ອົງການອະນາໄມໂລກເຕືອນ ໂຄວິດ-19 ຍັງບໍ່ຈົບງ່າຍໆ

ລາວ ແລະ ອີກຫຼາຍປະເທດໃນທົ່ວໂລກເລີ່ມຜ່ອນຜັນມາດຕະການຄວບຄຸມການລະບາດຂອງໄວຣັດໂຄໂຣນາສາຍພັນໃໝ່ແລ້ວ. ສ່ວນອົງການອະນາໄມໂລກເຕືອນວ່າ ການລະບາດໃຫຍ່ຄັ້ງນີ້ຍັງບໍ່ຈົບງ່າຍໆໃນອະນາຄົດອັນໃກ້ນີ້ ໂດຍສະເພາະຫຼັງຈາກທີ່ຈຳນວນຜູ້ຕິດເຊື້ອລາຍໃໝ່ໃນຮອບ 24 ຊົ່ວໂມງທີ່ຜ່ານມາ ເພີ່ມຂຶ້ນສູງສຸດນັບຕັ້ງແຕ່ມີການລະບາດມາ.

ອົງການອະນາໄມໂລກກ່າວວ່າ ຈຳນວນຜູ້ຕິດເຊື້ອໃໝ່ໃນທົ່ວໂລກວັນທີ 20 ພຶດສະພາ 2020 ມີຫຼາຍເຖິງ 106,000 ກໍລະນີ ນັບເປັນຈຳນວນທີ່ຫຼາຍທີ່ສຸດຕັ້ງແຕ່ມີການລາຍງານມາ. ຂະນະທີ່ຈຳນວນຄົນເຈັບສະສົມທົ່ວໂລກແຕະ 5 ລ້ານລາຍແລ້ວໃນວັນທີ 21 ພຶດສະພາ ແລະ ຜູ້ເສຍຊີວິດມີຫຼາຍກວ່າ 334,00 ກໍລະນີ ຈາກການລາຍງານຂອງ Worldometers.

ສະຫະລັດອາເມລິກາເປັນປະເທດທີ່ມີການລະບາດຮຸນແຮງຫຼາຍທີ່ສຸດ ໂດຍມີຜູ້ຕິດເຊື້ອກວ່າ 1.6 ລ້ານລາຍ ແລະ ມີຜູ້ເສຍຊີວິດ 96,000 ລາຍ.

ທ່ານ ເທດຣອສ ອາດານອມ ເກເບຣເຢຊຸສ ຜູ້ອຳນວຍການໃຫຍ່ອົງການອະນາໄມໂລກ ສະແດງຄວາມເປັນຫ່ວງສະຖານະການລະບາດໃນກຸ່ມປະເທດລາຍໄດ້ໜ້ອຍ ແລະ ປານກາງເປັນພິເສດ. ຜູ້ຊ່ຽວຊານດ້ານພະຍາດລະບາດໃຫ້ຄວາມເຫັນວ່າ ຈຳນວນຜູ້ຕິດເຊື້ອທີ່ແທ້ຈິງນັ້ນ ໜ້າຈະມີຫຼາຍກວ່າຕົວເລກທີ່ມີການລາຍງານຫຼາຍ ເພາະຫຼາຍປະເທດທົ່ວໂລກມີອັດຕາການກວດຫາເຊື້ອໜ້ອຍຕໍ່ປະຊາກອນທັງໝົດ.

ທ່ານ ເທດຣອສ ກ່າວໃນການຖະແຫຼງຂ່າວເມື່ອວັນທີ 20 ພຶດສະພາ ວ່າ “ເກືອບ 2 ໃນ 3 ຂອງຜູ້ຕິດເຊື້ອໃໝ່ຢູ່ໃນ 4 ປະເທດເທົ່ານັ້ນ”, ທ່ານກ່າວພ້ອມທັງສົ່ງຄຳເຕືອນເຖິງທຸກປະເທດວ່າ “ການລະບາດໃຫຍ່ຄັ້ງນີ້ຈະດຳເນີນໄປອີກດົນກວ່າຈະສິ້ນສຸດ.” ຄຳເຕືອນຂອງຜູ້ອຳນວຍການໃຫຍ່ອົງການອະນາໄມໂລກມີຂຶ້ນຂະນະທີ່ຫຼາຍປະເທດລວມທັງສະຫະລັດອາເມລິກາເລີ່ມຜ່ອນຜັນມາດຕະການຄວບຄຸມພະຍາດ.

ຂໍຂອບໃຈ

ຂໍ້ມູນ : BBC Worldometers ແລະ Muan.la

error: ເນື້ອຫາໄດ້ຮັບການປົກປ້ອງ !!