ລັດຖະບານ ຄວນມີມາດຕະການແກ້ໄຂ ບັນຫາແຮງງານ ທີ່ຫວ່າງງານໃນໄລຍະຍາວ

ສູນກາງສະຫະພັນ ກຳມະບານລາວ ໄດ້ສະເໜີໃຫ້ລັດຖະບານ ສຸມໃສ່ຄົ້ນຄວ້າສຳລັບມາດຕະການ ແກ້ໄຂບັນຫາແຮງງານ ທີ່ຫວ່າງງານໃນໄລຍະຍາວ ເພື່ອປົກປ້ອງຜູ້ອອກແຮງງານ ໃຫ້ໄດ້ຮັບຄວາມຍຸຕິທຳ ເນື່ອງຈາກພະຍາດ ໂຄວິດ-19 ທີ່ກໍາລັງລະບາດ ໃນທົ່ວໂລກ ແລະ ຍັງສືບຕໍ່ມີຄວາມສ່ຽງຕໍ່ ການລະບາດ ຢູ່ປະເທດເຮົາ. ພ້ອມນັ້ນ ຜົນກະທົບຕໍ່ ເສດຖະກິດ-ສັງຄົມ  ກໍຍັງສືບຕໍ່ພົບ ຄວາມຫຍຸ້ງຍາກ ໂດຍສະເພາະ ກຳມະກອນ ແລະ ຊາວຜູ້ອອກແຮງງານ ທີ່ອາໄສເງິນເດືອນ ໃນການດຳລົງຊີວິດພຽງຢ່າງດຽວ, ທ່ານ ພອນສານ ວິໄລເມັ້ງ ຫົວໜ້າກົມປົກປ້ອງແຮງງານ ສູນກາງສະຫະພັນກຳ ມະບານລາວ ໃຫ້ສຳພາດກັບນັກຂ່າວສຳນັກຂ່າວ ສານປະເທດລາວ ໃນວັນທີ 18 ພຶດສະພາ 2020 ທີ່ສູນກາງສະຫະພັນ ກໍາມະບານລາວ.

ທ່ານ ພອນສານ ວິໄລເມັ້ງ ແຈ້ງໃຫ້ຮູ້ວ່າ: ໃນນາມອົງການກຳມະບານ ເຊິ່ງເປັນຕົວແທນ ຂອງຊາວຜູ້ອອກ ແຮງງານ ເຮັດໜ້າທີ່ ໃນການປົກປ້ອງສິດ ແລະ ຜົນປະໂຫຍດອັນຊອບທຳ ຂອງກຳມະ ກອນ ແລະ ຊາວຜູ້ອອກ ແຮງງານ ບັນດາເຜົ່າ ມີຄວາມເປັນຫ່ວງ ເປັນໃຍຢ່າງຍິ່ງ, ເຊິ່ງຈຳເປັນຕ້ອງ ໄດ້ສະເໜີລັດຖະບານ, ຜູ້ໃຊ້ແຮງງານ ເພື່ອຄົ້ນຄວ້າພິຈາລະນາ ແກ້ໄຂບັນຫາຕໍ່ຜູ້ໄດ້ຮັບ ຜົນກະທົບດັ່ງນີ້: ສະເໜີໃຫ້ລັດຖະບານ ເພີ່ມການ ກະຕຸ້ນເສດຖະກິດ ໃຫ້ແຂງແຮງກວ່າເກົ່າ ດ້ວຍການສ້າງທຸລະກິດປະ ກອບການໃໝ່, ສ້າງວຽກເຮັດງານທຳເພີ່ມຂຶ້ນ ແລະ ສ້າງລາຍຮັບໃຫ້ແຮງງານກຳມະກອນລາວ, ພ້ອມກັນນັ້ນ ກໍຄວນໃຊ້ໂອກາດ ໃນການດັດສົມ-ຈຳກັດ ແຮງງານຕ່າງປະເທດ ເຂົ້າມາເຮັດວຽກຢູ່ລາວ ທີ່ບໍ່ຈຳເປັນ ໂດຍສະເພາະແມ່ນ ແຮງງານກຳມະກອນ ທີ່ບໍ່ມີສີມື, ອາຊີບທີ່ສະຫງວນ ໃຫ້ຄົນລາວ ຕາມທີ່ໄດ້ລະບຸໄວ້ໃນ ກົດໝາຍວ່າດ້ວຍແຮງງານ ແລະ ກົດໝາຍອື່ນໆ ຢ່າງເຂັ້ມງວດ ເພື່ອເປັນການສ້າງກາ ລະໂອກາດໃຫ້ແຮງງານລາວ ທີ່ເຄື່ອນຍ້າຍເຂົ້າມາ ຈາກຕ່າງປະເທດ ມີວຽກເຮັດງານ ທຳຫລາຍຂຶ້ນ ແລະ ຫລຸດຜ່ອນການເຄື່ອນຍ້າຍ ແຮງງານໄປຕ່າງປະເທດຜິດກົດໝາຍ ຕົກເປັນເຫຍື່ອ ຂອງການຄ້າມະນຸດ ແລະ ປະກົດການຫຍໍ້ທໍ້ຕ່າງໆ

ຕ້ອງສຸມໃສ່ຄົ້ນຄວ້າກຳນົດການ ອັດຕາການ ຈ່າຍເງິນ ຊົດເຊີຍຜົນກະທົບ ໃຫ້ກຳມະກອນ ແລະ ຊາວຜູ້ອອກແຮງງານ ໃນໄລຍະປິດໂຮງງານ ແລະ ທຸລະກິດຕ່າງໆ ຈາກການປິດປະເທດ ໂດຍສະເພາະອັດຕາຊົດເຊີຍ ທີ່ນຳໃຊ້ເງິນຈາກ ກອງທຶນປະກັນສັງຄົມ ທີ່ຂຶ້ນກັບກະຊວງແຮງງານ ແລະ ສະຫວັດດີການສັງຄົມ. ພ້ອມກັນນີ້, ຮຽກຮ້ອງມາຍັງຜູ້ໃຊ້ ແຮງງານ ຈ່າຍເງິນເດືອນ ໃຫ້ກຳມະກອນ ແລະ ຊາວຜູ້ອອກແຮງງານ ຕາມທີ່ກອງປະຊຸມຂອງອົງການ 3 ຝ່າຍດ້ານແຮງງານ ແລະ ຄະນະສະເພາະກິດດ້ານເສດຖະກິດ ໄດ້ຄົ້ນຄວ້າເປັນເອກະພາບກັນ ເພາະວ່າມາຮອດປັດຈຸບັນ ຍັງມີຫລາຍໂຮງງານ ບໍ່ທັນໄດ້ຈ່າຍເງິນເດືອນ ຂອງເດືອນ 4 ໃຫ້ກໍາມະກອນ ແລະ ກໍຂໍຮຽກຮ້ອງໃຫ້ ຜູ້ໃຊ້ແຮງງານ ບໍ່ຄວນຊອກຫາເຫດຜົນ ເພື່ອເປັນການຖ່ວງດຶງ ບໍ່ຈ່າຍຄ່າແຮງງານ ໃຫ້ກຳມະກອນໃນເດືອນ 4 ແລະ ບໍ່ສວຍໃຊ້ ໂອກາດປົດ ຈໍານວນແຮງງານອອກຈາກວຽກ.

ໂອກາດດຽວກັນນີ້, ທ່ານ ພອນສານ ວິໄລເມັ້ງ ຍັງໄດ້ຮຽກຮ້ອງມາ ຍັງກຳມະກອນ ແລະ ຊາວຜູ້ອອກ ແຮງງານ ຫັນໄປຊອກວຽກ ເຮັດງານທຳອັນໃໝ່ ເປັນຕົ້ນ ຫັນເປັນຜູ້ປະກອບການ ດ້ວຍຕົນເອງເຊັ່ນ: ການຜະລິດກະສິກຳ ແລະ ປ່າໄມ້, ການຜະລິດຫັດຖະກຳ, ການເປີດຮ້ານຂາຍເຄື່ອງ, ສ້າງຜະລິຕະພັນ ເປັນຂອງຕົນເອງ ແລະ ອື່ນໆ ເພື່ອເພີ່ມລາຍຮັບແກ້ໄຂ ຊີວິດການເປັນຢູ່ ດັ່ງຄຳຂວັນທີ່ວ່າ: ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງ ດ້ວຍຕົນເອງເທື່ອລະກ້າວ.

ຂ່າວ: ມະນີທອນ

error: ເນື້ອຫາໄດ້ຮັບການປົກປ້ອງ !!