ບໍລິສັດ ເບຍລາວ ສາມາດສ້າງລາຍຮັບເຂົ້າລັດປີລະຫລາຍຕື້ກີບ

ທ່ານ ສູນທອນ ພົມມະຈັກ ປະທານ ບໍລິສັດ ເບຍລາວ ຈໍາກັດ ຖະແຫລງຕໍ່ສື່ມວນຊົນ ກ່ຽວກັບຜົນງານ 45 ປີ ຂອງບໍລິສັດເບຍລາວ ໃນວັນທີ 12 ພະຈິກ 2020 ນີ້ວ່າ: ໃນໄລຍະຜ່ານມາ ບໍລິສັດ ໄດ້ສ້າງລາຍຮັບໃຫ້ແກ່ງົບປະມານແຫ່ງຊາດເປັນອັນດັບໜຶ່ງ, ຊຶ່ງປີໜຶ່ງລັດຖະ ບານມີລາຍຮັບທາງກົງຈາກບໍລິສັດເຖິງ 2.000 ຕື້ກວ່າກີບ.

ພ້ອມນີ້ ລັດຖະບານມີລາຍຮັບທາງອ້ອມໂດຍການມອບເປັນພັນທະຈາກຕົວແທນຈໍາໜ່າຍຮ້ານຄ້າ ແລະ ຮ້ານບໍລິການໃນທົ່ວປະເທດຫຼາຍຮ້ອຍຕື້ກີບ, ເປັນບໍລິສັດນໍາໜ້າໃນການນໍາໃຊ້ເຕັກໂນໂລຊີທັນຍຸກທັນສະໄໝມມາຕະ ຫລອດ, ທັງເປັນແບບຢ່າງໃນການຜັນຂະຫຍາຍແນວທາງນະໂຍບາຍການປ່ຽນແປງໃໝ່ ທາງດ້ານເສດຖະກິດຂອງພັກ ແລະ ລັດຖະບານ, ມີການຮ່ວມມືກັບບໍລິສັດຊັ້ນນໍາຂອງໂລກ ຄື:

ບໍລິສັດຄາສເບີກ ຈາກປະເທດເດນມາກທີ່ມີປະສົບການມາຫລາຍກວ່າ 170 ປີ, ທັງມີ ການຮ່ວມມື ແລະ ລົງທຶນຢູ່ຫລາຍກວ່າ 150 ປະເທດໃນທົ່ວໂລກ.

ບໍລິສັດ ເບຍລາວ ຈໍາກັດ ໄດ້ຮັບການສ້າງຕັ້ງຂຶ້ນໃນປີ 1973 ເພື່ອຜະລິດ ແລະ ຈໍາໜ່າຍ ເບຍ, ນໍ້າກ້ອນ ແລະ ນໍ້າອັດລົມ ຊຶ່ງມີກໍາລັງການຜະລິດທັງໝົດ 3 ລ້ານລິດ/ປີ. ປີ 2020, ເບຍລາວ ໄດ້ກາຍເປັນບໍລິສັດໃຫຍ່ລະດັບຊາດ ທີ່ມີໂຮງງານຢູ່ 3 ແຫ່ງ ຄື: ຢູ່ນະຄອນຫລວງວຽງຈັນ 2 ແຫ່ງ ແລະ ແຂວງ ຈໍາປາສັກ 1 ແຫ່ງ.

ສ່ວນໃນອະນາຄົດ ບໍລິສັດ ກໍມີແຜນຂະຫຍາຍໂຮງງານຢູ່ ແຂວງຫລວງພະບາງ ຕື່ມອີກ.

error: ເນື້ອຫາໄດ້ຮັບການປົກປ້ອງ !!