ພຽງມື້ດຽວ! ມີຜູ້ຕິດເຊື້ອໄຂ້ຍຸງລາຍ 12 ຄົນ ແລະ ເສຍຊີວິດ ເພີ່ມອີກ 1 ຄົນ

ໃນວັນທີ 13 ພຶດສະພາ 2020, ອີງຕາມການລາຍງານ ສູນຂ່າວສານການແພດ ສຸຂະສຶກສາ  ກະຊວງສາທາລະນະສຸກ ແຈ້ງໃຫ້ຮູ້ວ່າ: ນັບແຕ່ວັນທີ 28 ທັນວາ 2019 ຫາ 11 ພຶດສະພາ 2020 ໃນທົ່ວປະເທດມີຜູ້ຕິດເຊື້ອ ພະຍາດໄຂ້ຍຸງລາຍແລ້ວ 1.069 ຄົນ ແລະ ເສຍຊີວິດ 1 ຄົນ, ເຊິ່ງມາຮອດວັນທີ 12 ພຶດສະພາ 2020 ໄດ້ມີຜູ້ຕິດເຊື້ອເພີ່ມ 12 ຄົນ ເປັນ 1.081 ຄົນ ແລະ ເສຍຊີວິດເພີ່ມອີກ 1 ຄົນ ລວມເປັນ 2 ຄົນ.

ສູນຂ່າວສານການແພດສຸຂະສຶກສາ  ແຈ້ງໃຫ້ຮູ້ຕື່ມວ່າ: ນະຄອນຫລວງວຽງຈັນ ໄດ້ຈັດເປັນອັນດັບ ທີ່ພົບຜູ້ຕິດເຊື້ອ ໄຂ້ຍຸງລາຍ ຫລາຍກວ່າໝູ່ ຢູ່ທີ່ 316 ກໍລະນີ ແລະ ເສຍຊີວິດແລ້ວ 1 ຄົນ, ຮອງລົງມາແມ່ນ ແຂວງ ອັດຕະປື 165 ກໍລະນີ, ວຽງຈັນ 132 ກໍລະນີ, ຄຳມ່ວນ 82 ກໍລະນີ, ບໍລິຄຳໄຊ 78 ກໍລະນີ, ສາລະວັນ 72 ກໍລະນີ, ສະຫວັນນະເຂດ 61 ກໍລະນີ, ໄຊຍະບູລີ 57 ກໍລະນີ ແລະ ເສຍຊີວິດ 1 ຄົນ, ເຊກອງ 42 ກໍລະນີ, ຫລວງນໍ້າທາ 29 ກໍລະນີ, ອຸດົມໄຊ 22 ກໍລະນີ, ຈຳປາສັກ ແລະ ໄຊສົມບູນ ແຂວງລະ 7 ກໍລະນີ, ຜົ້ງສາລີ 5 ກໍລະນີ ແລະ ຫລວງພະບາງ 6 ກໍລະນີ, ເຊິ່ງຈໍານວນ ແຂວງເຫລົ່ານີ້ ແມ່ນຍັງບໍ່ມີກໍລະນີເສຍຊີວິດ. ສໍາລັບ ແຂວງຊຽງຂວາງ, ບໍ່ແກ້ວ ແລະ ຫົວພັນ ແມ່ນຍັງບໍ່ພົບກໍ ລະນີຜູ້ຕິດເຊື້ອໄຂ້ຍຸງລາຍດັ່ງກ່າວ.

ຫລາຍພາກສ່ວນໄດ້ສຸມໃສ່ ເພີ່ມທະວີການສະກັດກັ້ນ, ຄວບຄຸມ ແລະ ປ້ອງກັນການແຜ່ລະບາດຂອງ ເຊື້ອພະຍາດອັກເສບປອດ ຈາກເຊື້ອຈຸລະ ໂລກສາຍພັນໃໝ່ (ໂຄວິດ-19) ທີ່ກໍາລັງລະບາດກັນ ຢູ່ໃນທົ່ວໂລກແລ້ວ, ແຕ່ທຸກຄົນຢ່າລືມປະຕິບັດຫລັກການ 5ປ ທີ່ກະຊວງ ສາທາລະນະສຸກ ວາງອອກ ເປັນປະຈຳ ໂດຍສະເພາະທຳລາຍແຫລ່ງ ເພາະພັນໜອນນ້ຳຍຸງລາຍ “ບໍ່ມີໜອນນ້ຳ ກໍຈະບໍ່ມີຍຸງລາຍ” ໄປຄວບຄູ່ກັນ. ພ້ອມກັນນີ້, ຕ້ອງເພີ່ມທະວີ ໃນການປ້ອງກັນ ແລະ ຫລີກລ້ຽງເພື່ອບໍ່ໃຫ້ຍຸງລາຍກັດ.

ຂ່າວ: ມະນີທອນ

error: ເນື້ອຫາໄດ້ຮັບການປົກປ້ອງ !!