ເກີດເຫດໄຟໄໝ້ ໂຮງງານຢາງພາລາຂອງບໍລິສັດກາວເຊີນ ເສຍຫາຍໜັກ

ໃນທ່າມກາງແສງແດດທີ່ຮ້ອນອົບເອົ້າ ລະຫວ່າງ 11-12 ໂມງທ່ຽງວັນ ຂອງວັນທີ 1 ຕຸລາ 2020 ໄດ້ເກີດເຫດໄຟໄໝ້ໂຮງງານຢາງພາລາ ບໍລິສັດກາວເຊີ່ນ ຢູ່ເຂດບ້ານທົ່ງ ເມືອງ ປາກຊັນ ແຂວງບໍລິຄຳໄຊ ການເກີດປະກາຍໄຟແມ່ນມີການແພ່ລາມໄປຢ່າງໄວວາ ເຮັດໃຫ້ບໍລິເວນເຂດບ້ານທົ່ງຫາບ້ານຫວຍຄູນ ຄູ້ມໜອງແດງ ເມືອງບໍລິຄັນ ໄດ້ມີຄວນໄຟປົກຫຸ້ມເປັນບໍລິເວນກວ້າງ.

ຕາມການລາຍງານຂອງທ່ານ ໄມ ລໍວັນໄຊ ຜູ້ຢູ່ໃນເຫດການ ໜຶ່ງໃນພະນັກງານຂອງໂຮງງານດັ່ງກ່າວ ໄດ້ໃຫ້ຮູ້ວ່າ: ໃນເວລາ 11 ໂມງປາຍ ໄດ້ເກີດໄຟໄໝ້ຢູ່ເຕົາອົບຢາງພາລາຂື້້ນ ພໍເມື່ອຕົນເອງແລນລົງມາຮອດ ປາກົດວ່າມີແປວໄຟເກີດຂຶ້ນຢູ່ຫຼາຍບ່ອນຂອງໂຮງງານແລ້ວ ຈຶ່ງໄດ້ໂທແຈ້ງເຈົ້າໜ້າທີ່ດັບເພີງມາຊ່ວຍ ໃນຊົ່ວຂະນະກໍ່ໄດ້ເຫັນລົດດັບເພີງມາຮອດ ແລະ ກໍ່ໄດ້ລະດົມກຳລັງມອດໄຟຢ່າງຂ້ຽວຂາດ ເພື່ອຄວບຄຸມການແພ່ລາມຂອງໄຟບໍ່ໃຫ້ໄປຫາຈຸດອື່ນ.

ພັນໂທ ເດດ ມີໄຊ ຮອງຫ້ອງຕຳຫຼວດ ຜູ້ຊີນຳວຽກງານຈໍລະຈອນມອດໄຟແຂວງ ໄດ້ໃຫ້ຮູ້ຕື່ມອີກວ່າ: ເມືື່ອໄດ້ຮັບແຈ້ງ ກໍ່ໄດ້ກຳລັງພົນ ແລະ ລົດດັບເພີງເຂົ້າມາປະຕິບັດການຢ່າງຮີບດ່ວນ ແລະ ທັນເວລາ ໂດຍສະເພາະແມ່ນການຄວບຄຸມເພີງ ບໍ່ໃຫ້ຂະຫຍາຍຕົວເປັນບໍລິເວນກວ້າງ, ພ້ອມດຽວກັ້ນຍັງໄດ້ຈັດກຳລັງຕຳຫຼວດຈາລະຈອນ ເພື່ອອຳນວຍຄວາມສະດວກ ລະບາຍການສັນຈອນ ຢູ່ເສັ້ນທາງຕໍ່ໜ້າໂຮງງານ ໃຫ້ມີຄວາມປອດໄພ ມາຮອດເວລາ 15 ໂມງຍັງບໍ່ທັນສາມາດມອດໄຟໄດ້ໝົດເທື່ອ.

ສຳລັບສາເຫດຂອງໄຟໄໝ້ໃນຄັ້ງນີ້ ແມ່ນຍັງບໍ່ຮູ້ສາເຫດຢ່າງຊັດເຈນ ຍັງລໍຖ້າການສືບສວນຂອງເຈົ້າໜ້າທີ່. ໂຮງງານຢາງພາລາຂອງບໍລິສັດກາວເຊີ່ນນີ້ ແມ່ນມີເນື້ອທີ່ທັງໝົດ 5 ເຮັກຕ່າ, ສະເພາະແຕ່ໂຮງງານມີເນື້ອທີ່ 2 ເຮັກຕ່າ, ມີການລົງທຶນປະມານ 1.200.000 ໂດລ່າ, ໂຮງງານແຫ່ງນີ້ແມ່ນນ້ຳໃຊ້ເຂົ້າໃນການຕາກ, ລີດ ແລະ ອົບຢາງພາລາ ເຮັດເປັນຢາງເຄີ່ງສຳເລັດຮູບ ແລ້ວນຳສົ່ງອອກໄປ ສປປ ຈີນ.

error: ເນື້ອຫາໄດ້ຮັບການປົກປ້ອງ !!