື່ອຊ່ວຍກັນຂ້າມຜ່ານວິກິດນີ້ໄປນຳກັນ ເພື່ອໃຫ້ການລະບາດຂອງ​ພະຍາດ​ນີ້, ໃນປະເທດຂອງພວກເຮົາ ບໍ່ຂະຫຍາຍເປັນວົງກວ້າງ.

ລັດຖະບານປະຊຸມດ່ວນ ພິຈາລະນາຖີ່ຖ້ວນຕໍ່ການອະນຸມັດໃຫ້ຍົນເຊົ່າເໝົາຈາກປະເທດທີ່ມີການລະບາດຂອງພະຍາດໂຄວິດ-19 ຄະນະສະເພາະກິດ ໄດ້ຖະແຫຼງຂ່າວ ໃນວັນທີ 23 ພະຈິກ 2020, ໂດຍ ທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ໄດ້ລາຍງານກ່ຽວກັບຜູ້ຕິດເຊື້ອໃໝ່ ທັງ 14 ກໍລະນີ, ໃນນັ້ນ ຄົນລາວ 1 ຄົນ, ຄົນຕ່າງປະເທດ 13 ຄົນ(ເພດຊາຍ 11 ຄົນ,ຍິງ 3 ຄົນ)

ທັງໝົດແມ່ນເດີນທາງມາຈາກຕ່າງປະເທດ. ຈາກການກວດເບື້ອງຕົ້ນ ທຸກຄົນແມ່ນມີອາການປົກກະຕິ (ບໍ່ສະແດງອາການຫຍັງເຊັ່ນ: ຫວັດ, ໄຂ້, ໄອ, ອຸນຫະພູມສູງ) ແຕ່ກວດພົບເຊື້ອ. ທັງໝົດ 14 ຄົນ ແມ່ນໄດ້ຖືກນຳໄປປິ່ນປົວແຍກປ່ຽວ ຢູ່ໂຮງໝໍມິດຕະພາບ ຈາກກໍລະນີດັ່ງກ່າວນີ້, ທ່ານ ພູທອນ ຍັງໄດ້ເປີດເຜີຍວ່າ:

ທາງ ພັກ ແລະ ລັດຖະບານ ກໍ່ໄດ້ມີຄວາມເປັນຫ່ວງເປັນໃຍ ແລະ ທ່ານນາຍົກລັດຖະມົນຕີ ກໍ່ໄດ້ຮຽກປະຊຸມຄະນະສະເພາະກິດດ່ວນ ເພື່ອໃຫ້ທິດຊີ້ນຳໃນຫຼາຍບັນຫາ ເຊີ່ງໜື່ງໃນນັ້ນ ແມ່ນໃຫ້ຄະນະສະເພາະກິດ ພິຈາລະນາຖີ່ຖ້ວນຕໍ່ການອະນຸມັດໃຫ້ຍົນເຊົ່າເໝົາລຳຈາກປະເທດທີ່ມີການລະບາດຂອງໂຄວິດ-19 ລວມທັງການອອກວີຊ່າໃຫ້ກັບຄົນຕ່າງປະເທດ ທີ່ຢູ່ປະເທດກຳລັງມີການລະບາດພະຍາດໂຄວິດ-19.

ພ້ອມນີ້, ຍັງຮຽກຮ້ອງໃຫ້ທຸກພາກສ່ວນໃນສັງຄົມ ໃຫ້ເພີ່ມສະຕິໃນການປ້ອງກັນການລະບາດເຮັດແນວໃດບໍ່ໃຫ້ມີການລະບາດມາອີກຮອບໃໝ່; ເອົາໃຈໃສ່ໃນການໂຄສະນາເຜີຍແຜ່ວິທີປ້ອງກັນການຕິດເຊື້ອໃຫ້ປະຊາຊົນຮັບຮູ້ຢ່າງທົ່ວເຖິງຫຼາຍກວ່າເກົ່າ.

error: ເນື້ອຫາໄດ້ຮັບການປົກປ້ອງ !!