ຄາດວ່າຍັງມີແຮງງານລາວຈຳນວນຫລວງຫລາຍຕົກງານ ໄລຍະການລະບາດຂອງພະຍາດໂຄວິດ-19

ທ່ານ ພອນສານ ວິໄລເມັ້ງ ຫົວໜ້າກົມປົກປ້ອງແຮງງານ ສູນກາງສະຫະພັນກຳມະ ບານລາວ ໄດ້ໃຫ້ສຳພາດຕໍ່ນັກຂ່າວ ສຳນັກຂ່າວສານປະເທດລາວ ໃນວັນທີ 18 ພຶດສະພາ 2020 ທີ່ສູນກາງສະຫະພັນ ກຳມະບານລາວ ນີ້ວ່າ: ຄາດຄະເນວ່າ ຈະມີແຮງງານລາວ ຕົກງານຈຳນວນຫລາຍ, ເຊິ່ງຍັງບໍ່ທັນໄດ້ຕົວເລກ ທີ່ຊັດເຈນ ຍ້ອນພະຍາດ ໂຄວິດ-19 ລະບາດໜັກ ແລະ ເຮັດໃຫ້ສະພາບການຫລຸດຜ່ອນ ການຜະລິດຂອງໂຮງງານ ເນື່ອງຈາກສະພາບ ຜົນກະທົບຕໍ່ເສດຖະກິດໂລກ, ຄວາມຕ້ອງ ການກຳລັງການສັ່ງຊື້ ຈາກຕ່າງປະເທດ ຫລຸດລົງ ແລະ ສະພາບການປິດປະເທດອື່ນໆໃນທົ່ວໂລກ.

ທ່ານ ພອນສານ ວິໄລເມັ້ງ ກ່າວວ່າ: ສຳລັບການຊ່ວຍເຫລືອ ແຮງງານລາວທີ່ຕົກງານ ພວກເຮົາຈະໄດ້ສືບຕໍ່ ປຶກສາຫາລື ກັບກະຊວງແຮງງານ ແລະ ສະຫວັດດີການສັງຄົມ, ສະພາການຄ້າ ແລະ ອຸດສາຫະກຳແຫ່ງຊາດລາວ ເພື່ອຊອກຫາວິທີທາງແກ້ໄຂ ໂດຍສະເພາະແມ່ນການ ຂຶ້ນທະບຽນແຮງງານ ທີ່ຕົກງານດັ່ງກ່າວ ໃຫ້ໄດ້ໄວທີ່ສຸດ.

ທ່ານ ຍັງໄດ້ຮຽກຮ້ອງໃຫ້ແຮງງານລາວ ປະສານກັບພາກສ່ວນ ທີ່ກ່ຽວຂ້ອງຢູ່ສູນກາງ ແລະ ທ້ອງຖິ່ນ ເພື່ອຫາທາງແກ້ໄຂ ເພື່ອປົກປ້ອງສິດ ແລະ ຜົນປະໂຫຍດຂອງຜູ້ອອກແຮງງານ ໂດຍສະເພາະ ບໍ່ໄດ້ຮັບຄ່າແຮງງານ, ຮັບຄ່າແຮງ ງານບໍ່ຖືກ ຕ້ອງຕາມສັນຍາ, ຖືກການກົດຂີ່ຂູດຮີດແຮງງານ, ການໃຊ້ຄວາມຮຸນແຮງຕໍ່ແຮງງານ.

ກຳມະກອນ ແລະ ຊາວຜູ້ອອກແຮງງານ ສາມາດປະສານງານ ຂໍຄວາມຊ່ວຍເຫລືອ ຈາກສະຫະພັນກຳມະບານແຂວງ, ເມືອງ, ສຳນັກງານອົງການຕ່າງໆ ຫລື ໂທສາຍດ່ວນ 1512 ແລະ ສາມາດຮຽກຮ້ອງຂໍ ຄວາມເປັນທໍາຕາມກົດໝາຍ.


ຂ່າວ: ມະນີທອນ, ພາບ: ຂັນທະວີ ຂປລ

error: ເນື້ອຫາໄດ້ຮັບການປົກປ້ອງ !!