ເຈົ້າແຂວງຈຳປາສັກໄດ້ຮັບການຊ່ວຍເຫລືອລ້າຈາກຍີ່ປຸ່ນຫລາຍໂຄງການ

ທ່ານ ວິໄລວົງ ບຸດດາຄຳ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ ໄດ້ກ່າວເຖິງສາຍພົບພັນລາວ-ຍີ່ປຸ່ນ ໃນໂອກາດມາເຄື່ອນໄຫວຢ້ຽມຢາມ ເຮັດວຽກ ຂອງທ່ານ ເຄໂຊະ ທາເກວະກະ (Keizo TAKEWAKA) ເອກອັກຄະຣາຊະທູດ ແຫ່ງປະເທດ ຍີ່ປຸ່ນ ປະຈຳ ສປປ ລາວ ຢູ່ແຂວງຈຳປາສັກ ໃນວັນທີ 29 ກັນຍານີ້.

ທ່ານ ວິໄລວົງ ບຸດດາຄຳ ໃຫ້ຮູ້ວ່າ: ການພົວພັນຮ່ວມມືລະຫວ່າງ ສປປ ລາວ ກັບປະເທດຍີ່ປຸ່ນ ເວົ້າສະເພາະລະຫວ່າງ ແຂວງ ຈຳປາສັກກັບພາກລັດ, ເອກະຊົນ ແລະ ນັກທຸລະກິດຂອງປະເທດຍີ່ປຸ່ນ, ໃນໄລຍະຜ່ານມາໄດ້ມີການພົວພັນຮ່ວມມື ແລະ ຊ່ວຍເຫລືອໃນຫລາຍດ້ານ ເປັນຕົ້ນ:

ໂຄງການຮ່ວມມືສູນພັດທະນາສີ ມືແຮງງານລາວ-ຍີ່ປຸ່ນ (ສີມືຊ່າງໄມ້), ເຊິ່ງໄດ້ຮັບການຊາວຍເຫລືອລ້າ ຈາກລັດຖະບານຍີ່ປຸ່ນ, ຂົງເຂດສາທາລະນະສຸກ ແມ່ນໄດ້ຮັບການຊ່ວຍເຫລືອເຂົ້າໃນການກໍ່ສ້າງສຸກສາລາ ແລະ ເຮືອນພັກພະນັກງານຈຳນວນ 11 ໂຄງການ, ພ້ອມທັງຊ່ວຍເຫລືອດ້ານການພັດທະນາບຸກຄະລາກອນ ໃນຂະແໜງສາທາລະນະສຸກ, ຂົງເຂດການສຶກສາ ໄດ້ຮັບທຶນຊ່ວຍເຫລືອໃນການກໍ່ສ້າງໂຮງຮຽນປະຖົມ, ມັດທະຍົມມູນຄ່າ 293.850 ໂດລາສະຫະລັດ ແລະ ອີກຫລາຍໆໂຄງການທີ່ນອນຢູ່ໃນເຂດເສດຖະກິດພິເສດລາວ-ຍີ່ປຸ່ນປາກເຊ.

ໂອກາດດຽວກັນນີ້, ທ່ານ ເຄໂຊະ ທາເກວະກະ ໄດ້ຍົກໃຫ້ເຫັນວາລະ ແຫ່ງການຄົບຮອບການພົວພັນຍຸດທະສາດສອງປະເທດ ແລະ ສາຍພົວພັນການຮ່ວມມື ທາງດ້ານການທູດລາວ-ຍີ່ປຸ່ນ ຄົບຮອບ 65 ປີ (5/3/1955-5/3/2020), ພ້ອມນີ້, ທ່ານຍັງໄດ້ໃຫ້ຮູ້ເຖິງ 5 ວຽກງານບູລິມະສິດ ແລະ 4 ຂົງເຂດຂອງການຮ່ວມມື ຍີ່ປຸ່ນ ແລະ ສປປ ລາວ ນໍາອີກ.

error: ເນື້ອຫາໄດ້ຮັບການປົກປ້ອງ !!